លោក បានគីមូន ស្នើធ្វើអន្តរការីដោះស្រាយវិបត្តិកាស្មៀរឱ្យឥណ្ឌានិងប៉ាគីស្ថាន
ភាពតានតឹងមិនបានធូរស្បើយទេ នៅតំបន់កាស្មៀរ ដែលឥណ្ឌានិងប៉ាគីស្ថានមានជម្លោះនឹងគ្នា។ សំឡេងផ្ទុះនិងការបាញ់តគ្នាទៅវិញទៅមក បានលាន់ឮជាថ្មី នៅថ្ងៃសៅរ៍ទី ១ តុលា ពោលគឺប៉ុន្មានក្រោយពេលដែលលោកអគ្គលេខាធិការអង្គការសហប្រជាជាតិបានស្នើសុំធ្វើជាអន្តរការីឱ្យប្រទេសជិតខាងមហាអំណាចនុយក្លេអ៊ែរទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
សំឡេងកាំភ្លើងធុនស្រាល និងកំាភ្លើងត្បាល់ មិនបានស្ងាត់យូរទេ។ ការប្រយុទ្ធគ្នាបានអូសបន្លាយយ៉ាងហោចពីរ ទៅ បួនម៉ោង នៅថ្ងៃសៅរ៍នេះ នៅតាមបណ្តោយព្រំដែន ត្រង់តំបន់កាស្មៀរ ប៉ុន្តែទាំងភាគីឥណ្ឌា ក៏ដូចជាប៉ាគីស្ថាន ពុំបានលើកឡើងអំពីចំនួនជនរងគ្រោះ ឬការខូចខាតជាសម្ភារៈអ្វីទេ។
ការបាញ់រះដាក់គ្នានេះ ប្រព្រឹត្តទៅតែប្រមាណពីរថ្ងៃក្រោយការប្រកាសរបស់ក្រុងញូវដេលីធ្វើការវាយប្រហារមួយខែលើប៉ាគីស្ថានត្រង់គំនូសបន្ទាត់ព្រំដែនខណ្ឌចែកតំបន់កាស្មៀរ ដែលប្រទេសទាំងពីរជាប់ជម្លោះនឹងគ្នាអស់រយៈពេលជិត៧០ឆ្នាំមកហើយ និងដែលប៉ាគីស្ថានបានបរិហារថាប្រតិបត្តិការឈ្លានពាន។ ភាពតានតឹងនេះ បានផ្ទុះឡើងជាថ្មី បន្ទាប់មូលដ្ឋានយោធាឥណ្ឌារងការវាយឆ្មក់សម្លាប់ទាហានអស់១៩នាក់ កាលពីជាង១០ថ្ងៃមុន។ ញ៉ូវដេលីបានជម្លៀសប្រជាពលរដ្ឋនៅតាមតំបន់ព្រំដែនរាប់ពាន់នាក់ តាំងពីថ្ងៃសុក្រមក ដើម្បីជាកិច្ចការពារក្រែងមានវាយសងសឹកពីប៉ាគីស្ថាន។
ប្រឈមមុខនឹងស្ថានការណ៍កាន់តែដុនដាបនេះ លោក បានគីមូន បានស្ម័គ្រចិត្តតាំងខ្លួនធ្វើជាអន្តរការីឱ្យឥណ្ឌានិងប៉ាគីស្ថាន ដោយបានស្នើសុំឱ្យប្រទេសជិតខាងនិងសុខសឹងជាមហាអំណាចនុយក្លេអ៊ែរដូចគ្នា ចេះអត់ធ្មត់ និងចាត់វិធានការជាបន្ទាន់ដើម្បីបន្ធូរបន្ថយភាពតានតឹង។ សម្រាប់លោក បាន គីមូន ដែលរង់ចាំតែការព្រមព្រៀងពីឥណ្ឌានិងប៉ាគីស្ថាន បានប្រកាសត្រៀមនឹងចូលធ្វើអន្តរាគមន៍ភ្លាម ដើម្បីបញ្ចៀសវិបត្តិដ៏គ្រោះថ្នាក់ ក្រោយពីបានជួបឯកអគ្គរដ្ឋទូតប៉ាគីស្ថាន ប្រចាំអង្គការសហប្រជាជាតិ កាលពីល្ងាចថ្ងៃសុក្រ។
ប៉ាគីស្ថានបានស្នើសុំឱ្យលោកបាន គីមូន រៀបគម្រោងឆាប់មកបំពេញទស្សនកិច្ចនៅ ឥណ្ឌានិងប៉ាគីស្ថាននៅខែវិច្ឆិកាខាងមុខ។ ចំណែកតំណាងភាគីឥណ្ឌាវិញ បានចេញសេចក្តីថ្លែងការណ៍បញ្ជាក់ថា ឥណ្ឌាគ្មានចេតនាបង្កភាពតានតឹងឡើយ តែប្រតិបត្តិការយោធាឥណ្ឌាពេលនេះ គឺដើម្បីវាយសំពងប្រឆាំងនឹងការគេងចំណេញភេរវនិយមប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ