ស្រីលង្កា កំពុងឈានទៅរកវិបត្តិនយោបាយ ដណ្តើមអំណាចគ្នា?
ប្រទេសស្រីលង្កា កំពុងស្ថិតក្នុងស្ថានភាពមិននឹងនរផ្នែកនយោបាយ បន្ទាប់ពីមានការរុះរើតំណែង នាយករដ្ឋមន្ត្រី ដោយអត្តនោម័ត ពីសំណាក់លោកប្រធានាធិបតីស៊ីរីសាណា។ កាលពីថ្ងៃសុក្រទី២៦ លោកប្រធានាធិបតីរូបនេះ បានដកហូតតំណែងនាយករដ្ឋមន្ត្រីពីលោក វីក្រេម៉េស៊ីង្ហ ហើយបន្ទាប់មកទៀត នៅថ្ងៃសៅរ៍ទី២៧ ក៏បានសម្រេច ព្យួរសម័យប្រជុំសភាជាតិស្រីលង្កា រហូតដល់ពាក់កណ្តាលខែវិច្ឆិកា ដើម្បីរារាំង កុំឲ្យសភាតំណាងរាស្ត្រ ប្រជុំគ្នាស្តីពីបញ្ហាដកហូតតំណែងនាយករដ្ឋមន្ត្រីនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
តើស្រីលង្កា កំពុងឈានទៅមានវិបត្តិនយោបាយ ដណ្តើមអំណាចគ្នា ឬយ៉ាងណា? លោកប្រធានាធិបតី Sirisena បានសម្រេចដកហូតតំណែងនាយករដ្ឋមន្ត្រីពីលោក Ranil Wickremeshinghe ដើម្បីយកដំណែងនេះ ទៅឲ្យលោក Mahinda Rajapakse។ មួយថ្ងៃក្រោយមក លោក Wickremeshinghe បានទាមទារទៅរដ្ឋសភា ដែលគណបក្សលោកមានសម្លេងភាគច្រើននោះ ត្រូវប្រជុំបន្ទាន់ ដើម្បីដោះស្រាយបញ្ហានេះ ព្រោះ ការដកហូតដំណែងនេះ គឺជាការបំពានអំណាច ធ្វើខុសពីរដ្ឋធម្មនុញ្ញស្រីលង្កា ដែលបានហាមឃាត់ មិនឲ្យប្រធានាធិបតី មានសិទ្ធិដកតំណែងនាយករដ្ឋមន្ត្រីតាមចិត្តនឹកឃើញនោះទេ។ ស្រាប់តែនៅថ្ងៃសៅរ៍ទី២៧ តុលា លោកប្រធានាធិបតី Sirisena បានសម្រេចព្យួរសភាចោល បិទមិនឲ្យប្រជុំរហូតដល់ថ្ងៃ ទី១៦វិច្ឆិកា។
សូមរំលឹកថា លោក Rajapakse ធ្លាប់ធ្វើជាប្រធានាធិបតីស្រីលង្កា ចន្លោះពីឆ្នាំ២០០៥ ដល់២០១៥។ ក៏ប៉ុន្តែគណបក្សរបស់លោក Rajapakse បានប្រជែងចាញ់គណបក្សរបស់លោក Sirisena ក្នុងការបោះឆ្នោតប្រធានាធិបតី។ លោក Sirisana បានងាកទៅបង្កើតរដ្ឋាភិបាលចំរុះ ជាមួយលោក Wickremeshinghe ដោយប្រគល់តំណែងនាយករដ្ឋមន្ត្រី ឲ្យលោកម្នាក់នេះ។
ក៏ប៉ុន្តែ ជាង៣ឆ្នាំមកនេះ ទំនាក់ទំនង រវាងប្រធានាធិបតី និងនាយករដ្ឋមន្ត្រី មានភាពរកាំរកូសខ្លាំង ដោយសារតែមានការយល់ឃើញខុសគ្នា ក្នុងការកាច់ចង្កូតសេដ្ឋកិច្ច នយោបាយការបរទេស និងជាពិសេស នៅក្រោយពេលដែលលោកប្រធានាធិបតី Sirisana មានបំណង បន្តតំណែងប្រធានាធិបតីថែមមួយអាណត្តិទៀត។
លោកប្រធានាធិបតី Sirisana ធ្លាប់ត្រូវបានអ្នកវិភាគនយោបាយសម្លឹងឃើញថា មានទំនោរខិតទៅឥណ្ឌានឹងលោកខាងលិចខ្លាំង។ ប៉ុន្តែវាជាការគួរឲ្យភ្ជាក់ផ្អើលបំផុត ដែលលោក Sirisana បែរជាងាកមករកលោក Rajapakse ដែលគ្រប់គ្នាដឹងថា ជាអតីតប្រធានាធិបតីដែលស្និទនឹងចិនយ៉ាងខ្លាំង។ លោក Rajapakse ធ្លាប់ត្រូវគេចោទប្រកាន់ថាពុករលួយ ទទួលប្រាក់សូកប៉ាន់របស់ចិន ហើយថែមទាំងសម្លាប់បំបិទមាត់អ្នកប្រឆាំងទៀតផង។
បើតាមការចុះផ្សាយពីបណ្តាញព័ត៌មានជាច្រើន នៅថ្ងៃសៅរ៍ទី២៧តុលានេះ ក្រុមបក្សពួករបស់លោក Rajapakse បានចុះទៅតាមស្ថានីយ៍វិទ្យុនិងទូរទស្សន៍ ហើយបានគំរាម ឲ្យគេចុះផ្សាយបរិហារ លោកនាយករដ្ឋមន្ត្រីដែលត្រូវគេដកហូតតំណែង។ នៅតាមផ្លូវ ក្នុងរដ្ឋធានីកូឡុំបូ មានភាពស្ងាត់ជ្រងំ ដោយប្រជាជនភ័យខ្លាចការប្រទូស្តរាយដោយអាវុធ។ អង្គទូត សហរដ្ឋអាមេរិក និង សហភាពអឺរ៉ុប ប្រចាំនៅកូឡុំបូ បានអំពាវនាវ ឲ្យថ្នាក់ដឹកនាំនយោបាយស្រីលង្កា ចៀសវៀងកុំប្រើអំពើហឹង្សា ហើយត្រូវគោរពឲ្យបានខ្ជាប់ខ្ជួន ទៅតាមរដ្ឋធម្មនុញ្ញស្រីលង្កា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ