រដ្ឋាភិបាលភូមា ចោទក្រុមឧទ្ទាមរ៉ូហ៊ីងយ៉ា ថាបានប្រើកុមារ ឲ្យធ្វើសកម្មភាពហិង្សា បង្កចលាចល
រដ្ឋាភិបាលភូមា តាមរយៈសេចក្តីប្រកាសរបស់ខុទ្ទកាល័យលោកស្រីទីប្រឹក្សារដ្ឋ អ៊ុងសាន សូជី បានធ្វើការចោទប្រកាន់ ទៅលើក្រុមឧទ្ទាមរ៉ូហ៊ីងយ៉ា ថាបានប្រើប្រាស់ កុមារ ឲ្យចេញធ្វើសកម្មភាពហិង្សា និងបង្កភាពចលាចល នៅក្នុងរដ្ឋរ៉ាឃីនភាគខាងលិច ភូមា។ តែយ៉ាងណា ក្រុមអង្គការសិទ្ធិមនុស្ស បានលើកឡើងថា ការចោទប្រកាន់នេះ អាចមិនឆ្លុះពីការពិតទាំងស្រុងទេ ព្រោះកងទ័ព និងនគរបាលភូមា ក៏បានធ្វើការដុតបំផ្លាញភូមិអ្នកស្រុក ជាច្រើនកន្លែងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ខុទ្ទកាល័យរបស់លោកស្រី អ៊ុងសាន ស៊ូជី ទីប្រឹក្សារដ្ឋរបស់ភូមា ទើបបានចេញសេចក្តីប្រកាសមួយ នៅលើទំព័រ Facebook របស់ខ្លួន ដោយបានធ្វើការចោទប្រកាន់ថា “ ក្រុមភេរវកម្មរ៉ូហ៊ីងយ៉ា បានបញ្ជារឲ្យកុមារ មកធ្វើសកម្មភាពវាយប្រហារលើកងកម្លាំងសមត្ថកិច្ច។ ពួកគេសុទ្ធតែ ជាក្មេងៗ ក្នុងភូមិ ប្រដាប់ដោយកាំបិត ដែលបានចេញធ្វើសកម្មភាពហិង្សា តាំងតែពីថ្ងៃសុក្រសប្តាហ៍កន្លងទៅ”។ សេចក្តីប្រកាសនោះបន្ថែមថា “ភូមិស្រុករបស់ជនជាតិភាគតិចផ្សេងទៀត ក៏ត្រូវបានក្រុមជនឧទ្ទាមរ៉ូហ៊ីងយ៉ា ដុតបំផ្លាញដែរ”។
តែយ៉ាងណា បទចោទប្រកាន់ពីសំណាក់រដ្ឋាភិបាលភូមានេះ ត្រូវបានក្រុមអង្គការការពារសិទ្ធិមនុស្សជាច្រើន លើកឡើងថាមិនត្រូវស្តាប់ហើយ ជឿទាំងស្រុងនោះទេ។ វាអាចជាការពិតខ្លះ ក៏ប៉ុន្តែ វាមិនស្តែងពីការពិតទាំងស្រុងនោះទេ។ អង្គការសិទ្ធិមនុស្សជាច្រើន បានលើកឡើង ពីសកម្មភាពហិង្សាកន្លងមក ដែលអាជ្ញាធរភូមា បានធ្វើទៅលើសហគមជនជាតិរ៉ូហ៊ីងយ៉ា ដូចជាការដុតកម្ទេចផ្ទះទាំងភូមិៗ ព្រមទាំងសកម្មភាពអមនុស្សធម៌ជាច្រើនផ្សេងទៀត។
ដោយឡែក ទំព័រTwitter របស់ក្រុមឧទ្ទាមរ៉ូហ៊ីងយ៉ា បានសរសេរថា នៅក្នុងពេលចុះទៅបង្រ្កាបក្រុមបះបោររ៉ូហ៊ីងយ៉ា អាជ្ញាធរភូមា បាននាំយកទៅជាមួយ នូវក្រុមមនុស្ស ដែលជាពួកព្រះពុទ្ធសាសនាជ្រុលនិយម។ គឺក្រុមនេះហើយ ដែលបានដុតផ្ទះសំបែង របស់អ្នកភូមិកាន់សាសនាអ៊ីស្លាម។
គួររំលឹកថា អំពើហិង្សា បានផ្ទុះឡើងសាជាថ្មី នៅតំបន់មួងដាវ ក្នុងរដ្ឋរ៉ាឃីន កាលពីចុងសប្តាហ៍កន្លងទៅ។ ក្នុងរយៈពេលបីថ្ងៃ មានមនុស្សស្លាប់យ៉ាងហោចណាស់ ៩២នាក់ ៨០នាក់ជាជនរ៉ូហ៊ីងយ៉ា និង១២នាក់ជាកងកម្លាំងសមត្ថកិច្ចភូមា។ ប្រជាជនរ៉ូហ៊ីងយ៉ា មានស្ត្រីនិងកុមារ រាប់ពាន់នាក់ បាននាំគ្នារត់ទៅសុំជ្រក នៅប្រទេសបង់ក្លាដែស។ តែកាលពីថ្ងៃអាទិត្យ ម្សិលមិញនេះ អាជ្ញាធរបង់ក្លាដែស បានបិទព្រំដែន ហើយបានចាប់បញ្ជូនពួកគេត្រលប់មកវិញ។
សូមបញ្ជាក់ថា ស្ថានភាពហិង្សា ការធ្វើទុក្ខបុកម្នេញពីសំណាក់សមត្ថកិច្ចភូមា ទៅលើជនជាតិរ៉ូហ៊ីងយ៉ា នៅរដ្ឋរ៉ាឃីន បានធ្វើឲ្យសហគមអន្តរជាតិព្រួយបារម្ភជាខ្លាំង។ គណៈកម្មការអន្តរជាតិពិសេសមួយ ផ្តួចផ្តើមឡើងដោយលោក កូហ្វ៊ី អាណាន់ បានអំពាវនាវឲ្យរដ្ឋាភិបាលភូមា ផ្តល់សិទ្ធិសេរីភាព និងការពារប្រជាជនរ៉ូហ៊ីងយ៉ា ឲ្យបានប្រសើរជាងនេះ ព្រោះអំពើហិង្សាទាំងនេះ នឹងរុញច្រានពួកគេ ឲ្យធ្លាក់ទៅក្នុងទ្រឹស្តីជ្រុលនិយមអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ