វៀតណាមគាំទ្រសហប្រតិបត្តិការណ៍អន្តរជាតិរក្សាសន្តិភាពនៅសមុទ្រចិនខាងត្បូង
លោកប្រធានាធិបតីវៀតណាមត្រាន់ដៃគង់(Tran Dai Quang) បានអំពាវនាវឲ្យមានកិច្ចសហប្រតិបត្តិការណ៍អន្តរជាតិ ដើម្បីថែរក្សាសន្តិភាពនៅសមុទ្រចិនខាងត្បូងព្រមទាំងទប់មហិច្ចតាវាតទីទឹកដីរបស់ទីក្រុងប៉េកាំងនៅក្នុងតំបន់ជាប់ជម្លោះជាមួយនឹងបណ្តាប្រទេសជាច្រើនទៀតក្នុងនោះក៏មានវៀតណាមដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
នៅក្នុងកិច្ចសន្ទនាដ៏កម្រមួយផ្តល់ឲ្យដល់ទីភ្នាក់ងារព័ត៌មានបារាំង AFP នៅមុនដំណើរទស្សនកិច្ចរបស់លោកប្រធានាធិបតីបារាំង François Holland នៅវៀតណាមនាខែកញ្ញាខាងមុខ លោកប្រធានាធិបតី Tran Dai Quang បានថ្លែងប្រាប់ថា”វៀតណាមសូមគាំទ្រទាំងស្រុងចំពោះកិច្ចសហប្រតិបត្តិការពីប្រទេសបារាំងនិងបណ្តាប្រទេសដ៏ទៃទៀតនៅក្នុងដំណើរការរក្សាសន្តិភាពនិងស្ថិរភាពនៅក្នុងតំបន់និងនៅសមុទ្រចិនខាងត្បូង »។
ប្រធានាធិបតីវៀតណាម បានថ្លែងបញ្ជាក់ទៀតថា” សហប្រតិបត្តិការណ៍អន្តរជាតិនោះ គឺមានគោលដៅ ដើម្បីធានាឱ្យបាននូវសន្ដិសុខនិងសេរីភាពក្នុងការធ្វើចរាចរតាមសមុទ្រនិងអាកាស។
គំនិតស្នើសុំជំនួយពីសហគមន៍អន្តរជាតិនៅក្នុងតំបន់ជាប់ជម្លោះ ធ្លាប់ត្រូវបានស្នើឡើងរួចទៅហើយកាលពីខែមិថុនាកន្លងទៅដោយលោក Jean-Yves Le Drian រដ្ឋមន្ត្រីក្រសួងការពារជាតិបារាំង។ គឺលោក ស្នើសុំឲ្យមានការដើរយាមល្បាតនៅក្នុងតំបន់ជាប់ជម្លោះពីសំណាក់បណ្តាប្រទេសក្នុងសហភាពអឺរ៉ុប។
លោក John Kerry រដ្ឋមន្ត្រី ការបរទេសអាមេរិកវិញ កាលពីចុងខែកក្កដាកន្លងមកនាដំណើរទស្សនិច្ចនៅហ្វីលីពីន បានថ្លែង ថាទីក្រុងវ៉ាស៊ីនតោន ចង់ជៀសវាងការប្រឈមមុខដាក់គ្នានៅក្នុងបញ្ហាសមុទ្រចិនខាងត្បូង។ តែវ៉ាស៊ីនតោន សុំស្នើជួយដែរដើម្បីរកការដោះស្រាយអធិករណ៍នៅសមុទ្រចិនខាងត្បូងនេះ។
ម្យ៉ាងទៀត កាលពីថ្ងៃទី១២កក្កដាមុននេះ តុលាការអាជ្ញាកណ្តាលអន្តរជាតិនៅទីក្រុងla Haye បានសម្រេចឲ្យទីក្រុងម៉ានីលឈ្នះប៉េកាំង ដោយយល់ឃើញថា “ប្រទេសចិន មិនមានសិទ្ធិជាប្រវត្តិសាស្រ្តអ្វីឡើយនៅលើសមុទ្រយុទ្ធសាស្រ្តនេះ។ កាលណោះប៉េកាំងខឹងក្រេវក្រោធចំពោះការសម្រេចរបស់តុលាការដោយបានប្រកាសថាចិននឹងមិនគោរពតាមសេចក្តីសម្រេចរបស់តុលាការអន្តរជាតិនេះដែរ។
បណ្តាប្រទេសដែលជាប់ពាក់ព័ន្ធក្នុងជម្លោះនៅក្នុងសមុទ្រចិនខាងត្បូង មានវៀតណាម ម៉ាឡេស៊ី ព្រុយណេនិងតៃវ៉ាន់។ ប្រទេសទាំងនេះនៅតែឈ្លោះដណ្តើមគ្នាថា សមុទ្រចិនខាងត្បូងជាដែនអធិបតេយ្យភាពរបស់ប្រទេសគេរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ