សកម្មជនប្រជាធិបតេយ្យហុងកុង យកក្រណាត់ខ្មៅទៅរំរូបសំណាកផ្កា បូហ៊ីនា មុនពេល លោកស៊ី ជីនពីងមកដល់
សកម្មជនដើម្បីឯករាជ្យហុងកុង ជាង១០នាក់ បានចាប់ផ្តើមធ្វើសកម្មភាពតវ៉ា ដោយបានយកក្រណាត់ខ្មៅទៅរំ លើរូបសំណាកផ្កាបូហ៊ីនា ដែលជានិម្មិតរូប តំណាងឲ្យការត្រលប់របស់ហុងកុង មកក្នុងទឹកដីចិនវិញ។ សកម្មភាពនេះ បានធ្វើឡើង នៅប៉ុន្មានថ្ងៃ មុនពេលលោក ស៊ី ជីនពីង ប្រធានាធិបតីចិន នឹងអញ្ជើញមកដល់ហុងកុង ដើម្បីប្រារព្ធពិធីបុណ្យខួប២០ឆ្នាំ នៃការប្រគល់ហុងកុង មកឲ្យចិនគ្រប់គ្រងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ថ្ងៃទី ១ កក្កដា ឆ្នាំ១៩៩៧ អង់គ្លេស បានសម្រេចប្រគល់ដែនដីហុងកុង ទៅឲ្យចិនគ្រប់គ្រងវិញ។ ដើម្បីជាការអបអរ នៃការវិលត្រលប់របស់ហុងកុង មកក្នុងមហាគ្រួសារចិន រដ្ឋាភិបាលចិនដីគោកជំនាន់នោះ បានធ្វើអំណោយជារូបតំណាងផ្កាបូហ៊ីនា ឬផ្កាជើងគោ ដ៏ធំមួយពណ៌មាស តាំងនៅកណ្តាលក្រុងហុងកុង ក្នុងសង្កាត់វ៉ានឆៃ។ រូបតំណាងនេះ បានក្លាយជានិម្មិតរូប នៃការវិលត្រលប់របស់ហុងកុង មកក្នុងអំណាចគ្រប់គ្រងរបស់ចិនកុម្មុនីស្តិ។ លោក ស៊ី ជីនពីង នឹងអញ្ជើញមកដល់ នៅថ្ងៃព្រហស្បតិ៍ ដើម្បីប្រារព្ធខួប២០ឆ្នាំនេះ។
នៅព្រឹកថ្ងៃចន្ទទី២៦មិថុនានេះ សកម្មជនដើម្បីប្រជាធិបតេយ្យហុងកុង ជាង១០នាក់ ដឹកនាំដោយ លោក វង់ ចូឈួរ ដែលគេធ្លាប់ស្គាល់មុខ កាលពីមហាបាតុកម្មឆ័ត្រលឿង នៅឆ្នាំ២០១៤ បាននាំគ្នាយកក្រណាត់ខ្មៅ មួយផ្ទាំងធំ មករំគ្រប លើរូបតំណាងនិម្មិតរូបផ្កាបូហ៊ីនា។ មិនបានប៉ុន្មាននាទីក្រោយមកផង នគរបាលហុងហុង បានចុះមកទាញក្រណាត់ចេញ ហើយបានរុញច្រានក្រុមអ្នកតវ៉ា ឲ្យចេញពីទីនោះ។
ក្រុមសកម្មជនប្រជាធិបតេយ្យ បានស្រែកថា ដែនដីមួយរបបដឹកនាំពីរ គឺជារឿងកុហក់បោកប្រាស់ អស់២០ឆ្នាំមកហើយ។ ដោយឡែក យោងតាមលិខិតប្រកាស របស់គណបក្សលោក វង់ ចូឈួរ សកម្មភាពយកក្រណាត់ខ្មៅមករំរូបសំណាកនិម្មិតរូបនេះ គឺដើម្បីបង្ហាញពីការតវ៉ា ចំពោះការដែលរដ្ឋាភិបាលកុម្មនីស្តិប៉េកាំង បានប្រើអំណាចផ្តាច់ការកាន់តែខ្លាំងឡើងៗ មកលើដែនដីហុងកុង។
ក្នុងន័យនេះ សកម្មជនប្រជាធិបតេយ្យហុងកុង បានសង្កេតឃើញថា រដ្ឋាភិបាលប៉េកាំង កំពុងតែប្រើយុទ្ធសាស្ត្រ ចាក់បញ្ចូលមនោគមវិជ្ជាកុម្មុយនីស្ត តាមរយៈប្រព័ន្ធអប់រំ ប្រព័ន្ធផ្សព្វផ្សាយព័ត៌មានហុងកុង ហើយថែមទាំងបានរឹតបន្តឹងសិទ្ធិសេរីភាព ក្នុងការបញ្ចេញមតិ។
លោក វង់ ចូឈួរ បានឲ្យដឹងថា តាមការព្រមព្រៀងគ្នានៅឆ្នាំ១៩៩៧ ហុងកុងត្រូវតែជាដែនដីស្វ័យ័តម្ចាស់ការ ហើយហុងកុង ត្រូវតែមានសិទ្ធិ ធ្វើកំណែទម្រង់ ឈានទៅរកលទ្ធិប្រជាធិបតេយ្យពេញលេញ ជាក់ស្តែងកំណែទម្រង់ លើរបៀបបោះឆ្នោតតែងតាំងអភិបាលក្រុងហុងកុង ជាដើម ដែលរហូតមកដល់ពេលបច្ចុប្បន្ននេះ គឺគណបក្សកុម្មនីស្តិចិនប៉េកាំង ជាអ្នកចាត់តាំងមក។ សកម្មជនតវ៉ា បានទាមទារ ឲ្យរដ្ឋាភិបាលចិនប៉េកាំង គោរពសិទ្ធិជាម្ចាស់ការឯករាជ្យ របស់ប្រជាជនហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ