ហេតុអ្វីឡាវមានគ្រាប់បែកមិនទាន់ផ្ទុះកប់ក្នុងដីច្រើនម្ល៉េះ ?
ចុះផ្សាយនៅថ្ងៃ៖
ស្តាប់ - ០៣:៤៧
លោក បារ៉ាក់ អូបាម៉ា បានអញ្ចើញទៅដល់ក្រុងវៀងច័ន្ទន៍ តាំងពីថ្ងៃចន្ទទី ៥ កញ្ញា ដើម្បីចូលរួមក្នុងជំនួបកំពូលអាស៊ានផង និងក៏បានអញ្ជើញទៅទស្សនាក្រុងចាស់របស់ឡាវ ព្រមទាំងប្រកាសផ្តល់ជំនួយ៩០លានដុល្លារ ដល់ឡាវដើម្បីដោះមីន។ នេះជាលើកទីមួយ គិតចាប់តាំងពីសង្គ្រាមនៅវៀតណាម បានបញ្ចប់ទៅ ដែលប្រទេសឡាវ និងពលរដ្ឋឡាវ បានឃើញវត្តមានប្រធានាធិបតីអាមេរិកមកបំពេញទស្សនកិច្ចលើទឹកដីរបស់ខ្លួន។ ជាទស្សនកិច្ចបែបប្រវត្តិសាស្ត្រ ព្រោះអាមេរិកបានដឹកនាំធ្វើ សង្គ្រាមសម្ងាត់មួយ នៅឡាវ និងបន្សល់ទុកនូវមរតកដ៏ចុកចាប់ រហូតមកទល់សព្វថ្ងៃនេះ។
មនុស្សម្នាគ្រប់រូប នៅទូទាំងពិភពលោក ស្គាល់តិចឬច្រើនសង្គ្រាមនៅវៀតណាម សង្គ្រាមនៅឥណ្ឌូចិន ប៉ុន្តែចម្លើយនឹងមានតិច ឬគ្មានសោះប្រសិនបើគេសួរថា តើអ្នកធ្លាប់ឮនិយាយអំពីសង្គ្រាមសម្ងាត់នៅឡាវទេ។
បន្ទាប់ពីបានទទួលឯករាជ្យ ចេញផុតពីអាណានិគមនិយមបារាំង នៅឆ្នាំ១៩៥៣ ប្រទេសឡាវបានស្វែងរកគន្លងនយោបាយឱ្យប្រទេសដែលប្រទាញប្រទង់គ្នារវាងកុម្មុយនិស្តនិងរាជានិយម។
បន្ទាប់មកនៅដើមទសវត្សរ៍ឆ្នាំ១៩៦០ ក្នុងផ្ទៃនៃសង្គ្រាមត្រជាក់ និងក្នុងផ្ទៃនៃជម្លោះប្រដាប់អាវុធនៅវៀតណាម ប្រទេសឡាវធ្លាក់ក្នុងអស្ថិរភាពកាន់តែខ្លាំង។ បើទោះបីជានៅឆ្នាំ១៩៦២ ឡាវបានចុះកិច្ចព្រមព្រៀងនៅទីក្រុងហ្សឺណែវ ដើម្បីធានាអះអាងនិងប្រកាសខ្លួនជាប្រទេសអព្យាក្រិត្យមិនចូលបក្សសម្ព័ន្ធ ដែលមានតម្លៃជាការហាមប្រាមមិនឱ្យកងទ័ពបរទេសចូលក្នុងប្រទេសក្តី ក៏ទីតាំងភូមិសាស្ត្រនយោបាយរបស់ដែនដីឡាវ មិនអនុញ្ញាតឱ្យប្រទេសអាចដកខ្លួនចេញឆ្ងាយពីសង្គ្រាមក្នុងតំបន់បានឡើយ។
វៀតណាមខាងជើង ឬយៀកកុង បានប្រើប្រទេសឡាវ ជាផ្លូវសម្រាប់ដឹងជញ្ជូនផ្គត់ផ្គង់អាវុធយុទ្ធភ័ណ្ឌ និងកម្លាំងយោធាទៅឱ្យវៀតណាមខាងត្បូង តាមគន្លងហូជីមិញ ដោយឆ្លងចូលព្រំដែនតាមភាគខាងជើងឡាវ រួចចេញទៅវៀតណាមខាងក្រោមវិញ តាមភាគខាងត្បូងប្រទេសឡាវ។ ចំណែកឯភាគីអាមេរិកវិញ ស្វែងរកគ្រប់មធ្យោបាយទប់ស្កាត់មិនកងកម្លាំងយៀកកុងរីកលូតលាស់បាន។
ដោយចៀសមិនរួច ឡាវក៏លុងក្នុងសង្គ្រាមវៀតណាមដែរ នៅទីបំផុតរដ្ឋាភិបាលចម្រុះឡាវ ត្រូវផ្ទុះបែកខ្ចាយដូចលាជ ជាបីក្រុម គឺក្រុមកុម្មុយនិស្ត ក្រុមអព្យាក្រិត្យ និងក្រុមរាជានិយម ដែលបានទទួលការគាំទ្រពីសហរដ្ឋអាមេរិក ទាំងខាងផ្នែកហិរញ្ញវត្ថុ យោធា និងសព្វាវុធ។ កងទ័ពសម្ងាត់បានបង្កើតឡើង ធ្វើការប្រយុទ្ធជាមួយ កងទ័ពវៀតណាមខាងជើងដែលបានមកតាំងទីនៅភាគខាងជើងឡាវ អស់រយៈពេល១២ឆ្នាំ ពីឆ្នាំ១៩៦២ ដល់៧៤។ ប៉ុន្តែប្រតិបត្តិការអាមេរិកនៅឡាវនេះមិនបានឆ្លងកាត់សភាអាមេរិកទេ ទើបត្រូវជាប់ឈ្មោះថា សង្គ្រាមសម្ងាត់រហូតមក។
នៅឆ្នាំ១៩៧៣ វៀតណាមបានចុះហត្ថលេខាលើបទឈប់បាញ់ សង្គ្រាមនៅឡាវត្រូវបានបិទបញ្ចប់ ទាហានសម្ងាត់ក៏ត្រូវបំបែកជួរ បក្សកុម្មុយនិស្តឡាវ ក៏បានឡើងគ្រងគ្រងប្រទេសតែម្នាក់ឯង តាំងពីឆ្នាំ១៩៧៥រហូតមកដល់បច្ចុប្បន្ន។
ប៉ុន្តែក្នុងអំឡុងពេលសង្គ្រាមនោះ ដើម្បីផ្តាច់ដង្ហើមពួកវៀតណាមខាងជើង អាមេរិកបានទម្លាក់គ្រាប់បែក លើទីតាំងកុម្មុយនិស្តនៅភាគខាងជើងប្រទេសឡាវដូចចាក់ទឹក។ បើតាមតួលេខផ្លូវការ ឡាវជាប្រទេសដែលរងការទម្លាក់គ្រាប់បែកច្រើនជាងគេបំផុតនៅលើពិភពលោក បើគិតតាមសមមាត្រចំនួនប្រជាជន។ ជាមធ្យម ក្នុងរយៈពេល១០ឆ្នាំ ឡាវរងការទម្លាក់គ្រាប់បែករាល់៧នាទីម្តង។ គ្រាប់បែកជាងពីរលានតោន ត្រូវបានទម្លាក់ ក្នុងនោះ៣០% ពោលគឺប្រមាណ ៨០លានគ្រាប់ នៅមិនទាន់ផ្ទុះ និងកំពុងបន្តសម្លាប់ ឬធ្វើឱ្យរបួស ជនស៊ីវិល ម្នាក់ ក្នុងមួយថ្ងៃ (នៅភាគខាងជើងប្រទេស) ជាពិសេសកុមារ គិតមកទល់នឹងថ្ងៃនេះតែម្តង។
៥០ក្រោយ លោក បារ៉ាក់អូបាម៉ា បានក្លាយជាប្រធានាធិបតីអាមេរិកដំបូងគេបង្អស់ ដែលធ្វើដំណើរទៅជាន់ទឹកដីឡាវ។ លោកបានប្រកាសទទួលស្គាល់ អំពីមរតកសង្គ្រាមដ៏ចុកចាប់ និងបានរំលឹកថា សង្គ្រាមសម្ងាត់ បានធ្វើឱ្យ ឡាវក្លាយជាប្រទេសរងគ្រោះនៃការទម្លាក់ច្រើនជាងគេច្រើនជាង អាល្លឺម៉ង់ និងជប៉ុនទៅទៀត។ ក្នុងឱកាសនេះលោកបានប្រកាសផ្តល់កញ្ចប់ថវិកា ៩០លានដុល្លារអាមេរិក ជាជំនួយដោះមីន។
ការដោះមីន ដែលបើតាមអង្គការដោះមីននៅឡាវ គេទំនងជាត្រូវការពេលវេលាដល់ទៅ១៥០ឆ្នាំទើបសម្អាតអស់ ប្រសិនល្បឿនការងារមានកំរិតដូចសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ