ឆ្នាំ២០១៨ ជប៉ុនបន្តែមថវិកាការពារជាតិ ដើម្បីទប់ទល់នឹងការគំរាមរបស់កូរ៉េខាងជើង
រដ្ឋាភិបាលជប៉ុន ទើបបានសម្រេចអនុម័តគំរោងថវិកាចំណាយ ក្នុងឆ្នាំ២០១៨ ដែលក្នុងនោះ គេសង្កេតឃើញថា កញ្ចប់ថវិកាចំណាយ ក្នុងវិស័យការពារជាតិ បានឡើងធំលើសឆ្នាំមុន ដល់ទៅ១,៣%។ ការបន្ថែមការចំណាយ កាន់តែច្រើនទៅៗ ក្នុងវិស័យការពារជាតិនេះ គឺជប៉ុន ចង់ត្រៀមខ្លួន ទប់ស្កាត់រាល់ការវាយប្រហារណាមួយ ពីសំណាក់ កូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:០៣
គណរដ្ឋមន្ត្រីជប៉ុន បានបោះឆ្នោតអនុម័តគំរោងចំណាយ ថវិការដ្ឋ ក្នុងឆ្នាំ២០១៨ ដែលមានទឹកប្រាក់សរុប ប្រមាណ៩៧៧០០ ពាន់លានយេន ដែលស្មើនឹង ៧៣០០០០លានអឺរ៉ូ។ ក្នុងចំណោមគំរោងចំណាយ គេសង្កេតឃើញថា ថវិកាចំណាយក្នុងវិស័យ ការពារជាតិ បានកើនឡើងខ្លាំង ពោលគឺចំនួនសរុប ៣៨៦ពាន់លានអឺរ៉ូ សម្រាប់ឆ្នាំ២០១៨ខាងមុខនេះ។
គួរកត់សម្គាល់ថា ថវិកាចំណាយក្នុងវិស័យការពារជាតិជប៉ុននេះ បានកើនឡើង ជាប់ជាប្រចាំ៦ឆ្នាំ ជាប់គ្នាមកហើយ ដែលនេះសបង្ហាញ ឲ្យឃើញអំពីចេតនារបស់រដ្ឋាភិបាលជប៉ុន ដែលផ្តល់សារៈសំខាន់ ដល់វិស័យការពារជាតិ។ ជាងនេះទៅទៀត ជាមួយនឹងការគំរាម ធ្វើសង្រ្គាម និងការបាញ់មីស៊ីល ហោះរំលងជប៉ុនជាញឹកញយ ពីសំណាក់កូរ៉េខាងជើង ជប៉ុនកាន់តែជំរុញពង្រឹងវិស័យការពារជាតិរបស់ខ្លួន ឲ្យកាន់តែរឹងមាំ។
តាមការឲ្យដឹង នៅក្នុងកញ្ចប់ថវិកាចំណាយ ក្នុងឆ្នាំ២០១៨ខាងមុខនេះ គឺផ្តោតសំខាន់ ទៅលើការចំណាយ ក្នុងការដាក់តាំងប្រព័ន្ធការពារគ្រាប់មីស៊ីលបាលីស្ទីក របស់កូរ៉េខាងជើង។ ក្នុងទិសដៅនេះ ជប៉ុននឹង ទិញប្រព័ន្ធខែលមីស៊ីលថ្មីមួយ (SM-3 Block IIA) ដែលអាចចាប់កំទេចមីស៊ីលពីចំងាយបាន។ បន្ថែមពីនេះ ជប៉ុនមានគំរោងធ្វើទំនើបកម្ម លើប្រព័ន្ធចាប់កំទេចគ្រាប់មីស៊ីល Patriot របស់ខ្លួន ទុកទប់ទល់ ក្នុងករណី មីស៊ីលមកដល់ជិតដីជប៉ុន។ ហើយជប៉ុន ក៏នឹងរៀបចំដំឡើងស្ថានីយ៍ប្រព័ន្ធរ៉ាដា (Aegis) ជាច្រើនកន្លែងផងដែរ។
ក្រៅពីគំរោងចំណាយ លើប្រព័ន្ធការពារ ជប៉ុន មានគំរោងចំណាយលើប្រព័ន្ធវាយប្រហារវិញ តាមរយៈការបញ្ជាទិញមីស៊ីលចំងាយមធ្យម ដែលអាចហោះទៅកំទេចទីតាំងយុទ្ធសាស្ត្រ របស់កូរ៉េខាងជើងបាន។ ការចំណាយទាំងអស់នេះ ត្រូវបានរដ្ឋាភិបាលជប៉ុនអះអាងថា គឺដើម្បីត្រៀមខ្លួន និងកំញើញតបទៅកូរ៉េខខាងជើងវិញ។
គួរកត់សម្គាល់ថា ឆ្នាំ២០១៧កន្លងទៅ ចំណូលថវិការរដ្ឋរបស់ជប៉ុន បានកើនឡើងច្រើន សរុបទាំងអស់ប្រមាណ៤៤ម៉ឺនលានអឺរ៉ូ។ ក្រៅពីបន្ថែមការចំណាយក្នុងវិស័យការពារជាតិ គំរោងចំណាយ មួយកញ្ចប់ធំផ្សេងទៀត គឺជប៉ុនប្រគល់ទៅឲ្យការស្ថាបនា ជួសជុល ហេដ្ឋារចនាសម្ព័ន្ធសាធារណៈ មានជាអាថទិ៍ ដើម្បីត្រៀមទទួលកីឡាអូឡាំពិកឆ្នាំ២០២០ ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ