អាហ្វហ្កានីស្ថាន៖ ឆមាសទី១ឆ្នាំ២០១៨ ស្លាប់ជនស៊ីវីល១៧០០នាក់ ដោយអំពើភេរវកម្ម
នៅអាហ្វហ្កានីស្ថាន ចំនួនមនុស្សស្លាប់ ក្នុងរវាងឆមាសទីមួយឆ្នាំ២០១៨នេះ បានកើនដល់ជិត១៧០០នាក់។តួលេខដែលបានផ្សាយជូន ដោយភ្នាក់ងាររបស់អង្គការសហប្រជាជាតិនេះ បានបង្ហាញថា នេះគឺជាចំនួនដ៏ច្រើនបំផុត ក្នុងរយៈពេល១០ឆ្នាំចុងក្រោយនេះ។ ក្រុមភេរវកម្មអ៊ីស្លាមជ្រុលនិយម ដែលមានដូចជា ក្រុមតាលីបង់ និងក្រុមជីហាតអង្គការរដ្ឋអ៊ីស្លាម គឺជាក្រុមដែលបានធ្វើសកម្មភាពវាយប្រហារ ភេរវកម្ម សម្លាប់ជីវិតជនស្លូតត្រង់អាហ្វហ្កានីស្ថាន សឹងតែរៀងរាល់ថ្ងៃ។ តែបន្ថែមពីនេះ ប្រតិបត្តិការរបស់កងទ័ពអាហ្វហ្កានីស្ថាន និងកងទ័ពអាមេរិក ក៏ជាមូលហេតុនៃការស្លាប់ មួយផ្នែកដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ជិត១៧០០នាក់! នេះគឺជាចំនួនប្រជាជនស៊ីវីល ដែលបានស្លាប់នៅអាហ្វហ្កានីស្ថាន ចន្លោះពីខែមករា ដល់ចុងខែមិថុនា ឆ្នាំ២០១៨នេះ ហើយដែលភាគច្រើន គឺស្លាប់ដោយហេតុការណ៍ភេរវកម្ម។ តួលេខនេះ ត្រូវបានស្រង់ស្ថិតិ ដោយក្រុមបេសកកម្មការងាររបស់អង្គការសហប្រជាជាតិ ប្រចាំអាហ្វហ្កានីស្ថាន។ ១០ឆ្នាំចុងក្រោយនេះ ចំនួនអ្នកស្លាប់ដែលជាជនស៊ីវីលអាហ្វហ្កានីស្ថាន មិនដែលមានខ្ពស់ដល់ម្លឹងទេ។ អំពើភេរវកម្មផ្ទួនៗ បង្កឡើងដោយក្រុមអ៊ីស្លាមជ្រុលនិយម អាល់កាយដា និងក្រុមជីហាតអង្គការរដ្ឋអ៊ីស្លាម បានកើនឡើង កាន់តែខ្លាំង នៅរវាងដើមឆ្នាំ២០១៨នេះ។
រដ្ឋធានីកាប៊ូល និងខេត្ត ណាន់ហ្កាហារ គឺជាទីតាំងដែលបានរងគ្រោះច្រើនជាងគេបំផុត។ ជាក់ស្តែង កាលពីថ្ងៃទី៣០មេសាកន្លងទៅ ភេរវកម្ម២ផ្ទួនគ្នា បានកើតឡើងនៅកណ្តាលក្រុងកាប៊ូល ដែលបានសម្លាប់មនុស្សសរុប ២៥នាក់ ក្នុងនោះមានអ្នកកាសែត៩នាក់ ដែលបានស្លាប់ ក្រោយទៅដល់កន្លែងកើតហេតុ ដើម្បីយកព័ត៌មាន ក្រោយផ្ទុះភេរវកម្មទី១។
ចំណែកនៅខេត្ត ណាន់ហ្កាហារ ភាគខាងកើតប្រទេសវិញ ចំនួនមនុស្សស្លាប់ ដែលជាប្រជាជនស្លូតត្រង់ បានកើនឡើង មួយទ្វេរជា២ ក្នុងរយៈពេល៦ខែចុងក្រោយនេះ ពោលគឺស្មើនឹងប្រមាណ១៦៩២នាក់។ ក្នុងនោះ ប្រមាណ៥២% ត្រូវស្លាប់ ដោយសារភេរវកម្ម បង្កឡើងដោយក្រុមជីហាតអង្គការរដ្ឋអ៊ីស្លាម។ ចំណែក ក្រុមតាលីបង់ គឺជាអ្នកទទួលខុសត្រូវលើការស្លាប់ទាំងនេះ ប្រមាណជា៤០%។
ដោយឡែក ក្រុមការងារអង្គការសហប្រជាជាតិ បានលើកឡើងថា សកម្មភាពវាយប្រហារតាមផ្លូវអាកាស របស់កងទ័ពអាហ្វហ្កានីស្ថាន និងកងទ័ពអាមេរិក ដែលកាន់តែញឹកញ៉ាប់ ក៏បានធ្វើឲ្យចំនួនមនុស្សស្លាប់កើនឡើងដែរ ដោយសារតែការទំលាក់គ្រាប់បែក។ ការវាយប្រហាររបស់កងទ័ពរដ្ឋាភិបាល ទៅលើទីតាំងក្រុមភេរវកម្ម ក៏ជំរុញឲ្យមានការសងសិកវិញ ពីសំណាក់ក្រុមទាំងនេះ កាន់តែខ្លាំង។
យោងតាមក្រុមការងារអង្គការសហប្រជាជាតិ ប្រចាំអាហ្វហ្កានីស្ថាន បានឲ្យដឹងផងដែរថា ការបោះឆ្នោតសភាដែលគ្រោងធ្វើនៅខែតុលាខាងមុខនេះ ក៏គឺជាមូលហេតុ ជំរុញឲ្យក្រុមភេរវកម្មអ៊ីស្លាមជ្រុលនិយម ធ្វើសកម្មភាពវាយប្រហារដែរ។ មនុស្សយ៉ាងហោចណាស់ ១១៧នាក់ បានស្លាប់ និងរបួសជាង២០០នាក់ នៅក្នុងហេតុការណ៍ភេរវកម្ម សំដៅមណ្ឌលចុះឈ្មោះបោះឆ្នោត។ ចំណែក សាលារៀន ក៏គឺជាគោលដៅនៃការវាយប្រហាររបស់ក្រុមភេរវកម្មដែរ។ គ្រាន់តែក្នុងរវាងខែមិថុនា នៅខេត្តណាន់ហ្កាហារ ក្រុមជីហាតអង្គការរដ្ឋអ៊ីស្លាម បានដាក់គ្រាប់បែកបំផ្ទុះកំទេចអាគារសាលារៀន ដល់ទៅ១៣កន្លែង និងបានគំរាមកំទេចសាលារៀនកុមារី និងសិស្សស្រីទូទាំងប្រទេសទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ