កូរ៉េខាងទាំងពីរព្រមជួបចរចាគ្នា ពីរម៉ោងមុនផុតឱសានវាទសង្គ្រាមរបស់ព្យុងយ៉ាង
ទីប្រឹក្សារបស់ប្រមុខគីម ជុងអ៊ុន និងរដ្ឋាភិបាលកូរ៉េខាងត្បូង ត្រូវជួបពិភាក្សាគ្នានៅថ្ងៃនេះ ក្នុងភូមិជាប់ព្រំដែនPanmunjun ដើម្បីសាកល្បងបន្ធូរសម្ពាធតានតឹង ដែលប្រទេសជាបងប្អូនបង្កើតគូសត្រូវនឹងគ្នា បាននិងកំពុងដើរមកដល់មាត់ជ្រោះនៃសង្គ្រាម។ ព្យុងយ៉ាង បានប្រកាសប្រជុំជើងទ័ព ត្រៀមធ្វើសង្គ្រាមប្រឆាំងកូរ៉េខាងត្បូង តាំងពីថ្ងៃសុក្រជាមួយនឹងឱសានវាទ៤៨ម៉ោង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
ទន្ទឹមនឹងការគំរាមកំហែង ត្រៀមបំផ្ទុះសង្គ្រាមនៅតាមព្រំដែន ថ្នាក់ដឹកនាំជាន់ខ្ពស់របស់កូរ៉េទាំងពីរ ត្រូវជួបចរចាគ្នានៅថ្ងៃនេះ នៅវេលាម៉ោង ៦ល្ងាច ម៉ោងនៅក្នុងស្រុក។ ទីប្រឹក្សារបស់លោកស្រីប្រធានាធិបតី ប៉ាក់គុនហេ ទទួលបន្ទុកផ្នែកសន្តិសុខជាតិ និងរដ្ឋមន្ត្រីក្រសួងបង្រួបបង្រួមកូរ៉េ ជាតំណាងរបស់សេអ៊ូល ត្រូវជួបជាមួយនឹងក្រុមប្រឹក្សាយោធារបស់គីមជុងអ៊ុន និងតំណាងជាន់ខ្ពស់ទទួលបន្ទុកកិច្ចការអន្តរកូរ៉េ។
ជំនួបជាន់ខ្ពស់នេះ ជាការផ្តួចផ្តើមគំនិតនិងស្នើឡើងមុន ដោយភាគីកូរ៉េខាងជើង កាលពីថ្ងៃសុក្រ។ ឯកូរ៉េខាងត្បូងបានឆ្លើយតបវិញ ជាវិជ្ជមាន នៅថ្ងៃសៅរ៍ តែបានដាក់លក្ខខណ្ឌឱ្យទីប្រឹក្សាយោធារបស់អគ្គមគ្គុទ្ទេសក៍កូរ៉េខាងជើង លោក វ៉ង់ ព្យុងសូ Hwang Pyong So។ នៅទីបំផុត កូរ៉េទាំងពីរ ក៏បានព្រមព្រៀងគ្នារៀបចំឱ្យជំនួបថ្ងៃនេះឡើង។
ការចរចាត្រូវបានប្រកាសជាតាមកញ្ចក់ទូរទស្សន៍ជាតិកូរ៉េខាងត្បូង នៅប្រមាណពីរម៉ោង មុនការផុតឱសានវាទកំណត់ដោយព្យុងយ៉ាង ដែលទាមទារឱ្យសេអ៊ូលបញ្ចប់ទាំងស្រុងសកម្មភាពចាក់មីក្រូ ខ្លាំងៗតាមព្រំដែន ឃោសនាបង្អាប់បន្តុះរបបកុម្មុយនិស្ត។
កូរ៉េទាំងពីរ ដែលបើតាមបច្ចេកទេសកំពុងស្ថិតក្នុងស្ថានភាពមានសង្គ្រាមនឹងគ្នានៅឡើយ បានប្រឈមមុខដាក់គ្នាយ៉ាងខ្លាំង នារយៈពេលប៉ុន្មានថ្ងៃចុងក្រោយនេះ។ កូរ៉េខាងជើងបានប្រមូលផ្តុំទ័ពឱ្យស្ថិតក្នុងស្ថានភាពត្រៀមចេញធ្វើសង្គ្រាម ឯខាងត្បូងវិញ ដោយមានជំនួយពីទ័ពអាកាសអាមេរិក បានបញ្ចេញយន្តហោះទម្លាក់គ្រាប់បែកធ្វើលំហាត់សមរួមគ្នាប្រុងជើងទម្លាក់គ្រាប់ដែរនៅព្រឹកមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ