លទ្ធផលអង្កេត ៖ មីស៊ីលដែលបាញ់យន្តហោះម៉ាឡេស៊ីMH១៧ផលិតនៅរុស្ស៊ី និងដឹកទៅរុស្ស៊ីវិញពេលបាញ់រួច
ក្រុមការងារអន្តរជាតិ បានបង្ហាញជាសាធារណៈ នៅថ្ងៃពុធនេះ លទ្ធផលដំបូងនៃការអង្កេតព្រហ្មទណ្ឌ លើសំណុំរឿងធ្លាក់យន្តហោះ របស់ក្រុមហ៊ុនម៉ាឡេស៊ីអ៊ែរឡាញ ដែលធ្លាក់កាលពីថ្ងៃទី ១៧ កក្កដា ឆ្នាំ២០១៤ នៅភាគខាងកើតប្រទេសអ៊ុយក្រែន និងដែលបានផ្តាច់ជីវិតមនុស្សអស់២៩៨នាក់។ បើតាមរដ្ឋអាជ្ញាអន្តរជាតិ មីស៊ីលប៊ូក ដែលបាញ់យន្តហោះMH១៧ឱ្យធ្លាក់ ផលិតនៅរុស្ស៊ី និងបានបាញ់ចេញពីតំបន់គ្រប់គ្រងដោយពួកឧទ្ទាមបះបោរ ស្និទ្ធនឹងរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
បើតាមសេចក្តីសន្និដ្ឋានរបស់ក្រុមអង្កេតអន្តរជាតិ មីស៊ីលប៊ូក ដែលបាញ់ត្រូវយន្តហោះម៉ាឡេស៊ីឱ្យធ្លាក់ កាលពីឆ្នាំ២០១៤ នៅភាគខាងកើតអ៊ុយក្រែន ជាមីស៊ីលរបស់រុស្ស៊ី និងបាញ់ចេញពីភូមិមួយដែលស្ថិតនៅក្រោមការកាន់កាប់របស់ពួកឧទ្ទាមចង់ផ្តាច់ទឹកដីអ៊ុយក្រែន ស្និទ្ធនឹងរុស្ស៊ី។ មិនតែប៉ុណ្ណោះ លទ្ធផលនៃការអង្កេតបានបញ្ជាក់ទៀតថា មីស៊ីលប៊ូក ត្រូវបានដឹកបញ្ជូនមកពីរុស្ស៊ី និងបញ្ជូនត្រលប់ទៅរុស្ស៊ីវិញ ក្រោយពីបានបាញ់រួច។ ប៉ុន្តែសម្រាប់ក្រុមអ្នកអង្កេត គេមិនដឹងថាទាហានដែលបាញ់មីស៊ីលនោះ បានទទួលបញ្ជាពីមេបញ្ជាការទ័ពណាម្នាក់ ឬធ្វើឱ្យចិត្តឯងឡើយ។
ក្រុមអង្កេតការណ៍អន្តរជាតិ ដែលមានសមាជិកមកពីប្រទេសហូឡង់ អូស្ត្រាលី អ៊ុយក្រែន ម៉ាឡេស៊ី និងប៊ែលហ្ស៊ិក បានបើកអង្កេតព្រហ្មទណ្ឌឡើងក្នុងបំណងស្វែងរកឱ្យឃើញ បុគ្គលអ្នកទទួលខុសត្រូវលើការធ្លាក់យន្តហោះ និងនាំជននោះទៅឱ្យតុលាការកាត់ទោស។ ប៉ុន្តែបានប្រាប់ឱ្យដឹងតាំងពីដំបូងថានឹងមិនប្រកាសឈ្មោះជនសង្ស័យណាម្នាក់ នៅថ្ងៃនេះទេ។
មុននឹងធ្វើសន្និសីទផ្សព្វផ្សាយលទ្ធផលជាសាធារណៈនៅវេលាម៉ោង ១១ ម៉ោងសកល ក្រុមអ្នកអង្កេតបានទៅជួបម្តាយឪពុក របស់ជនរងគ្រោះ ដែលជាអ្នកដំណើរ និងអ្នកបំរើការរបស់ក្រុមហ៊ុន ឱ្យដឹងអំពីដំណើរការការងាររបស់ពួកគេ។
សូមបញ្ជាក់ថា ការអង្កេតផ្សេងមួយទៀត របស់ការិយាល័យប៉ូលិសហូឡង់ បានសន្និដ្ឋាន កាលពីខែតុលាឆ្នាំ២០១៥ថា យន្តហោះប៊ូអ៊ីញ ៧៧៧ របស់ក្រុមហ៊ុនម៉ាឡេស៊ីអ៊ែរឡាញ MH១៧ បានធ្លាក់ដោយត្រូវគ្រាប់មីស៊ីលប៊ូក ផលិតនៅរុស្ស៊ី ក្នុងតំបន់ដែលមានការប្រយុទ្ធគ្នារវាងកងទ័ពរដ្ឋាភិបាលអ៊ុយក្រែន និងពួកឧទ្ទាមចង់ផ្តាច់ទឹកដីភាគខាងកើត គាំទ្រដោយរុស្ស៊ី។ ប៉ុន្តែទាំងរុស្ស៊ី និងពួកឧទ្ទាមសុទ្ធតែបានបដិសេធ និងចង្អុលមុខកងកម្លាំងយោធាអ៊ុយក្រែនថាជាអ្នកបាញ់។
នៅថ្ងៃចន្ទនេះទៀត រុស្ស៊ីបានចេញមុខមុន ចោទអ៊ុយក្រែនចំៗថាជាអ្នកបង្កសោកនាដកម្មធ្លាក់យន្តហោះនោះ ដោយមានសំអាងថា អ៊ុយក្រែនមិនព្រមបញ្ចេញព័ត៌មានថតដោយរ៉ាដា នៅកន្លែងបាញ់មីស៊ីលទេ និងពន្យល់ថាយន្តហោះធ្លាក់នៅភាគខាងកើតអ៊ុយក្រែន តំបន់កាន់កាប់ដោយពួកឧទ្ទាម ដូច្នេះប្រសិនបើមីស៊ីលប៊ូកជារបស់គេ នោះនឹងមានឃើញជាប់ក្នុងរ៉ាដារុស្ស៊ីជាប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ