ប្រធានាធិបតី ទី១ ជាភេទស្រី
ថ្ងៃនេះ នៅប្រទេសគៀរហ្ស៊ីស្តង់ មានប្រព្រឹត្តទៅពិធីជាផ្លូវការ ឡើងកាន់តំណែង នៃលោកស្រី Roza Otounbaieva ជាប្រធានាធិបតីសម័យអន្តរកាល សំរាប់មួយឆ្នាំកន្លះទៅមុខ រហូតដល់ថ្ងៃ៣១ធ្នូឆ្នាំ២០១១។ នេះជាលទ្ធផលនៃប្រជាមតិកាលពីមួយសប្តាហ៍មុន ដែលបានគាំទ្រដល់ឋានៈនេះរបស់លោកស្រី។ លោកស្រី ក៏ជាប្រមុខរដ្ឋាភិបាលបណ្តោះអាសន្នផងដែរ ទំរាំដល់ពេលបោះឆ្នោតសភានៅខែតុលាខាងមុខសភាដែលនឹងមានភារៈ ជ្រើសតាំងនាយករដ្ឋមន្ត្រីថ្មី និងរដ្ឋាភិបាលថ្មីពេញលក្ខណៈ។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
នេះជាករណីទី១ ដែលនៅគៀរហ្ស៊ីស្តង់ ក៏ដូចជានៅតាមសាធារណរដ្ឋ៤ទៀតនៃតំបន់អាស៊ីកណ្តាលកាន់សាសនាអ៊ីស្លាម មានប្រធានាធិបតីជាភេទស្រី។ ថ្លែងក្នុងពិធីទទួលសច្ចាប្រណិធានព្រឹកមិញ លោកស្រី Roza Otounbaieva ដោយផ្កាប់បាតដៃស្តាំលើក្រាំងរដ្ឋធម្មនុញ្ញ បានសន្យាថា នឹងគោរពតាមគោលការណ៍ប្រជាធិបតេយ្យខាងគ្រប់គ្រងប្រទេសជាតិ និងពង្រឹងសក្តានុពលសេដ្ឋកិច្ចរបស់គៀរហ្ស៊ីស្តង់។ លោកស្រីបានត្រូវគេប្រគល់ជូន គឺប័ណ្ណដែលមានរូបថតគាត់ និងចារឈ្មោះគាត់ជាប្រធានាធិបតី ព្រមទាំងបំពាក់ជូនគាត់នូវខ្សែកម្យ៉ាង ជានិមិត្តរូបសំគាល់អំណាចប្រធានាធិបតី និងប្រាកដណាស់គាត់បានទទួលគឺ ទង់ប្រធានាធិបតីតែម្ដង។
ស្របនឹងលទ្ធផលប្រជាមតិមួយសប្តាហ៍មុន ជាទីដែលបណ្តាជនម្ចាស់ឆ្នោតដល់ទៅជាង៩០% បានបញ្ចេញសំឡេងគាំទ្រដល់រដ្ឋធម្មនុញ្ញថ្មី លោកស្រីនឹងកាន់តំណែងជាប្រធានាធិបតីអន្តរកាល រហូតដល់ដំណាច់ឆ្នាំក្រោយ។ ហើយបន្ទាប់មក លោកស្រីលែងមានសិទ្ធិឈរឈ្មោះជាបេក្ខជន សំរាប់កាន់តំណែងជាប្រធានាធិបតីទៀតឡើយ។
មូលហេតុដែលបានញ៉ាំងឲ្យធ្វើប្រជាមតិនោះ គឺដើម្បីផ្ដល់នីត្យានុកូលកម្មដល់រដ្ឋាភិបាលបណ្តោះអាសន្ន ឲ្យមានលក្ខណៈស្របច្បាប់ទំរាំដល់ពេលបោះឆ្នោតសភានៅខែតុលាខាងមុខ សភាដែលនឹងមានភារៈជ្រើសតាំងនាយករដ្ឋមន្ត្រីថ្មី និងរដ្ឋាភិបាលថ្មីពេញលក្ខណៈ។
រដ្ឋាភិបាលបណ្ទោះអាសន្ននោះ បានត្រូវបង្កើតឡើង គឺក្រោយពីមានរលកបះបោរកាលពី ២ខែមុនផ្តួលរំលំទៅលោកប្រធានាធិបតីឈ្មោះ Bakiev ដែលបន្ទាប់មកបានភៀសខ្លួនទៅទទួលជម្រកនយោបាយ នៅប្រទេសបៀឡូរុស្ស៊ី។ លោក Bakiev ត្រូវរដ្ឋអំណាចថ្មី ចោទថាបានបញ្ជាឲ្យបាញ់សម្លាប់អ្នកបះបោរ កាលណោះស្លាប់អស់ដល់៨៤នាក់ និង របួសជិត៦០០នាក់។ ឥឡូវចោទនៅពីមុខលោកស្រីប្រធានាធិបតីថ្មី ក៏ទាំងភារកិច្ចស្ដារកសាងឡើងវិញ ទីរួមខេត្តពីរនៅប៉ែកខាងត្បូងប្រទេស គឺក្រុង Osh និង Djalal-Abad ដែលបានត្រូវបំផ្លាញអស់ពី៦០%ទៅ៧០% ដោយមកពីជម្លោះជាតិសាសន៍ និងដែលបានបណ្តាលឲ្យស្លាប់ គ្រាន់តែតាមតួលេខផ្លូវការ គឺអស់មនុស្សជាង ៣០០នាក់ឯណោះ។ សំរាប់ការ ស្តារកសាងឡើងវិញនេះ គឺត្រូរចំណាយប្រមាណ ១០០លានដុល្លារ ពីប្រាក់កម្ចី ៣០០លានដុល្លារ ទទួលបានពីរុស្ស៊ីកាលពីឆ្នាំមុន។
លោកស្រី Roza Otounbaieva នៅខែសីហាខាងមុខ នឹងមានអាយុគំរប់បាន ៦០ឆ្នាំ។ ទន្ទឹមនឹងភាសាជាតិKirghiz លោកស្រីក៏ចេះភាសា រុស្ស៊ី អង់គ្លេស អាល្លឺម៉ង់ បារាំង។ ខាងស្ថានភាពគ្រួសារ លោកស្រីបានលែងប្តី ដោយរស់នៅជាមួយកូន២នាក់ គឺ ស្រីម្នាក់ ប្រុសម្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ