ជនជាតិអ៊ុយហ្គូរ៖ រវាងក្តីស្រម៉ៃចង់ទៅនៅតួកគី និង អន្ទាក់របស់ក្រុមជីហាដអង្គការរដ្ឋអ៊ីស្លាម
ចុះផ្សាយនៅថ្ងៃ៖
ស្តាប់ - ០៥:៥២
ជនជាតិអ៊ុយហ្គួរ នៅខេត្តស៊ីនជាំង ភាគខាងលិចប្រទេសចិន ជាប្រជាជនកាន់សាសនាអ៊ីស្លាម ហើយដែលមានដើមកំណើតប្រពៃណី និងទំនៀមទំលាប់ ដូចគ្នានឹងជនជាតិតួកគី។ ក្នុងរយៈពេលប៉ុន្មានឆ្នាំចុងក្រោយនេះ ប្រជាជនអ៊ុយហ្គួរ បាននាំគ្នាធ្វើចំណាកស្រុក ដោយម្នាក់ៗ ប្រាថ្នាទៅរស់នៅលើទឹកដីតួកគី ជាទីដែលពួកគេយល់ថា គេអាចរស់នៅ និងអនុវត្តការគោរព ទៅតាមជំនឿសាសនាអ៊ីស្លាមរបស់ពួកគេបាន ខុសពីនៅខេត្តស៊ីនជាំង ដែលអាជ្ញាធរចិន បានធ្វើការរឹតត្បិតសព្វបែបយ៉ាង។ ក៏ប៉ុន្តែ មានជនជាតិអ៊ុយហ្គួរមិនតិចទេ ដែលបានធ្លាក់ចូលអន្ទាក់ ជឿលង់ទៅតាមការអូសទាញរបស់ក្រុមជីហាដ អង្គការរដ្ឋអ៊ីស្លាម ពេលដែលពួកគេបានទៅដល់តួកគី។
តួកគី ដែនដីសុបិន្តដើម្បីសាងអនាគតថ្មី សម្រាប់ជនជាតិអ៊ុយហ្គួរ៖
ដោយយោងតាមតួលេខរបស់វេទិកាពិភពលោក ដើម្បីជនជាតិអ៊ុយហ្គួរ ក្នុងរយៈពេល២ឆ្នាំចុងក្រោយនេះ មានជនជាតិអ៊ុយហ្គួរ ខេត្តស៊ិនជាំងរបស់ចិន ពី៨ពាន់ ទៅ១ម៉ឺននាក់ ដែលបាននាំគ្នារត់ចេញពីចិន ដើម្បីផ្សងវាសនា ទៅរស់នៅលើទឹកដីតួកគី។ តួកគីជាដែនដីសុបិន្ត ដែលប្រជាជននេះ ប៉ងប្រាថ្នាទៅរស់នៅ ដោយសារតែពួកគេជឿថា នៅទីនោះ ពួកគេប្រាកដជាអាចស្វែងរកសេចក្តីសុខសុភមង្គល ដោយគោរពទៅតាមប្រពៃណីសាសនាអ៊ីស្លាមដ៏ខ្ជាប់ខ្ជួន និងតឹងរឹង។
ប្រជាជនអ៊ុយហ្គូរជាច្រើន បានថ្លែងថា ពួកគេរត់មកនៅតួកគី ដោយសារតែពួកគេចង់មកកសាងអនាគតថ្មី។ នៅខេត្តស៊ីនជាំង ប្រទេសចិន ពួកគេសុខចិត្តបោះបង់ចោលផ្ទះសម្បែង ឃ្លាតចាកប្រពន្ធកូនមួយរយៈ ដើម្បីមកកសាងជីវភាពនៅតួកគី ទម្រាំដល់មានឱកាសអាចនាំយកគ្រួសារមកជាបន្តបន្ទាប់។ នៅតួកគី ទាំងប្រពៃណី ទាំងភាសា គឺដូចគ្នាស្ទើរតែទាំងស្រុង ទៅនឹងជនជាតិអ៊ុយហ្គួរ។ ពួកជនជាតិអ៊ុយហ្គួរ ដែលជ្រើសរើសយកចំណាកស្រុក បានអះអាងថា ពួកគេមិនអាចរស់នៅក្នុងនឹមដែក របស់អាជ្ញាធរចិនប៉េកាំងបានទៀតទេ។ ប្រពៃណីទំនៀមទំលាប់តាមបែបសាសនាអ៊ីស្លាម របស់ពួកគេ ត្រូវបានហាមឃាត់ទាំងអស់។ ឧទាហរណ៍ ចិនបានចេញច្បាប់ ហាមមិនឲ្យស្រីៗ ពាក់ឃ្លុំក្រណាត់ខ្មៅ ហើយហាមមិនឲ្យមានសាលាបង្រៀនគម្ពីរកូរ៉ង់អ៊ីស្លាម នៅខេត្តស៊ិនជាំងទេ។
ប៉ុន្តែសម្រាប់អ្នក ដែលបានធ្វើដំណើរមកដល់តួកគី បានសម្រេច គឺវាសនាវាមិនដូចគ្នាទាំងអស់នោះទេ ហើយក្តីស្រម៉ៃ ដែលធ្លាប់សង្ឃឹមទុក ក៏វាមិនប្រាដកថា មានពិតជាក់ស្តែង ទាំងអស់នោះដែរ។ ប្រជាជនអ៊ុយហ្គួរ ដែលបានរត់មកដល់តួកគី គឺភាគច្រើនរស់នៅក្នុងនាមជាជនអន្តោប្រវេសន៍ខុសច្បាប់។ សម្រាប់អ្នកដែលមានបងប្អូន ញាតិមិត្ត រស់នៅក្នុងតួកគីស្រាប់ គឺអាចមានភាពងាយស្រួលច្រើន ក្នុងការតាំងទីលំនៅ និងរកការងារធ្វើ។ ចំណែកភាគច្រើនលើសលប់ គឺមកដល់ដោយគ្មានស្គាល់អ្នកណាសោះ។ ថ្វីត្បិតតែតួកគីជាប្រទេសដែលមានសេដ្ឋកិច្ចកំពុងលេចធ្លោ នៅក្នុងតំបន់ ក៏ប៉ុន្តែចំនួនអ្នកអត់ការងារធ្វើ នៅមានច្រើន មិនតិចជាង ១០%ទេ។ ហេដ្ឋារចនាសម្ពន័្ធសង្គមទៀតសោត ក៏នៅមិនទាន់មានប្រសិទ្ធិភា ដើម្បីទទួលយកជនអន្តោប្រវេសន៍ ឲ្យបានដិតដល់ដែរ។ ដូច្នេះ ជនជាតិអ៊ុយហ្គួរ ដែលមកដល់បាតដៃទទេរ គ្មានបង្អែក គ្មានការងារ ត្រូវរសាត់អណ្តែត ហើយងាយធ្លាក់ចុះ ចាញ់បោកការអូសទាញ របស់ក្រុមអ៊ីស្លាមជ្រុលនិយមណាស់។
ខកបំណងនឹងតួកគី ជនជាតិអ៊ុយហ្គួរធ្លាក់ចូលអន្ទាក់ពួកជីហាដអង្គការរដ្ឋអ៊ីស្លាម៖
អ្នកស្រាវជ្រាវនៅសកលវិទ្យាល័យ ណានយ៉ាងសឹង្ហបុរីម្នាក់ បានសន្និដ្ឋានថា ក្រុមជីហាដអង្គការរដ្ឋអ៊ីស្លាម បានឆ្លៀតឱកាស ដែលជនជាតិអ៊ុយហ្គួរ ជួបការលំបាក គ្មានទីពឹងនៅតួកគី ដើម្បីប្រើការឃោសនាអូសទាញពួកគេ ឲ្យចូលទៅបំរើពួកវានៅស៊ីរី និងនៅអ៊ីរ៉ាក់។ ពួកជីហាដអង្គការរដ្ឋអ៊ីស្លាម បានប្រើប្រាស់រូបភាពវីដេអូឃោសនា ដែលបង្ហាញពីជីវភាពរស់នៅសុខសាន្ត តាមបែបទ្រឹស្តីសាសនាអ៊ីស្លាមតឹងតែង។
អាជ្ញាធរចិន និងអ្នកស្រាវជា្រវមួយចំនួន ធ្លាប់ទាំងសន្និដ្ឋានទៀតថា ការញុះញុងអូសទាញជនជាតិអ៊ុយហ្គួរ ឲ្យចូលទៅបំរើក្រុមជីហាដអង្គការរដ្ឋអ៊ីស្លាមនេះ គឺមិនមែនមានធ្វើឡើងតែនៅក្នុងតួកគីប៉ុណ្ណោះទេ គឺពួកជីហាដ ថែមទាំងបានប្រើប្រាស់បណ្តាញគ្នាវា មកអូសទាញមនុស្ស ដល់ក្នុងសហគមជនជាតិអ៊ុយហ្គួរ នៅស៊ីនជាំងផ្ទាល់តែម្តង។ បើយោងតាមតួលេខរបស់អ្នកស្រាវជ្រាវនៅតួកគី សព្វថ្ងៃនេះ មានជនជាតិអ៊ុយហ្គួរប្រហែលជា៤ពាន់នាក់ ដែលកំពុងតែកាន់អាវុធ នៅខាងក្រុមជីហាដអង្គការរដ្ឋអ៊ីស្លាម ក្នុងទឹកដីស៊ីរី។ កន្លងមក មានជនជាតិអ៊ុយហ្គួរស្លាប់ យ៉ាងហោចណាស់ ៥០០នាក់ រួចទៅហើយ នៅលើសមរភូមិស៊ីរី។
អាស៊ីអាគ្នេយ៍ ផ្លូវឆ្លងកាត់ថ្មីរបស់ជនជាតិអ៊ុយហ្គួរ៖
ភូមិសាស្ត្ររបស់តំបន់ស៊ិនជាំង ដែលស្ថិតនៅខាងលើខ្ពង់រាបទីបេ គឺស្ថិតនៅជាប់ប្រទេសអាស៊ីកណ្តាល ធំៗ មានដូចជាអាហ្វហ្គានីស្ថាន ប៉ាគីស្ថាន និងតួកមេនីស្ថានជាដើម។ កន្លងមកប្រជាជនអ៊ុយហ្គួរ បានជ្រើសយកផ្លូវនេះ ដើម្បីឆ្លងកាត់ធ្វើដំណើរទៅកាន់តួកគី។ ប៉ុន្តែក្រោយ ភេរវកម្មបង្កឡើងដោយក្រុមអាល់កាអ៊ីដា នៅក្រុងញូយក ក្នុងឆ្នាំ២០០១ សង្រ្គាមប្រឆាំងភេរវកម្មបានផ្ទុះឡើង ហើយចិន បានរឹតបន្តឹងព្រំដែនជាមួយតំបន់នេះ ដើម្បីទប់ស្កាត់ មិនឲ្យមានក្រុមតាលីបង់ លុកលុយចូលមកខាងទឹកដីចិន។
ប៉ុន្តែប៉ុន្មានឆ្នាំចុងក្រោយនេះ ក្រុមជនជាតិអ៊ុយហ្គួរ បានជ្រើសរើសយកតំបន់អាស៊ីអាគ្នេយ៍ជាផ្លូវឆ្លងកាត់ ដើម្បីអាចធ្វើដំណើរទៅកាន់តួកគី។ ពួកគេ បានធ្វើដំណើរមកដល់ភាគខាងត្បូងប្រទេសចិន តាមខេត្ត យូណាន ហ្គ័ងស៊ី និងហ្គ័ងទុង ហើយបន្តដំណើរថ្មើរជើងមកដល់ វៀតណាម ថៃ និងកម្ពុជាជាដើម។ កាលពីឆ្នាំ២០១៤ ថៃបានរកឃើញជនជាតិអ៊ុយហ្គួរ៤០០នាក់ នៅក្នុងជំរុំមួយនៅភាគខាងត្បូង ក្បែរម៉ាឡេស៊ី។ ឆ្លងកាត់និតិវិធិ ដ៏ប្រទាញប្រទង់ ទីបំផុតទៅ ជនជាតិអ៊ុយហ្គួរ ១៧០នាក់ត្រូវបានបញ្ជូនឲ្យទៅរស់នៅតួកគី ហើយសល់ពីនេះ ត្រូវបានអាជ្ញាធរចិនដឹកយកទៅដាក់ឃុំ នៅខេត្តស៊ិនជាំងវិញ។
ដោយឡែក ម៉ាឡេស៊ី ដែលជាប្រទេសកាន់សាសនាអ៊ីស្លាម បានជួយសម្រួលជាច្រើន ដល់ដំណើរការសុំសិទ្ធិជ្រកកោន របស់ជនជាតិអ៊ុយហ្គួរ។ តាមការស្មាន ម៉ាឡេស៊ី បានចុះហត្ថលេខាជាសម្ងាត់ ជាមួយ តួកគី ថាត្រូវបញ្ជូនជនជាតិអ៊ុយហ្គួរទាំងអស់ ដែលបានមកដល់ម៉ាឡេស៊ី ឲ្យទៅរស់នៅតួកគី។ នៅរវាងពី ឆ្នាំ២០១២ទៅ ២០១៤ ម៉ាឡេស៊ីបានបញ្ជូនជនជាតិអ៊ុយហ្គួរ ទៅតួកគីយ៉ាងហោចណាស់ ៣ពាន់នាក់។
ចិនប្រើធម៌ក្តៅ ដូចកាន់តែជម្រុញជនជាតិអ៊ុយហ្គួរឲ្យកាន់តែធ្វើចំណាកស្រុក៖
តាមពិតទៅ ជនជាតិអ៊ុយហ្គួរពីមុន មិនមែនជាអ្នកកាន់សាសនាអ៊ីស្លាមតឹងរឹង ជ្រុលនិយមដូចបច្ចុប្បន្ននេះទេ។ តំបន់ស៊ិនជាំង ជាតំបន់ដែលស្ថិតនៅលើផ្លូវ ឆ្លងកាត់ នៃអ្នករកស៊ីជួញដូររវាងទ្វីបអាហ្វ្រិក ទ្វីបអឺរ៉ុប និងទ្វីបអាស៊ី។ តាំងពីបូរាណមក ជនជាតិអ៊ុយហ្គួរនេះ មានភាពឆ្លាតវៃ និងត្រូវគេសរសើរថាជាមនុស្សពូកែរកស៊ី និងទំនាក់ទំនងគេឯង។ ដូច្នេះ ជនជាតិអ៊ុយហ្គួរមិនមែនជាពួកអ្នកងប់ងុលនឹងសាសនាអ៊ីស្លាម រឺគ្មានមនសិកាបើកទូលាយនោះទេ។
ចលនាប្រែប្រួលនៃការផ្លាល់ប្តូរ មកប្រកាន់ទ្រឹស្តីតឹងរឹងតាមបែបសាសនាអ៊ីស្លាម និកាយស៊ុនីត គឺដោយសារតែឥទ្ធិពល របស់ប្រទេសក្បែរខាង គឺមានប៉ាគីស្ថាន និងអាហ្វហ្កានីស្ថាន។ ហើយប្រទេសទាំងនេះទៀតសោត ក៏ទទួលឥទ្ធិពលដោយផ្ទាល់ ពីប្រទេសអារ៉ាប់ធំៗ និងផ្តាច់ការ គឺអារ៉ាប៊ីសាអ៊ូឌីត និង អារ៉ាប់រួម ជាដើម។
ក្នុងរយៈពេលចុងក្រោយនេះ ចិនបានប្រើធម៌ក្តៅ ហាមឃាត់ការអនុវត្តតឹងតែងតាមបែបសាសនាអ៊ីស្លាម ដូចជាការហាមមិនឲ្យសិស្សសាលា ចេញទៅសូត្រធម៌នៅវិហារអ៊ីស្លាម ហាមមិនឲ្យមានការបង្រៀនគម្ពីរកូរ៉ង់ជាដើម។ ការប្រើធម៌ក្តៅដោយកម្រោល ពីសំណាក់អាជ្ញាធរចិន ដោយខ្វះគោលនយោបាយអោបក្រសោប រួមរស់ជាមួយគ្នាក្នុងសង្គមតែមួយ វាមិនត្រឹមតែមិនបានផលទេ តែវាវិតតែរុញច្រានប្រជាជនអ៊ុយហ្គួរ ឲ្យកាន់តែស្អប់រដ្ឋាភិបាលចិន ហើយនាំគ្នា អនុវត្តទ្រឹស្តីអ៊ីស្លាមជ្រុលនិយមកាន់តែច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ