ប្រធានាធិបតីផុតអាណត្តិជួបបរាជ័យក្នុងការបោះឆ្នោតប្រធានាធិបតី
លោក Mahinda Rajapakse ប្រធានាធិបតីផុតអាណត្តិដែលបានគ្រប់គ្រងប្រទេសអស់ពីរអាណត្តិមកហើយ នៅថ្ងៃនេះបានទទួលស្គាល់បរាជ័យរបស់លោកនៅក្នុងការបោះឆ្នោតដែលរៀបចំនៅថ្ងៃព្រហស្បតិ៍ម្សិលមិញ។ បេក្ខជនប្រធានាធិបតីនៃបក្សប្រឆាំង លោកម៉ូស្រីប៉ាឡា ស៊ីរីនេហ្សា( Mothripala Sirinesa)ដែលជាអតីតរដ្ឋមន្រ្តីសុខាភិបាលរបស់រដ្ឋាភិបាលលោកRajapakse គឺជាអ្នកទទួលជ័យជំនេះដ៏ធំធេងនៅក្នុងការបោះឆ្នោត-នេះបើយោងតាមលទ្ធផលលើកដំបូងដែលត្រូវបានផ្សព្វផ្សាយនៅថ្ងៃសុក្រនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
យោងតាមលទ្ធផលលើកតំបូង គណកម្មការរៀបចំការបោះឆ្នោត បានប្រកាសថាលោក ម៉ូស្រីប៉ាឡា-ស៊ីរីនេហ្សា បេក្ខជនប្រធានាធិបតីខាងគណបក្សប្រឆាំង គឺជាអ្នកឈ្នះឆ្នោត។
ដោយលោក បានទទួលសំឡេងឆ្នោតគាំទ្ររហូតដល់៥៦, ៥% ទល់នឹង ៤២% សំឡេងឆ្នោតគាំទ្រខាងលោកប្រធានាធិបតីផុតអាណត្តិ។
ជ័យជំនេះរបស់លោក ម៉ូស្រីប៉ាឡា-ស៊ីរីនេហ្សា ដែលជាអតីតរដ្ឋមន្ត្រីក្រសួងសុខាភិបាលនៅក្នុងការបោះឆ្នោតកាលពីម្សិលមិញ គឺដោយសារលោក បានទទួលការគាំទ្រពីសហគមន៍ជនជាតិភាគតិច តាម៊ូល។ រីឯ លោកប្រធានាធិបតីផុតអាណត្តិ Mahinda Rajapaks វិញ ជាបេក្ខជន តំណាងសហគមន៍ Cinghalaise ដែលកាន់សាសនាព្រះពុទ្ធនិងមានភាគច្រើននៅក្នុងប្រទេស។
នៅនាឱកាសយុទ្ធនាការឃោសនាបោះឆ្នោតប្រធានាធិបតីស្រីលង្កាដ៏ប្រជែងគ្នាយ៉ាងសម្បើមនេះ លោកប្រធានាធិបតីផុតអាណត្តិ បានរងការចោទប្រកាន់ពីបទប្រព្រឹត្តអំពើពុករលួយ រួមទាំងបរាជ័យនៅក្នុងការផ្សះផ្សាជាតិក្រោមការដឹកនាំរបស់លោក។
សូមបញ្ជាក់ថា ក្រោយពីបានកាន់រដ្ឋអំណាចចំនួន១០ឆ្នាំរួចមក លោក Mahinda Rajapakse បានកែប្រែរដ្ឋធម្មនុញ្ញាក្នុងបំណងចង់ដណ្តើមគ្រប់គ្រងប្រទេសនៅក្នុងអាណត្តិទី៣ទៀត។
ក៏ប៉ុន្តែនៅចំពោះមុខបរាជ័យដ៏ធំធេងនេះ លោកប្រធានាធិបតីផុតអាណត្តិនៃប្រទេសស្រីលង្កា បានប្រកាសសន្យាថា លោកនឹងធានាធ្វើការផ្ទេរអំណាច ទៅអោយអ្នកបន្តវេនពីលោកដោយរលូន-នេះបើយោងតាមសេចក្តីរាយការណ៍របស់ទីភ្នាក់ងារបារាំង AFP៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ