អូបាម៉ា គួរសរសើរ រឺរិះគន់ ពេលជួបនាយករដ្ឋមន្ត្រីម៉ាឡេស៊ី?
បន្ទាប់ពីបានចូលរួមប្រជុំ ក្នុងជំនួបកំពូលប្រទេសអាស៊ីប៉ាស៊ីហ្វិក ហៅកាត់ថា APEC នៅទីក្រុងម៉ានីល ប្រទេសហ្វីលីពីន លោកអូបាម៉ា ប្រធានាធិបតីសហរដ្ឋអាមេរិក បានធ្វើដំណើរ មកកាន់ក្រុងកូឡាឡំពួរ ដើម្បី ជួបជាមួយនឹងនាយករដ្ឋមន្ត្រីម៉ាឡេស៊ី លោកណាជិប រ៉ាហ្សាក់។ ម៉ាឡេស៊ី ជាដៃគូសេដ្ឋកិច្ចដ៏សំខាន់សម្រាប់អាមេរិក ក៏ប៉ុន្តែពេលនេះ លោកអូបាម៉ា ប្រាកដជាត្រូវថ្លឹងថ្លែង ថាតើគួរនិយាយយ៉ាងណា ឲ្យសមរម្យ ព្រោះមួយរយៈក្រោយនេះ លោកនាយករដ្ឋមន្រ្តីម៉ាឡេស៊ី ត្រូវជាប់រឿងអាស្រូវពុករលួយ និងការរំលោភសិទ្ធិមនុស្ស ជាច្រើនករណី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
សម្រាប់សហរដ្ឋអាមេរិក ម៉ាឡេស៊ី ជាដៃគូដ៏សំខាន់បំផុត។ សំខាន់ទាំងផ្នែកសេដ្ឋកិច្ច និងនយោបាយ នៅក្នុងតំបន់អាស៊ីអាសគ្នេយ៍ ព្រោះថា ម៉ាឡេស៊ី ជាសរសរមួយសម្រាប់ ឲ្យសហរដ្ឋអាមេរិក ឈរជើង ប្រជែងជាមួយនឹងមហាយក្សចិន នៅក្នុងតំបន់នេះ។
កាលពីខែធ្នូ ឆ្នាំ ២០១៤ មេដឹកនាំទាំងពីរ បានជួបគ្នារួចមកហើយ នៅកោះហាវ៉ៃ ដោយបានលេងវាយកូនហ្គោលជាមួយគ្នា ក្នុងបរិយាកាសកម្សាន្តសប្បាយ។ ប៉ុន្តែសម្រាប់ពេលនេះ ជំនួបរវាង លោកអូបាម៉ា និងលោក ណាជិប រ៉ាហ្សាក់ អាចនិងមិនសូវជាញញឹមញញែម ដូចមុនទៀតទេ ដោយសារតែលោកអូបាម៉ា ត្រូវថ្លឹងថ្លែង ដោយទើសទាល់ ថាត្រូវនិយាយបែបណា ទាក់ទិននឹងស្ថានការណ៍ ដែលបានកើតឡើងកន្លងមកនៅម៉ាឡេស៊ី។ ហេតុការណ៍ កន្លងមក គឺលោក ណាជិប រ៉ាហ្សាក់ មានជាប់រឿងអាស្រូវពុករលួយ ព្រមទាំងបានប្រើប្រាស់អំណាចផ្តាច់ការរបស់ខ្លួន បំបិតមាត់អ្នកសារព័ត៌មាន និងការរិះគន់ទូទៅ ពីសំណាក់មតិសាធារណៈ។
កាលពីថ្ងៃម្សិលមិញ ក្រុមមកពីគណបក្សប្រឆាំងម៉ាឡេស៊ី បានអំពាវនាវឲ្យលោក អូបាម៉ា និយាយត្រង់ទៅត្រង់មក ពីបញ្ហាធំៗ នៅម៉ាឡេស៊ី ក្រោមនឹមអំណាចផ្តាច់ការ របស់នាយករដ្ឋមន្ត្រីបច្ចុប្បន្ន។ ក្រុមប្រឆាំង បានទាមទារឲ្យលោកអូបាម៉ា ត្រូវតែលើកឡើងពីកំណែទម្រង់ចាំបាច់មួយចំនួន ហើយនឹងដាក់កំហិត ទៅលើលោក ណាជិប រ៉ាហ្សាក់ ក្នុងការគោរពគោលការណ៍គ្រិះ នៃលទ្ធិប្រជាធិបតេយ្យ ដូចដែរអាមេរិក ខ្លួនឯង តែងតែអួតថាខ្លួន ជាបិតាប្រជាធិបតេយ្យ។ ដៃគូពាណិជ្ជកម្ម សហប្រតិបត្តិការសេដ្ឋកិច្ច ទាំងអស់នេះ ត្រូវតែដើរទន្ទឹមនឹងការគោរពសិទ្ធិមនុស្ស សិទ្ធិសេរីភាពទូទៅ។ ដូច្នេះវាជាតួនាទីរបស់សហរដ្ឋអាមេរិក ក្នុងការក្រើនរំលឹក ដៃគូពាណិជ្ជកម្មរបស់ខ្លួន។
សូមបញ្ជាក់ថា លោកនាយករដ្ឋមន្ត្រីម៉ាឡេស៊ី ត្រូវបានគេរិះគន់ជាខ្លាំង ថាបានប្រើកម្លាំង និងបណ្តាញរបស់ខ្លួន ធ្វើបាបក្រុមសកម្មជនប្រឆាំង បន្ទាប់ពីបានសង្កេតឃើញក្រុមគណបក្សប្រឆាំង បានសម្លេងគាំទ្រ កាន់តែខ្លាំង កាលពីការបោះឆ្នោត ក្នុងឆ្នាំ២០១៣។ មិនត្រឹមតែប៉ុណ្ណោះ រឿងអាស្រូវពុករលួយ របស់លោក និងក្រុមគ្រួសារលោក រិតតែធ្វើឲ្យមតិសាធារណៈម៉ាឡេស៊ី កាន់តែមិនពេញចិត្តលោកថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ