ចិនដោះលែងសិល្បករ២នាក់ប្តីប្រពន្ធ ម្ចាស់គំនូររំលឹកវិញ្ញាណក្ខន្ធលោក លីវ សៀវប៉ូ
លោក ហ៊ូ ជាមីន អ្នកគំនូរជនជាតិចិន ជាមួយនិងភរិយាជនជាតិបារាំង បានបាត់ខ្លួន តាំងតែពីថ្ងៃ១៥ខែធ្នូ បន្ទាប់ពីអ្នកទាំងពីរ បានគូរគំនូរលើជញ្ជាំង មានខ្លឹមសារ រំលឹកដល់វិញ្ញាណក្ខន្ធ របស់លោកលីវ សៀវប៉ូ ជ័យលាភីណូបែលឆ្នាំ ២០១០។ ស្រាប់តែនៅថ្ងៃចន្ទ ទី២៥ធ្នូ នេះ អ្នកទាំងពីរនេះ បានលេចមុខមកប្រកាស ថាខ្លួនត្រូវបានអាជ្ញាធរចិនដោះលែងចេញមកវិញហើយ ហើយកំពុងតែរៀបចំចេញដំណើរ ត្រលប់មកប្រទេសបារាំងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
លោក ហ៊ូ ជាមីន (Hu Jiamin) បានសរសេរសារ នៅលើបណ្តាញសង្គម ថា លោកនិងភរិយាជនជាតិបារាំង ឈ្មោះ Marine Brossard ត្រូវបានគេដោះលែងមកវិញហើយ ហើយបច្ចុប្បន្នពួកគេទាំងពីរ កំពុងស្ថិតនៅក្នុងស្រុកកំណើតរបស់លោកហ៊ូ ជាមីន។ តែយ៉ាងណា នៅក្នុងសារ ជាភាសាអង់គ្លេសនេះ លោក ហ៊ូ ជាមីន លោកមិនបានបញ្ជាក់ ពីមូលហេតុដែលបណ្តាលឲ្យអាជ្ញាធរចិន ចាប់ឃាត់ខ្លួនលោក និងភរិយាទេ។
បើតាមការចុះផ្សាយ របស់សារព័ត៌មានហុងកុង Ming Pao បានឲ្យដឹងថា លោកហ៊ូ ជាមីន និងភរិយា ដែលរស់នៅទីក្រុងលីយ៉ុង ប្រទេសបារាំងនោះ បានធ្វើដំណើរទៅប្រទេសចិន នៅក្រុង Shenzhen កាលពីដើមខែធ្នូ ដើម្បីបើកសម្ភោធពិព័ណ៌ស្នាដៃសិល្បៈ និងស្ថាបត្យកម្មនៅទីនោះ។ ក្នុងពិពណ៌នោះ លោក ហ៊ូ ជាមីន និងភរិយា បានគូរគំនូរមួយផ្ទាំងធំលើជញ្ជាំង ដែលក្នុងរូបនេះ គេឃើញមានរូប កៅអីតែមួយ គ្មានមនុស្សអង្គុយ នៅចំពោះមុខរនាំងដែក ប្រៀបបាននឹងរនាំងគុក ហើយនៅពីក្រោយ គឺជារូបទេសភាពប្រទេសចិន បែបបូរាណ។
តាមការផ្សាយរបស់កាសែតនេះ អ្នកទាំងពីរ ត្រូវបានអាជ្ញាធរចាប់ឃាត់ខ្លួន នៅថ្ងៃទី ១៥ធ្នូ បន្ទាប់ពីបានមើលឃើញរូបគំនូរនេះ មានខ្លឹមសារ រំលឹកទៅដល់ វិញ្ញាណក្ខន្ធលោក លីវ សៀវប៉ូ ជ័យលាភីពានរង្វាន់ណូបែលសន្តិភាព ឆ្នាំ២០១០។ កៅអីទទេគ្មានមនុស្សអង្គុយ គឺតំណាងឲ្យកៅអីលោកលីវ សៀវប៉ូ នៅក្នុងពិធីប្រគល់ពានរង្វាន់ណូបែល ដែលលោកមិនអាចទៅទទួលបាន ដោយសារតែលោកត្រូវជាប់ឃុំក្នុងប្រទេសចិន។
សូមរំលឹកថា លោកលីវ សៀវប៉ូ គឺជាសាស្ត្រាចារ្យ ជាអ្នកនិពន្ធ និងជាសកម្មជនទាមទារលិទ្ធិប្រជាធិបតេយ្យ ដែលត្រូវអាជ្ញាធរចិន ចាប់ដាក់ឃុំរយៈពេល៨ឆ្នាំ មុននឹងស្លាប់ដោយជំងឺមហារីក កាលពីខែកក្កដា កន្លងទៅនេះ។ ចំណែកភរិយាលោកលីវ សៀវប៉ូ ថ្វីបើមិនត្រូវជាប់ឃុំ តែលោកស្រីត្រូវអាជ្ញាធរចិន បង្ខំឲ្យនៅតែក្នុងផ្ទះ និងមិនឲ្យធ្វើសកម្មភាព មានទំនាក់ទំនងជាមួយសកម្មជនប្រជាធិបតេយ្យ ឬអ្នកសារព័ត៌មានបរទេសណាទាំងអស់។
ការចាប់ខ្លួន ហើយដោះលែង សិល្បករគំនូរទាំងពីរនាក់ប្តីប្រពន្ធ នាពេលនេះ បានបង្ហាញឲ្យឃើញថា សំណុំរឿងលោក លីវ សៀវប៉ូ ត្រូវបានអាជ្ញាធរចិន បិទខ្ទប់ ហើយមិនចង់ឲ្យនរណាសម្តែងមតិ ឬរំលឹកអ្វីទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ