តុលាការក្រុងឡាអេ បដិសេធបណ្តឹងរបស់កោះម៉ាស្ហាលក្នុងការប្រឆាំងមហាអំណាចនុយក្លេអ៊ែរ
តុលាការអន្តរជាតិទីក្រុងឡាអេ ទើបចេញសេចក្តីសម្រេចនៅថ្ងៃពុធនេះថា ពុំអាចទទួលបណ្តឹងបស់កោះម៉ាស្ហាលទៅចាត់ការបានទេក្នុងការប្រឆាំងទល់នឹងប្រទេសឥណ្ឌា ប៉ាគីស្ថាននិងអង់គ្លេស។មហាអំណាចទាំង៣ ដែលកោះម៉ាស្ហាលស្តីបន្ទោសថាពុំព្រមបញ្ឈប់ការប្រណាំងប្រជែងអាវុធនុយក្លេអែរ។
ចុះផ្សាយនៅថ្ងៃ៖
ស្តាប់ - ០២:០០
តុលាការក្រុងឡាអេ នៅថ្ងៃពុធនេះ ទើបចេញសេចក្តីសម្រេចបដិសេធពុំទទួលបណ្តឹងរបស់កោះម៉ាស្ហាលដើម្បីយកទៅចាត់ការប្រឆាំងទល់នឹងឥណ្ឌា។ ប្រទេសឥណ្ឌា ដែលកោះម៉ាស្ហាល ស្តីបន្ទោសថា ពុំព្រមបោះបង់ចោលមហិច្ចតាប្រណាំងប្រជែងអាវុធនុយក្លេអ៊ែររបស់ខ្លួនឡើយ។
តុឡាការក្រុងឡាអេ ក៏បានបដិសេធដែរ នៅលើបណ្តឹងដូចគ្នារបស់កោះម៉ាស្ហាលក្នុងការប្រឆាំងទល់នឹងប៉ាគីស្ថានក៏ព្រមទាំងប្រទេសអង់គ្លេសផងដែរ។
គួររំលឹកថា កោះម៉ាស្ហាលនេះ ត្រូវបានប្រទេសមហាអំណាចនុយក្លេអ៊ែរ យកធ្វើជាទីលានសាកល្បងនុយក្លេអ៊ែររបស់ខ្លួន ជាច្រើនដងរាប់មិនអស់នៅក្នុងទស្សវត្តន៍ឆ្នាំ១៩៤០និង១៩៥០។ ការសាកល្បងនុយក្លេអ៊ែរ បានបង្កនូវផលប៉ះពាល់ជាទម្ងន់ដល់កោះម៉ាស្ហាលរហូតមកទល់បច្ចុប្បន្ននេះ។
ហេតុនេះហើយបានជាកូនកោះដ៏តូចមួយនេះដែលស្ថិតនៅក្នុងតំបន់មាហាសមុទ្រប៉ាស៊ីហ្វីក ហ៊ានតតាំងទល់នឹងប្រទេសមហាអំណាចនុយក្លេអ៊ែរនានាដោយបានប្តឹងទៅដល់តុលាការឡាអេដើម្បីបើកកកាយឲ្យមតិអន្តរៈជាតិដឹងឮ អំពីទម្ងន់ផលវិបាកដែលបង្កឡើងដោយការសាកល្បងនុយក្លេអ៊ែរនេះ។
គួររំលឹកថា ពាក្យបណ្តឹងរបស់កោះម៉ាស្ហាលទៅកាន់តុលាការក្រុងឡាអេ ជាលើកតំបូងគឺនៅឆ្នាំ២០១៤និងសំដៅប្រឆាំងផងដែរទៅលើប្រទេសចិន កូរ៉េខាងជើង បារាំង រុស្ស៊ី សហរដ្ឋអាមេរិកនិងអ៊ីស្រាអែល។
កោះម៉ាស្ហាល បានចោទប្រទេសទាំងនោះដែលជាមហាអំណាចនុយក្លេអ៊ែរ ថាពុំបានគោរពសន្ធិសញ្ញាមិនសាយភាយនុយក្លេអ៊ែរដែល បានចុះហត្ថលេខានៅឆ្នាំ១៩៦៨។ សន្ធិសញ្ញាមិនសាយភាយនុយក្លេអ៊ែរនេះដែលទីក្រុង Londres បានឲ្យសច្ចានុម័តិតែត្រូវបានប៉ាគីស្ថាននិងឥណ្ឌាបដិសេធពុំព្រមចុះហត្ថលេខាទទួលយកឡើយ។
ទោះជាយ៉ាងណាក្តី សន្ធិសញ្ញាមិនសាយភាយនុយក្លេអ៊ែរ ទាមទារផងដែរ ឲ្យបណ្តាប្រទេសនុយក្លេអ៊ែរទាំងអស់ រកកិច្ចចចារជាមួយគ្នាដោយសុទ្ធចិត្ត ដើម្បីចាត់វិធានការឲ្យបានសមស្របនៅក្នុងបញ្ហាការរំសាយនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ