ជប៉ុនចោទសួរចិនរឿងដំឡើងរាដានៅសមុទ្ទចិនខាងកើត
ជប៉ុនបានធ្វើការទាមទារតាមផ្លូវទូត ការពន្យល់បំភ្លឺពីក្រុងប៉េកាំង បន្ទាប់ពីរកឃើញមានប្រព័ន្ធរាដា ត្រូវបានដំឡើងនៅលើស្ថានីយ៍រុករកឧស្ម័នហ្កាស ក្នុងសមុទ្ទចិនខាងកើត។ បើតាមសារព័ត៌មានជប៉ុនចុះផ្សាយនៅថ្ងៃអាទិត្យនេះ ការដំឡើងរាដាក្បែរដែនទឹកជាប់ជម្លោះ គឺទំនងជាធ្វើឡើងសម្រាប់បម្រើប្រយោជន៍យោធា និងដែលអាចធ្វើឱ្យទំនាក់ទំនងចិន-ជប៉ុនកាន់តានតឹង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
រាដាដែលចិនទើបដំឡើងនៅក្នុងសមុទ្ទចិនខាងកើត មានប្រយោជន៍តិចតួចបំផុតក្នុងផលិតកម្មរុករកឧស្ម័ន ហេតុដូច្នេះហើយបានជាជប៉ុនគិតក្រែងថាប៉េកាំងប្រើប្រាស់ស្ថានីយ៍ប្រេង ជាលេសបិទបាំងការបង្កើតប៉ុស្តិ៍ត្រួតពិនិត្យយោធា ដើម្បីប្រយោជន៍យោធា។ អ្វីដែលជប៉ុនកាន់តែព្រួយបារម្ភមួយគឺខ្លាចចិនស្វែងរកមធ្យោបាយពង្រឹងវត្តមានយោធា នៅក្នុងដែនសមុទ្ទចិនខាងកើតនេះ ដែលគ្មានគំនូសព្រំដែនជាផ្លូវការទេ។
បើតាមអ្នកនាំពាក្យក្រសួងការបរទេស ជប៉ុនបានដៅឃើញមានការដំឡើងប្រព័ន្ធរាដា លើស្ថានីយ៍ប្រេងជាលើកទីមួយនេះ តាំងពីចុងខែមិថុនា និងបានបញ្ជូនលិខិតការទូតសុំសេចក្តីបំភ្លឺពីប៉េកាំងរួចហើយ។ តែក្រសួងការបរទេសជប៉ុនបដិសេធមិនធ្វើអត្ថាធិប្បាយអ្វីទាំងអស់ នៅថ្ងៃនេះ។
ស្ថានីយ៍រុករកប្រេងឧស្ម័ននេះ ស្ថិតនៅមិនឆ្ងាយប៉ុន្មានពីតំបន់ប្រជុំកោះ ជាប់ជម្លោះ សេនកាគូ ជាភាសាជប៉ុន ឬទាវយូ ហៅតាមចិន។ ជាច្រើនដងមកហើយដែលជប៉ុនបានអំពាវនាវឱ្យចិនបញ្ឈប់ការសាងសង់មជ្ឈមណ្ឌលរុករកប្រេង នៅសមុទ្ទចិនខាងកើតនេះ ព្រោះជាការអភិវឌ្ឍជាឯកតោភាគី រំលោភលើការព្រមព្រៀងឆ្នាំ២០០៨ ដែលប្រទេសទាំងពីរបានសន្យាធ្វើកិច្ចសហប្រតិបត្តិការរួមគ្នាលើធនធានធម្មជាតិក្នុងតំបន់។
តូក្យូក៏បានសម្តែងការប្រឆាំងនឹងចិន នៅថ្ងៃនេះដែរ ជុំវិញ វត្តមាននាវាចិនពីរគ្រឿងដែលបានធ្វើបើកចូលដែនទឹក ទៅកៀកកោះជាប់ជម្លោះ សេនកាគូ ប្រមាណតែ២០គីឡូម៉ែត្រ។ កាលពីថ្ងៃសៅរ៍ ជប៉ុនបានអះអាងថាមានទូកនេសាទចិនប្រមាណ២៣០គ្រឿង និងនាវាឆ្នាំសមុទ្ទចិន៧គ្រឿង ក្នុងនោះ៤គ្រឿងទំនងមានផ្ទុកអាវុធផង ក៏បានបើកបរចូលដល់តំបន់ដែនទឹកជាប់ជម្លោះនេះដែរ។ នៅក្នុងរបាយការណ៍ប្រចាំឆ្នាំ ចេញផ្សាយកាលពីខែឧសភា ជប៉ុនបានគូសបញ្ជាក់ថាចិនបង្កើនសកម្មភាពយ៉ាងខ្លាំងក្នុងតំបន់នេះ មិនខុសអីពីនៅតំបន់សមុទ្ទចិនខាងត្បូងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ