អតីតប្រធានាធិបតីស្រីលង្កាសង្ឃឹមឈ្នះឆ្នោតសភាក្លាយជានាយករដ្ឋមន្ត្រី
នៅថ្ងៃចន្ទទី ១៧ សីហា នេះ ពលរដ្ឋស្រីលង្កាជាង១៥លាននាក់ ត្រូវអញ្ជើញទៅបោះឆ្នោតសភាម្តង ដើម្បីជ្រើសរើសសមាជិកសភាថ្មីចំនួន២២៥អាសនៈ។ ជាការបោះឆ្នោតដែលសម្គាល់ខ្លាំងដោយវត្តមានអតីតប្រធានាធិបតីស្រីលង្កា លើឆាកនយោបាយ។ ៨ខែក្រោយបរាជ័យក្នុងការបោះឆ្នោតប្រធានាធិបតី លោក ម៉ាហ៊ិនដា រ៉ាចាប៉ាកសេ Mahinda Rajapakse កំពុងសាកល្បងរកគ្រប់មធ្យោបាយ ដើម្បីវិលមកកាន់អំណាច ជានាយករដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០៦:៣១
លោក Mahinda Rajapakse ប្រធានាធិបតីស្រីលង្កា ពីឆ្នាំ ២០០៥-២០១៥ (ជាអាយុកាលដ៏យូរអង្វែងជាងគេ នៅតំបន់អាស៊ីខាងត្បូង) មុននឹងត្រូវចាញ់ឆ្នោត គួរឱ្យភ្ញាក់ផ្អើល ធ្លាក់ពីតំណែងកាលពីខែមករាឆ្នាំ២០១៥កន្លងទៅនេះ។ ក្នុងពេលមានតួនាទីជាមេដឹកនាំប្រទេស លោក Mahinda Rajapakseមានប្រជាប្រិយភាពខ្ពស់ ជាបុរសខ្លាំង មានស្នាដៃជាពិសេស បានបិទបញ្ចប់សង្គ្រាមបះបោរចង់ផ្តាច់ទឹកដី រយៈពេល៣៧ឆ្នាំ របស់ពួកឧទ្ទាមខ្លាតាមូល នៅឆ្នាំ២០០៩។ ប៉ុន្តែ ភាពត្រដែតត្រដឹមនេះធ្លាក់ចុះបន្តិចម្តងៗ នារយៈពេលប៉ុន្មានឆ្នាំចុងក្រោយ ដោយរកការរិះគន់កាន់តែខ្លាំងឡើងៗ ថាជាបុគ្គលផ្តាច់ការ គ្រួសារនិយម ...
ក្តីសង្ឃឹមថានឹងបានវិលមកកាន់អំណាចវិញ ជាដំណើរផ្លូវដ៏វែងឆ្ងាយ។ នៅក្នុងពេលឃោសនាបោះឆ្នោត លោក Mahinda Rajapakse បានប្រើយុទ្ធសាស្ត្រដដែល គឺបញ្ចេះភ្លើងជាតិនិយម ឱ្យឆេះសន្ធោសន្ធៅឡើងក្នុងបេះដូងពលរដ្ឋនៃសហគមន៍ស្រីលង្កា ដែលជាជនជាតិភាគច្រើន (៧០%)របស់ប្រទេស និងបានលើកឡើងអំពីបញ្ហាអស្ថិរភាពក្នុងរង្វង់រដ្ឋាភិបាលផុតអាណត្តិ ព្រមទាំងការស្ទុះងើបឡើងវិញនៃចលនាបះបោរចង់ផ្តាច់ទឹកដី។ នេះតាមអ្នកឆ្លើយឆ្លងព័ត៌មានរបស់វិទ្យុបារាំងប្រចាំក្រុងកូឡុំបូ។
នាយករដ្ឋមន្ត្រីផុតអាណត្តិ មានប្រៀបជាង
ការស្ទង់មតិនៅស្រីលង្កា ពិបាកយកជាការណ៍បានណាស់ ប៉ុន្តែទោះជាយ៉ាងដូច្នេះក្តី ក៏លោក រ៉ាចាប៉ាសេ ហាក់ដូចជាពិបាកនឹងឈ្នះបន្តិចហើយ បើគេសង្កេតលើស្ថានភាពជាក់ស្តែង។
គូប្រជែងរបស់លោក Mahinda Rajapakse អតីតបុរសខ្លាំងស្រីលង្កានេះ គឺគ្មាននរណាក្រៅអំពីប្រធានាធិបតីកំពុងកាន់អំណាច និងនាយករដ្ឋមន្ត្រីផុតអាណត្តិ ដែលធ្លាប់ជាសមាជិកបក្សតែមួយជាមួយគ្នានោះទេ។ រដ្ឋាភិបាលចម្រុះរបស់លោកនាយករដ្ឋមន្ត្រីផុតអាណត្តិ បានទទួលការគាំទ្រខ្លាំងពីខាងសហគមន៍ជនជាតិភាគតិច តាមូល និង អ៊ីស្លាមដែលបានចូលរួមបោះឆ្នោតយ៉ាងដ៏កុះករ រហូតបានជោគជ័យ។ ឯលោកMahinda Rajapakseបានទទួលសំឡេងនាំមុខខ្លាំងក្នុងរង្វង់សហគមន៍ពុទ្ធសាសនា និងស្រីលង្កា ដែលជាជនជាតិភាគច្រើនពិតមែន ប៉ុន្តែប្រពៃណីនេះ កំពុងផ្តើមបាត់បង់ នៅតាមតំបន់មូលដ្ឋាន ព្រោះសហគមន៍ស្រីលង្កា ពុទ្ធសាសនិក នៅជនបទ មិនសប្បាយចិត្តសោះនឹងរបបដឹកនាំរបស់លោកMahinda Rajapakseទេ នារយៈពេលប៉ុន្មានឆ្នាំចុងក្រោយនេះ ៖ កំណើនសេដ្ឋកិច្ចមានច្រើន តែពលរដ្ឋគ្មានបានទទួលផលអ្វីសោះ។
ជាងនេះទៅទៀត លោក Mahinda Rajapakseត្រូវជាប់ប្រលូកប្រលាក់នឹងរឿងអាស្រូវ ជាប់សង្ស័យក្នុងអង្កេតមនុស្សឃាតដោយចេតនា កាលពីឆ្នាំ២០១២ សម្លាប់កីឡាករបាល់អោបរ៉ូប៊ី ពីសំណាក់ភ្នាក់ងារសន្តិសុខប្រធានាធិបតី។ បងប្អូនប្រុសពីរនាក់របស់លោក Mahinda Rajapakseដែលធ្លាប់មានតួនាទីខ្ពង់ខ្ពស់ កាលលោកMahinda Rajapakseជាប្រធានាធិបតី កំពុងរងការចោទប្រកាន់ពុករលួយ ក្នុងវិនិយោគដ៏សំខាន់មួយចិន។ ចិនដែលមានទំនាក់ទំនងល្អបំផុតជាមួយរដ្ឋាភិបាលលោក Mahinda Rajapakseខុសពីនាយករដ្ឋមន្ត្រីផុតអាណត្តិដែលនិយមលោកខាងលិច។ ក្នុងនាមជាប្រទេសមានទីតាំងយុទ្ធសាស្ត្រ “ចំដំណើរផ្លូវរបស់ចិនសម្រាប់ភ្ជាប់មកតំបន់ដើមបូព៌ានិងអឺរ៉ុប” ទំនាក់ទំនងជាមួយចិន ពិតជាមិនត្រូវបានមើលរំលងក្នុងថ្ងៃបោះឆ្នោតថ្ងៃនេះទេ។
កណ្តាប់ដៃប្រធានាធិបតីស្រីលង្កា
វត្តមានរបស់លោក Mahinda Rajapakse ក្នុងឆាកនយោបាយ ពិតណាស់ថានឹងធ្វើឱ្យនយោបាយ ស្រីលង្កា ដែលស្មុគស្មាញស្រាប់ កាន់តែស្មុគស្មាញបន្ថែមទៀត។ លោកប្រធានាធិបតីស៊ីរីនេហ្សា និងលោកMahinda Rajapakse ធ្លាប់ជ្រកក្រោមបក្សតែមួយ (ធ្លាប់ជារដ្ឋមន្ត្រីក្រសួងសុខាភិបាលរបស់លោកMahinda Rajapakse) មុននឹងក្លាយខ្លួនជាគូប្រជែងនឹងគ្នា។ ដូច្នេះលោក ស៊ីរីនេហ្សា ពិតជាមិនចង់ឃើញលោក Mahinda Rajapakse ត្រលប់មកវិញទេ ! លោកស៊ីរីនេហ្សា បានអំពាវនាវឱ្យគ្រប់គ្នារក្សាបដិវត្តឆ្នោតថ្ងៃទី ៨មករា ថ្ងៃដែលលោកបបានបោះឆ្នោតប្រធានាធិបតីស្រីលង្កា និងបានស្នើសុំឱ្យនាយករដ្ឋមន្ត្រីផុតអាណត្តិ បង្កើតរដ្ឋាភិបាលថ្មី ជាមួយបក្សតាមូល និងបក្សអ៊ីស្លាម។
ប្រសិនបើលោក Mahinda Rajapakse ពិតជាអាចទទួលបានសំឡេងគាំទ្រភាគច្រើនមែន នោះលោកប្រធានាធិបតី ស៊ីរីនេហ្សា គ្មានជម្រើសអ្វីក្រៅពីត្រូវតែងតាំងលោក Mahinda Rajapakseជានាយករដ្ឋមន្ត្រីឡើយ។ តែសំណួរនេះទំនងជាមិនអាចកើតមានទេ បើគេជឿទៅលើអ្នកវិភាគនិងអ្នកឯកទេស ដែលសំឡឹងឃើញថាលោក Mahinda Rajapakse នឹងមានងារត្រឹមជាប្រមុខបក្សប្រឆាំង ច្រើនជាង។ គ្មានបក្សណាមួយនឹងអាចទទួលសំឡេងភាគច្រើនដាច់ខាតទេ ! គេត្រូវធ្វើការជាមួយគណបក្សតូចៗផ្សេងទៀត។ ក្នុងន័យនេះ លោកMahinda Rajapakseពិតជាពិបាករកសម្ព័ន្ធមិត្ត សម្រាប់បង្កើតរដ្ឋាភិបាលចម្រុះណាស់។
លោកMahinda Rajapakseក៏ទំនងជាដឹងខ្លួនដែរ ប៉ុន្តែអ្វីដែលលោកត្រូវការបំផុត គឺអភ័យឯកសិទ្ធិសភាតែប៉ុណ្ណោះ ដើម្បីបានរួចខ្លួនពីការប្តឹងផ្តល់នៅតុលាការដែលភរិយា បងប្អូន និងកូនកំពុងជាប់វ័ន្តក ដូចសម្លកំពិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ