អូស្រ្តាលី៖យន្តហោះម៉ាឡេស៊ី MH៣៧០ បានធ្លាក់ចុះក្នុងល្បឿនលឿនខ្លាំង និងមិនបានត្រៀមខ្លួនចុះទេ
នៅថ្ងៃពុធ ទី២ វិច្ឆិកា ការិយាល័យសន្តិសុខ និងដឹកជញ្ជូនអូស្រា្តលីបានចេញផ្សាយរបាយការណ៍មួយស្តីពីព័ត៌មានថ្មីបន្ថែមទាក់ទងនឹងយន្តហោះម៉ាឡេស៊ីជើងហោះហើរលេខ MH៣៧០ ដែលធ្លាក់ក្នុងមហាសមុទ្រឥណ្ឌាក្នុងឆ្នាំ ២០១៤។ របាយការណ៍បានបញ្ជាក់ថា យន្តហោះនោះបានចុះក្នុងល្បឿនលឿនជ្រុល និងមិនបានត្រៀមខ្លួនចុះទេ។
ចុះផ្សាយនៅថ្ងៃ៖
ស្តាប់ - ០២:០១
របាយការណ៍របស់ការិយាល័យសន្តិសុខ និងដឹកជញ្ជូនអូស្រា្តលីនេះបានផ្សព្វផ្សាយនៅក្នុងថ្ងៃទី១ នៃកិច្ចប្រជុំរយៈពេល ៣ថ្ងៃរបស់ក្រុមអ្នកជំនាញក្នុងទីក្រុងកង់បេរ៉ា។ កិច្ចប្រជុំរយៈពេល ៣ថ្ងៃដែលក្រុមអ្នកជំនាញត្រូវរៀបចំផែនការថ្មីដើម្បីបន្តការស្រាវជ្រាវស្វែងរកមូលហេតុពិតនៃការធ្លាក់យន្តហោះម៉ាឡេស៊ីជើងហោះហើរលេខ MH៣៧០ កាលពីថ្ងៃទី៨ មីនា ឆ្នាំ ២០១៤ នៅក្នុងមហាសមុទ្រឥណ្ឌា។ គ្រោះថ្នាក់ដែលកាលណោះបានបណ្តាលឲ្យមានមនុស្សស្លាប់ ២៣៩នាក់ដែលភាគច្រើនជាជនជាតិចិន ព្រោះយន្តហោះនោះបានហោះចេញពីទីក្រុងគូឡាឡាំពួឆ្ពោះទៅកាន់ទីក្រុងប៉េកាំង។
របាយការណ៍បានបញ្ជាក់ច្បាស់ៗដោយសំអាងលើទិន្ន័យចុងក្រោយពីផ្កាយរណបថា យន្តហោះនោះបានចុះក្នុងល្បឿនលឿនជ្រុល មិនស្ថិតក្រោមការត្រួតពិនិត្យ និងមិនបានត្រៀមខ្លួនចុះទេ មុននឹងធ្លាក់ចូលក្នុងសមុទ្រ។ តាមរយៈព័ត៌មានថ្មីនេះនាំឲ្យលោករដ្ឋមន្រ្តីក្រសួងដឹកជញ្ជូនអូស្រា្តលីសន្និដ្ឋានថា របាយការណ៍នេះមានបង្កប់ដោយព័ត៌មានថ្មី និងសំខាន់ៗជាច្រើនលើសពីអ្វីដែលគ្រប់បានដឹង និងសង្ស័យមកទល់ពេលនេះ។ ដោយឡែក អ្នកទទួលខុសត្រូវផ្នែកស្រាវជ្រាវរកការពិតជុំវិញរឿងបាត់ខ្លួនយន្តហោះនេះបានប្រាប់ឲ្យដឹងថា ការស្រាវជ្រាវនៅពេលខាងមុខនឹងត្រូវធ្វើឡើងដោយផ្អែកលើព័ត៌មានថ្មីមួយនេះ និងថាការស្រាវជ្រាវនឹងបន្តរហូតដល់ដើមឆ្នាំ ២០១៧។
គួរជម្រាបជូនថាតាំងពីបាត់ខ្លួនជាង ២ឆ្នាំមក មានមូលេហតុជាច្រើនត្រូវបានលើកឡើង រួមមាន យន្តហោះជួបបញ្ហាបច្ចេកទេស ទង្វើភេរវកម្ម ឬមួយក៏មានការចាប់មនុស្សធ្វើជាថ្នូរ។ តែមកទល់ពេលនេះ គ្មានភស្តុតាងណាមួយដែលអាចបញ្ជាក់លើសម្មតិកម្មណាមួយក្នុងចំណោមសម្មតិកម្មទាំង ៣ខាងលើទេ។ តែក្រុមអ្នកស៊ើបអង្កេតបានបញ្ជាក់ថា បំណែកចំនួន ៣ ដែលបានរកឃើញនៅក្នុងមហាសមុទ្រឥណ្ឌាពិតជារបស់យន្តហោះនោះមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ