លោកអូបាម៉ាបន្តទស្សនកិច្ចក្នុងទឹកដីឡាវចំពេលសំណល់គ្រាប់បែកអាមេរិកកំពុងសម្លាប់ប្រជាជនឡាវ
នៅថ្ងៃពុធ ទី៧ កញ្ញានេះជាថ្ងៃទី២ នៃកិច្ចប្រជុំកំពូលអាស៊ានលើកទី២៨ និងទី២៩ ក្នុងទីក្រុងវៀងចន្ទន៍ ប្រទេសឡាវ។ នៅថ្ងៃទី២ នេះ ជាការចាប់ផ្តើមកិច្ចប្រជុំកំពូលរវាងអាស៊ានជាមួយប្រទេសដៃគូ។ ក្នុងចំណោមប្រមុខរដ្ឋ និងប្រមុខរដ្ឋាភិបាលដែលកំពុងមានវត្តមាននៅក្នុងទឹកដីឡាវពេលនេះ លោកអូបាម៉ាគឺជាប្រធានាធិបតីអាមេរិកលើកដំបូងដែលបានដាក់ជើងជាន់ទឹកដីឡាវ គិតតាំងពីក្រោយការបិទសង្រ្គាមវៀតណាម អាមេរិកចន្លោះឆ្នាំ ១៩៦៤ ១៩៧៣។ សង្រ្គាមវៀតណាម អាមេរិកដែលបានជះឥទ្ធិពលខ្លំាងដល់ដែនដីឡាវដោយបានរងការទម្លាក់គ្រាប់បែករបស់អាមេរិកយ៉ាងធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
គឺជាង ៤០ឆ្នាំក្រោយការបិទបញ្ចប់សង្រ្គាមវៀតណាម អាមេរិកចន្លោះឆ្នាំ ១៩៦៤-១៩៧៣ ដែលទើបមានប្រធានាធិបតីអាមេរិកម្នាក់ដាក់ជើងជាន់ទឹកដីឡាវ។ ដូច្នេះសម្រាប់ប្រទេសឡាវ ក៏ដូចជាប្រជាជនឡាវទូទៅ នេះពិតជានិមិត្តរូបមួយធំធេងណាស់។ នៅថ្ងៃពុធ ទី៧ កញ្ញានេះ ពោលបន្ទាប់ពីបានជួបសំណេះសំណាលជាមួយថ្នាក់ដឹកនាំឡាវនៅថ្ងៃអង្គារម្សិលមិញដែលជាថ្ងៃទី១ នៃកិច្ចប្រជុំកំពូលអាស៊ានមក លោកអូបាម៉ាបន្តដំណើរទស្សនកិច្ចនៅកាន់ទីក្រុងលួងប្រាបានដែលជាអតីតទីក្រុងរបស់ប្រទេសឡាវ។
អ្វីដែលប្រទេសឡាវកំពុងទន្ទឹមរង់ចាំពីលោកអូបាម៉ា គឺជំនួយបន្ថែមសម្រាប់ប៉ះប៉ូវលើការខូចខាត និងជួយដល់ជនរងគ្រោះដោយសារឥទ្ធិពលសេសសល់ពីសង្រ្គាមវៀតណាម អាមេរិកកាលពីជាង ៤០ឆ្នាំមុន។ សូមជម្រាបជូនថានៅក្នុងសម័យសង្រ្គាមវៀតណាម អាមេរិក និងដើម្បីទប់ស្កាត់ការដឹកជញ្ជូនគ្រឿងអាវុធដឹកចេញពីឡាវទៅកាន់វៀតណាមប៉ែកខាងជើង កងទ័ពអាមេរិកបានទម្លាក់គ្រាប់បែកលើទឹកដីឡាវជាង ២លានតោន។ នៅក្នុងចំនួនគ្រាប់បែកជាង ២លានតោននោះ មានប្រមាណជា ៣០% នៅមិនទាន់ផ្ទុះ និងកំពុងបន្តសម្លាប់ប្រជាជនឡាវមកដល់សព្វថ្ងៃ ក្នុងនោះ ជនរងគ្រោះ ៤០% ជាកូនក្មេង។
គិតតាំងពីក្រោយការបិទបញ្ចប់សង្រ្គាមវៀតណាម អាមេរិកមក សំណាល់គ្រាប់បែកអាមេរិកបានបណ្តាលឲ្យមានមនុស្សស្លាប់ ឬរបួសសរុបជាង ២០ ០០០នាក់។ តែដោយសារមានកម្មវិធីដោះមីនក្រោមជំនួយរបស់អន្តរជាតិ ពិសេសពីប្រទេសអាមេរិក និងកាណាដា ចំនួនមនុស្សស្លាប់ដោយសំណល់គ្រាប់បែកអាមេរិកបានថយចុះចំនួន ៣០០នាក់ជារៀងរាល់ឆ្នាំតាំងពីឆ្នាំ ២០០៨។ បើគិតពីឆ្នាំ ២០១៣ មក ចំនួនមនុស្សស្លាប់មានប្រមាណតែ ៤០នាក់ប៉ុណ្ណោះ។
ដើម្បីចូលរួមនៅក្នុងយុទ្ធនាការកំចាត់គ្រាប់បែកអាមេរិកដែលសេសសល់ ឡាវបានទទួលជំនួយអន្តរជាតិចំនួន ៣៥លានដុល្លារក្នុងឆ្នាំ ២០១៥។ តែនៅក្នុងចំនួននេះ មានមិនដល់ ៦% ផងដែលបានយកទៅជួយទំនុកបម្រុងដល់ជនរងគ្រោះ។ ជាង ៤០ឆ្នាំក្រោយការបិទបញ្ចប់សង្រ្គាមវៀតណាម អាមេរិក វត្តមានប្រធានាធិបតីអាមេរិកលើកដំបូងក្នុងទឹកដីឡាវជាសក្ខីកម្មថ្មីដែលអាចបញ្ជាក់ពីការរំកិលរកគ្នារវាងវ៉ាស៊ីតោន និងវៀងចន្ទន៍។ តែអាទិភាពដំបូងដែលប្រជាជនឡាវទន្ទឹងរង់ចាំពីលោកអូបាម៉ា គឺជំនួយបន្ថែមសម្រាប់កំចាត់ឲ្យនូវគ្រាប់បែកអាមេរិកសេសសល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ