លោកឌុយទែរតឺ បដិសេធមិនសហការ នឹងការស៊ើបអង្កេតរឿងពុករលួយលើរូបលោកទេ
លោក ឌុយទែរតឺ ប្រធានាធិបតីហ្វីលីពីន ដែលកំពុងតែជាប់បណ្តឹងមួយ ស្តីពីអំពើពុករលួយ កិបកេងប្រាក់រដ្ឋនោះ បានប្រកាសឲ្យដឹងថា លោកនឹងមិនសហការ ជាមួយមន្ត្រីរបស់ការិយាល័យប្រឆាំងអំពើពុករលួយ ដែលស៊ើបអង្កេតក្នុងសំណុំរឿងនេះទេ។ គួរកត់សម្គាល់ថា ការប្រកាសនេះ គឺវាផ្ទុយស្រលះទាំងស្រុង ពីអ្វីដែល អ្នកនាំពាក្យលោកប្រធានាធិបតី បានអះអាង កាលពីសប្តាហ៍មុន ថា លោកឌុយទែរតឺ នឹងសហការ ហើយជឿទុកចិត្ត លើឯករាជ្យភាព របស់ការិយាល័យប្រឆាំងអំពើពុករលួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
កាលពីសប្តាហ៍មុននេះ ការិយាល័យប្រឆាំងអំពើពុករលួយហ្វីលីពីន បានប្រកាសឲ្យដឹងថា គេកំពុងតែបើកការស៊ើបអង្កេតលើសំណុំរឿងពុករលួយ ទាក់ទិននឹងទឹកប្រាក់រាប់លានដុល្លារអាមេរិក នៅក្នុងគណនីធនាគារ របស់លោកប្រធានាធិបតីឌុយទែរតឺ។ យោងតាមការចោទប្រកាន់ លោកឌុយទែរតឺ មិនបានប្រកាសពន្ធ និងមិនបានបញ្ជាក់ប្រភព ថាប្រាក់នេះ បានមកពីណាទេ។
ស្រាប់តែនៅល្ងាចថ្ងៃសៅរ៍ ទី៣០ កញ្ញា លោកឌុយទែរតឺ បានឆ្លើយទៅកាន់ការិយាល័យនេះថា លោកនឹងមិនសហការ ក្នុងការស៊ើបអង្កេតនេះទេ។ នៅក្នុងសំដីដែលសំបូរទៅដោយពាក្យដៀល ដ៏គ្រោធគ្រាត លោកឌុយទែរតឺ បាននិយាយថា ការិយាល័យប្រឆាំងអំពើពុករលួយនេះ គឺជាការិយាល័យភ្លឺភ្លើ គ្មានបានការ ហើយលោកមិនស្ថិតនៅក្រោមអំណាច នៃការិយាល័យនេះទេ។ លោកប្រធានាធិបតីមាត់ឆៅរូបនេះ បាននិយាយបន្ត ក្នុងន័យបញ្ចើចបញ្ចើរថា ប្រធានការិយាល័យនេះ គឺជាមនុស្សកុហក បោកប្រាស់ និងបានប្រឌិតភស្តុតាងយកមកសំអាង ដើម្បីបង្កាច់បង្ខូចរូបលោក។
ឆ្លើយតបទៅនឹងការចោទប្រកាន់ ទាក់ទិននឹងទឹកប្រាក់រាប់លានដុល្លារក្នុងគណនីធនាគារ លោក ឌុយទែរតឺ បានអះអាងថា គ្រួសារលោក មានទ្រព្យសម្បត្តិអចលនៈទ្រព្យខ្លះ ហើយនឹងមានជំនួញរោងចក្រធ្វើការ៉េម និងធ្វើស្ករគ្រាប់។ បូករួមផ្សំទាំងប្រាក់ដែលលោកបានខិតខំសន្សំផងនោះ គឺសរុបទាំងអស់ មានប្រមាណតែ ៤០លានប៉េសូ ពោលគឺមិនស្មើនឹង ៨សែនដុល្លារអាមេរិក ផងទេ។
សូមរំលឹកថា ពាក្យបណ្តឹងរឿងពុករលួយ លើរូបលោក ឌុយទែរតឺនេះ គឺលោក Antonio Trillanes ជាអ្នកផ្តួចផ្តើមឡើង កាលពីអំឡុងពេលឃោសនាបោះឆ្នោត ប្រធានាធិបតីហ្វីលីពីន។ លោកម្នាក់នេះ ជាសាមជិកព្រឹទ្ធសភា នឹងជាអ្នកប្រឆាំងរិះគន់ដ៏ខ្លាំងក្លាមួយរូប ទៅលើរូបលោកឌុយទែរតឺ។ យោងតាមដើមបណ្តឹងរូបនេះ លោក ឌុយទែរតឺ បានបង្វែរកិបកេងប្រាក់របស់រដ្ឋ រាប់លានដុល្លារ ក្នុងអំឡុងពេល ដែលគាត់នៅធ្វើជាចៅហ្វាយក្រុង ដាវ៉ោ ភាគខាងត្បូងហ្វីលីពីន។
គួរកត់សំគាល់ដែរថា ការដែលលោក ឌុយទែរតឺ ប្រកាសមិនព្រមសហការក្នុងការស៊ើបអង្កេតជាមួយការិយាល័យប្រឆាំងអំពើពុករលួយនេះ វាមិនមែនជារឿងគួរឲ្យភ្ញាក់ផ្អើលណាស់ណាទេ ព្រោះថាកាលពីសប្តាហ៍មុននេះ គាត់បានប្រកាសថាចង់បង្កើតគណកម្មការពិសេសមួយ ដើម្បីស៊ើបអង្កេតពីលើការិយាល័យនេះទៀតផង ព្រោះលោកជឿថា មានរឿងពុករលួយនៅខាងក្នុងនោះ។ ក្រៅពីការិយាល័យប្រឆាំងអំពើពុករលួយនេះ លោកឌុយទែរតឺ ក៏ធ្លាប់បានជេរគណកម្មការជាតិសិទ្ធិមនុស្ស និងតុលាការកំពូលរបស់ហ្វីលីពីនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ