ការរញ្ជួយដីដ៏ខ្លាំងកំរិត៦,៣អង្សា
នៅនូវែល-ហ្សេឡង់ ការរញ្ជួយដីបានបណ្តាលឱ្យមានអ្នករងគ្រោះជាច្រើន។ការរញ្ជួយដី កំរិត៦,៣អង្សាបានកើតមាននៅចម្ងាយ១០គីឡូម៉ែត្រពីទីក្រុង Christchurch នៅប៉ែកខាងត្បូងកោះ។ មានការខូចខាតខាងផ្នែកសម្ភារៈដ៏ច្រើននិងអ្នកត្រួវរបួសអាចមាន ចំនួនរាប់រយនាក់។ សភាពអាសន្នត្រូវបានប្រកាស នៅទីក្រុង Christchurch។
ចុះផ្សាយនៅថ្ងៃ៖ កែប្រែថ្ងៃទី៖
បទយកការណ៍របស់ Marie-Morgane LE MOEL ប្រែសម្រួលដោយវីនស្តុន រតនា
ការរញ្ជួយដីបានបំផ្លិចបំផ្លាញអគារជាច្រើនជាន់ នៅកណ្តាលក្រុង Christchurch។អ្នកក្រុងត្រូវជាប់កុនក្រោមកំទេចគំនរបាក់បែកហើយយានយន្តត្រូវបានកំចដោយកាកសំណល់បាក់បែក។វិសាលវិហារកាតូលិកដែលជានិមិត្តរូបមួយនៃទីក្រុងបានស្រុតរលំដោយអន្លើ។ រថយន្តគិលានសង្គ្រោះនៃទីក្រុងពុំមានចំនួនគ្រប់គ្រាន់ទេ ដើម្បីជម្លៀសគ្រប់តែអ្នកត្រូវរបួស។
មានការរញ្ជួយដីជាបន្តបន្ទាប់មកទៀតបានកើតមានពេញមួយថ្ងៃជាហេតុធ្វើឱ្យប្រតិបត្តិការជួយសង្គ្រោះកាន់តែប្រកបដោយគ្រោះថ្នាក់ថែមទៀត។ម្យ៉ាងទៀត មានករណីធ្លាយឩស្ម័ននិងអគ្គិភ័យ។លោកJohn Carter ជារដ្ឋមន្ត្រីក្រសួងកិច្ចការពារស៊ីវិលនៃប្រទេសនូវែល-ហ្សេឡង់បានថ្លែងថា “ យើងមានការប្រុងប្រយ័ត្នខ្លាំងណាស់។ប៉ូលិសដោយមានជំនួយពីកងទ័ពផង ជម្លៀសមនុស្សចេញពីកណ្តាលក្រុង ដើម្បីកុំឱ្យមាននរណាម្នាក់អាចទៅកាន់ទីនោះ” ។
ទីក្រុងChristchurch ធ្លាប់បានទទួលរងគ្រោះរញ្ជួយដីកាលពីខែកញ្ញាឆ្នាំទៅរួចមកហើយ។ការរញ្ជួយដីដែលបានកើតមាននៅពេលយប់ បានបណ្តាលឱ្យមានការខូចខាតខាងសម្ភារៈ ប៉ុន្តែគ្មានអ្នករងគ្រោះម្នាក់ទេ។នៅថ្ងៃអង្គារ២២កុម្ភៈនេះ ការរញ្ជួយដីបានកើតមាននៅពេលថ្ងៃ នៅពេលដែលកណ្តាលក្រុងកំពុងមានកិច្ចការបំពេញមមាញឹកខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ