សង្រ្គាមពាណិជ្ជកម្ម៖ អត្រាពន្ធថ្មី ដែលចិនដំឡើងទៅលើផលិតផលអាមេរិក ចូលជាធរមាន
ចាប់ពីថ្ងៃសៅរ៍ ទី១មិថុនា រដ្ឋាភិបាលចិន បានចាប់ផ្តើម អនុវត្តអត្រាពន្ធថ្មី ដែលខ្លួនបានដំឡើងទៅលើផលិតផលនាំចូលរបស់អាមេរិក គិតជាទឹកប្រាក់សរុបប្រមាណ៦ម៉ឺនលានដុល្លារអាមេរិក។ ការដំឡើងពន្ធ ចន្លោះពី ១០ ទៅ ២៥% គឺជាវិធានការសងសឹក ដែលរដ្ឋាភិបាលចិន ចង់វាយតបទៅនឹងវិធនាការរបស់រដ្ឋាភិបាលអាមេរិក។ ជាងនេះទៀត វិបត្តិជុំវិញក្រុមហ៊ុន Huawei រិតតែធ្វើឲ្យមហាអំណាចទាំង២ មើលមុខគ្នាលែងត្រង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ចាប់ពីពេលនេះ ផលិតផលរបស់អាមេរិក ចំនួន ៥៤១០មុខ នឹងត្រូវដំឡើងពន្ធនាំចូល ដល់ ១០% ២០%និង២៥%។ វិធានការនេះ ត្រូវបានរដ្ឋាភិបាលចិន ដាក់ទៅលើផលិតផលអាមេរិក ដែលមានតម្លៃនាំចូលប្រចាំឆ្នាំ ប្រមាណជាង៦ម៉ឺនលានដុល្លារអាមេរិក។ ក្នុងនោះមានរាប់តាំងពីផលិតផលគ្រឿងសំអាង ឧបករណ៍ផ្ទះបាយ សម្ភារៈកីឡា ព្រមទាំងសម្ភារៈក្មេងលេងជាដើម។
គួរបញ្ជាក់ថា ជាមធ្យមប្រចាំឆ្នាំ ទំហំនៃការដោះដូរពាណិជ្ជកម្ម រវាងចិន និងអាមេរិក មានតម្លៃសរុប ប្រហែល ៣៦ម៉ឺនលានដុល្លារអាមេរិក។ ការសម្រេចដំឡើងពន្ធទៅលើផលិតផលអាមេរិក គឺជាវិធានការ ឆ្លើយតបទៅនិងការសម្រេចរបស់លោកដូណាល់ ត្រាំ ដែលបានដំឡើងពន្ធនាំចូល ខ្ពស់កប់ពពក ទៅលើផលិតផលិតចិន ប្រមាណ២០ម៉ឺនលានដុល្លារ ដែលនាំចូលទៅលក់នៅអាមេរិក។
គួរកត់សំគាល់ដែរថា ការចូលជាធរមាននៃអត្រាពន្ធដាថ្មីរបស់ចិននេះ គឺវាស្ថិតនៅក្នុងបរិបទសង្រ្គាមពាណិជ្ជកម្មមួយ ដ៏តាមតឹង រវាងអាមេរិក និងចិន ទាក់ទិននឹងក្រុមហ៊ុនHuawei។ កាលពីថ្ងៃសុក្រកន្លងទៅ រដ្ឋាភិបាលចិន បានសម្រេចបង្កើតបញ្ជីខ្មៅរបស់ខ្លួនមួយ ដើម្បីកត់ឈ្មោះក្រុមហ៊ុនបរទេសណា ដែលរកស៊ីមិនស្មោះជាមួយចិន ឬដែលមិនគួរឲ្យទុកចិត្ត។
លោក Andrew Polk អ្នកជំនាញសេដ្ឋកិច្ចនៅTrivium China បានលើកឡើងថា វាហួសពីច្បាស់ទៅទៀត ថាបញ្ជីខ្មៅ ដែលចិនទើបបង្កើតនេះ គឺជាអាវុធដែលចិនចង់ធ្វើបាបក្រុមហ៊ុនបច្ចេកវិទ្យាអាមេរិក ក៏ដូចជាក្រុមហ៊ុនបបច្ចេកវិទ្យាអឺរ៉ុប ជប៉ុន និងកូរ៉េខាងត្បូង ដែលបានដោះដៃចោលក្រុមហ៊ុន Huawei ដោយខ្លាចការសម្លុតរបស់អាមេរិក។ ក្នុងចំណោមក្រុមហ៊ុនទាំងនោះ គឺមានដូចជា Google Intel Qualcomm ARM ជាដើម។ តែយ៉ាងណា អ្នកវិភាគរូបនេះ យល់ឃើញថា បញ្ជីខ្មៅរបស់ចិន អាចជាអាវុធមុខ២ បែរមកមុតចិនខ្លួនឯងវិញ ព្រោះវាអាចចាប់បង្ខំឲ្យក្រុមហ៊ុនបរទេស ទាល់ច្រក និងត្រូវតែធ្វើការជ្រើសរើស រវាងអាមេរិក និងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ