rfi

កំពុងផ្សាយ
  • ផ្សាយផ្ទាល់
  • នាទីព័ត៌មាន
  • RFI ជាភាសាបារាំង
ព្រឹត្តិការណ៍អន្តរជាតិប្រចាំថ្ងៃ
rss itunes

កូរ៉េខាង​ជើង​បាញ់​មីស៊ីល​​២គ្រាប់ ខណៈ​លោក​ត្រាំ​ទទួល​បាន​សំបុត្រ​ពី គីម ជុងអ៊ុន

ដោយ ម៉ម ពិសី

លោកដូណាល់ ត្រាំ បានប្រកាសនៅមុខអ្នកកាសែត កាលពីថ្ងៃសុក្រ ទី​៩សីហា ថា​លោក​បាន​ទទួលសំបុត្រមួយច្បាប់ ពីមេដឹកនាំកូរ៉េខាងជើង គីម ជុងអ៊ុន។ លោក​ប្រធានាធិបតីអាមេរិក អះអាងថា សំបុត្រនោះ មានខ្លឹមសារប្រកបដោយភាព​សុទិដ្ឋិនិយម ដែលធ្វើឲ្យលោក​សប្បាយចិត្តជាខ្លាំង។ តែយ៉ាងណា ប៉ុន្មានម៉ោង ក្រោយការ​​ប្រកាស​នេះ កូរ៉េខាងជើង បានបាញ់​មីស៊ីល​២គ្រាប់ទៀត ដែលនេះគឺជាលើក​​ទី៥​ហើយ​ ក្នុងរវាងមិនដល់២សប្តាហ៍ផង។ គួរកត់សំគាល់ផងដែរថា ក្នុងអំឡុងពេល​នេះ កងទ័ព​​កូរ៉េ​​ខាងត្បូង និងអាមេរិក កំពុងតែធ្វើសមយុទ្ធយោធារួមគ្នា។

មីស៊ីលរយៈចម្ងាយខ្លី២គ្រាប់

ក្នុងអំឡុងពេល ដែលកងទ័ពកូរ៉េខាងត្បូង កំពុងធ្វើសមយុទ្ធយោធារួមគ្នា ជាមួយ​កងទ័ពអាមេរិក កូរ៉េខាងជើងឯណោះ ទើបតែបាន​បាញ់មីស៊ីលចំនួន​២គ្រាប់ថ្មីទៀត។ នេះគឺការបាញ់មីស៊ីល លើកទី​៥ហើយពិសី ក្នុងរវាង២សប្តាហ៍ចុងក្រោយនេះ។ ការបាញ់លើក​ទី៥​នេះ គឺមានចំនួន​២គ្រាប់ ដែលបានធ្វើឡើង នៅវេលាទៀបភ្លឺ ថ្ងៃសៅរ៍ទី​១០សីហា បាញ់ចេញពី​ស្ថានីយ៍Hamhung ភាគខាងជើងឈាងខាងកើត កូរ៉េខាងជើង។

បើតាមអះអាង របស់កងទ័ពកូរ៉េខាងត្បូង ដែលតាមដានស្ថានការណ៍នេះ បានឲ្យដឹងថា គ្រាប់មីស៊ីលទាំង២គ្រាប់ថ្មីនេះ បានហោះបានចំងាយ ប្រមាណ​ជា​៤០០គីឡូម៉ែត្រ មុននឹងធ្លាក់ចូលទៅក្នុងសមុទ្រជប៉ុន។ ដូច្នេះ តាមការប៉ាន់ស្មាន មីស៊ីលទាំងនេះ គឺជាមីស៊ីលរយៈចំងាយខ្លី របស់កូរ៉េខាងជើង។

គិតមកត្រឹមពេលនេះ រដ្ឋាភិបាលអាមេរិក មិនបាន​និយាយអ្វីទាំងអស់។ អ្នកកាសែតបារាំង AFP បានព្យាយាមជជីកសួរ ពីប្រតិកម្មរបស់សេតវិមានអាមេរិក តែតំណាងរដ្ឋាភិបាល​អាមេរិក បានត្រឹមតែឆ្លើយថា គេកំពុងតាមដាន​ស្ថានការណ៍ ដោយការការសហការ​យ៉ាងល្អ ជាមួយ​កូរ៉េខាងត្បូង និងជប៉ុន។

អាមេរិក ហាក់ដូចជាលែងថ្កោលទោស ការបាញ់មីស៊ីលរបស់កូរ៉េខាងជើង

បើតាមការសង្កេត រដ្ឋាភិបាលអាមេរិក​ ហាក់លែងចង់មានប្រតិកម្ម​រិះគន់កូរ៉េខាងជើងទៀតហើយ ទាក់ទិននឹងការបាញ់មីស៊ីល ម្តងហើយម្តងទៀតនេះ។ មូលហេតុនោះ គឺថារដ្ឋាភិបាលរបស់លោកដូណាល់ ត្រាំ មានបំណងស្រង់យកតែចំណុចល្អ នៃទំនាក់ទំនងល្អូកល្អឺន រវាងលោកដូណាល់ ត្រាំ នឹងគីមជុងអ៊ុន។

បើតាមការសង្កេត ភាពល្អូនល្អឺន រវាងមេដឹកនាំទាំង២នេះ ត្រូវបាន​សេតវិមានអាមេរិក​ ប្រឹងយកមកផ្សាយ​អំពីជោគជ័យ នៃនយោបាយ​ការបរទេសរបស់ លោកដូណាល់ ត្រាំ ជុំវិញសំណុំរឿងកូរ៉េខាងជើង។ តែការពិតជាក់ស្តែង ដូចភារៈ ឃើញហើយ ថាសំណុំរឿង​នុយក្លេអ៊ែរ កូរ៉េខាងជើងនេះ នៅជាប់គាំង នៅមិនទាន់មានអ្វី​ ដែលគេ​បានដោះស្រាយទៅ​មុខ​ឡើយ ហើយកូរ៉េខាងជើង ក៏នៅតែបន្តបាញ់ផ្លោងមីស៊ីលទៀត។

ខុសពីលើកមុនៗ ការបាញ់មីស៊ីលរបស់កូរ៉េខាងជើង ហាក់លែងធ្វើឲ្យអាមេរិក ក្តៅក្រហាយទៀតហើយ។​ ផ្ទុយទៅវិញរដ្ឋាភិបាល​លោកត្រាំ អះអាងថា មិនអីទេ មិនមានបញ្ហាចោទទេ។ ជាក់ស្តែង លោក Mike Pompeo រដ្ឋមន្ត្រីការបរទេសអាមេរិក អះអាងថា ការដែលកូរ៉េខាងជើង បាញ់មីស៊ីលប៉ុន្មានគ្រាប់ចុងក្រោយនេះ នឹងមិនប៉ះពាល់ ដល់ការចរចា រឿងកម្មវិធីនុយក្លេអ៊ែរទេ។

សំបុត្រផ្អែមល្ហែម របស់គីម ជុងអ៊ុន ផ្ញើទៅ​លោកដូណាល់ ត្រាំ

ប៉ុន្មានម៉ោង​ មុន​នឹង​កូរ៉េខាងជើងបាញ់មីស៊ីល កាលពីរសៀលថ្ងៃសុក្រ នៅក្រុងវ៉ាស៊ីនតោន​ឯណោះ នៅចំពោះមុខអ្នកកាសែត លោកដូណាល់ ត្រាំ បានបញ្ជាក់ថា លោក​បាន​ទទួល​​សំបុត្រមួយច្បាប់ទៀត របស់មេដឹកនាំកូរ៉េខាងជើង គីម ជុងអ៊ុន។ លោក​ថា សំបុត្រនោះមាន​ចំនួន​៣សន្លឹក ហើយមានខ្លឹមសារ ប្រកបដោយសុទិដ្ឋិយមខ្លាំងណាស់ តាំងពីក្បាលដំបូង រហូតដល់បន្ទាត់ចុងក្រោយ។ លោកដូណាល់ ត្រាំ បានបន្ថែមទៀតថា លោកជឿថា នឹងមានជំនួបកំពូល ជាថ្មីម្តងទៀត រវាងលោក និង គីម ជុងអ៊ុន។

ឆ្លើយតបទៅនឹងសំនួរ ដែលអ្នកកាសែតសួរថា សំបុត្រនោះសរសេរពីអ្វីខ្លះ លោក ដូណាល់ ត្រាំ បាន​បញ្ជាក់ថា សំបុត្រនោះ គឺ គីម ជុងអ៊ុន សរសេរប្រាប់ពី​មូលហេតុ ដែលកូរ៉េខាងជើង បានសម្រេចចិត្ត បាញ់មីស៊ីល​ប្រមាណ​ជា៤ដង ក្នុងរវាងប្រមាណ​២សប្តាហ៍ចុងក្រោយនេះ។ គីម ជុងអ៊ុនសរសេរថា តាមពិតទៅ កូរ៉េខាងជើងផ្ទាល់ ក៏មិនចង់បាញ់មីស៊ីលដែរ តែខ្លួនគ្មានជំរើសអ្វីផ្សេង ដើម្បីសំដែងការមិនពេញចិត្ត ចំពោះសមយុទ្ធយោធារវាងកងទ័ព អាមេរិក និងកងទ័ពកូរ៉េខាងត្បូងទេ។ សម្រាប់កូរ៉េខាងជើង សមយុទ្ធយោធារួមគ្នា របស់អាមេរិក និងកូរ៉េខាងត្បូង គឺជាការ ហាត់សមប្រុងប្រៀប និងគំរាម​ចូលទៅ​វាយ​កូរ៉េខាងជើង។

លោកដូណាល់ ត្រាំ៖  “ខ្ញុំក៏មិនពេញចិត្តនឹងការធ្វើសមយុទ្ធយោធានេះដែរ!”

ទាក់ទិននឹងការធ្វើសមយុទ្ធយោធា រវាងកងទ័ព​កូរ៉េខាងត្បូង និងកងទ័ពអាមេរិក ដែលជាមូលហេតុលើកឡើង ដោយ​គីម ជុងអ៊ុននេះ លោកដូណាល់ ត្រាំ បានអះអាងថា លោកក៏មិនពេញចិត្ត នឹងសមយុទ្ធយោធានេះដែរ។ លោកត្រាំ ថាមូលហេតុនោះ គឺ លោកមិនចូលចិត្តចំណាយ​ប្រាក់ឥតប្រយោជន៍។ លោកថា សមយុទ្ធយោធានេះ មិនត្រឹមតែ​ចាយ​លុយ​ច្រើន​សន្ធឹកសន្ធាប់ប៉ុណ្ណោះទេ តែវាបានចូលរួម​បង្កបញ្ហា ឲ្យកាន់តែតានតឹងថែមទៀតផង នៅឯឧបទ្វីបកូរ៉េ។

សម្តីរបស់លោកដូណាល់ ត្រាំ ដែលថា គាត់ក៏មិនពេញចិត្តនឹងសមយុទ្ធយោធានេះដែរ គឺមានន័យថា គាត់គិតដូចគីម ជុងអ៊ុន ហើយការពារហេតុផលរបស់គីម ជុងអ៊ុន ដែលជាមេដឹកនាំផ្តាច់ការកូរ៉េខាងជើង ហើយដែលជាសត្រូវរបស់សហរដ្ឋអាមេរិក។ វាហាក់ មាន​ន័យ​ថា លោកប្រធានាធិបតីអាមេរិក កំពុងតែកាន់ជើងសត្រូវ ហើយងាក​មក​ខោកក្បាលកូរ៉េ​ខាងត្បូង ដែលជាសម្ព័ន្ធមិត្តខ្លួន។ មិនត្រឹមប៉ុណ្ណោះទេ លោកដូណាល់ ត្រាំ បាននិយាយ​ទៀតថា សមយុទ្ធយោធានេះចំណាយលុយច្រើនណាស់ ហើយគាត់ចង់ឲ្យ​កូរ៉េខាងត្បូងសងលុយថ្លៃចំណាយ​នេះ។ គោលជំហរបែបនេះ មិនដែលមាន​ប្រធានាធិបតីអាមេរិកណា ធ្វើទេពីមុនមក។

ស្នៀតស្ទូចត្រីឥតនុយ

លោក Vipin Narang សាស្ត្រាចារ្យ នៅ​វិទ្យាស្ថានបច្ចេកវិទ្យាម៉ាសាជូសេត (Massachusetts​ Institute of Technology) បានលើកឡើងថា គីម ជុងអ៊ុន កំពុងតែបោក លោក​ដូណាល់ ត្រាំប្រើ​។ គីម ជុងអ៊ុន​ ដឹងពីចំណុចខ្សោយ បែបស៊ីជោរ របស់លោក​ដូណាល់ ត្រាំ។ ហើយជាងនេះទៀត គីម ជុងអ៊ុន ក៏ដឹងថា លោកដូណាល់ ត្រាំ ត្រូវការ​ជោគជ័យ​ខ្លះ ក្នុងវិស័យការបរទេស ដើម្បីយកទៅអួត ប្រមូលយកសម្លេងឆ្នោតសម្រាប់​យក​ឈ្នះ​​អាណត្តិថ្មី។​

គីម ជុងអ៊ុន ដឹងថា លោកដូណាល់ ត្រាំ ជាមនុស្សគ្មានគោលការច្បាស់លាស់ទេ ត្រូវស្រលាញ់ៗ​ ត្រូវស្អប់ៗ។ សម្រាប់ពេលនេះ គ្មាននរណាដឹងទេ ថាកូរ៉េខាងជើង បានផ្អាកកម្ម​វិធី​នុយក្លេអ៊ែរ ពិត​មែនឬក៏អត់។ តែយ៉ាងណាក្នុងអំឡុងពេលដដែលនេះ មេដឹកនាំកូរ៉េ​ខាងជើង គីម ជុងអ៊ុន កំពុងតែក្លាយខ្លួន​ជាមិត្ត របស់លោក​ប្រធានាធិបតីអាមេរិក។ ទោះកូរ៉េខាងជើងបាញ់មីស៊ីលប៉ុន្មានគ្រាប់ទៀត ក៏ប្រហែលជាលោកដូណាល់ ត្រាំ ថា មិនអីដែរ៕

Brexit៖សហភាពអឺរ៉ុប និងអង់គ្លេសចាត់ទុកកិច្ចព្រមព្រៀងថ្មីមានយុត្តិធម៌ និងមានតុល្យភាព

ប្រមុខ​ដឹកនាំហុងកុង ខកខាន​មិន​បាន​ថ្លែង​គោលនយោបាយ​ប្រចាំឆ្នាំ ​នៅ​ចំពោះ​មុខ​សភា​

Unicef៖មានកូនក្មេងម្នាក់ក្នុងចំណោម ៣នាក់ជួបបញ្ហាកង្វះអាហារូបត្ថម្ភ

ក្រុម​យុទ្ធជន​​គួឌីស្ថាន​ស៊ីរី​​ចុះកិច្ចព្រមព្រៀង​ជាមួយ​រដ្ឋាភិបាល​ដាម៉ាស ដើម្បី​ទប់ទល់​នឹង​តួកគី

អេក្វាទ័រ៖ក្រោយផ្ទុះវិបត្តិសង្គមអស់ ១១ថ្ងៃ ប្រធានាធិបតី និងសហគមន៍ជនជាតិដើមម្ចាស់ស្រុកយល់ព្រមចូលតុចរចា

តួកគី​បន្ត​ការ​វាយលុក​នៅស៊ីរី​ ទោះបី​រង​សម្ពាធ​ទណ្ឌកម្ម​ច្រើនឡើង​​ពី​អាមេរិក​

នាយករដ្ឋ​មន្ត្រី​អេត្យូពី Abiy Ahmed ជាជ័យ​លាភី​ណូបែល​សន្តិភាព​២០១៩

តួកគី​រង​ការ​រិះគន់​ជុំទិស ទាក់ទង​នឹង​ការវាយប្រហារ​ទៅលើ​ទីតាំង​គួឌីស្ថាន​នៅ​ស៊ីរី

ស្វែង​រក​លុយ​ចំនួន ១៤ ០០០លានដុល្លារ​ដើម្បី​បន្ត​យុទ្ធនាការ​ប្រយុទ្ធប្រឆាំងនឹងជំងឺស៊ីដា ជំងឺរបេង និងជំងឺគ្រុនចាញ់

សង្គ្រាម​ពាណិជ្ជកម្ម៖ លោក ត្រាំ ថាចង់​បាន​កិច្ចព្រមព្រៀង​រួម​គ្រប់​វិស័យ​ជាមួយចិន ​

ការវាយប្រហារ​នៅ​ទីស្នាក់ការ​ប៉ូលិស​ក្រុង​ប៉ារីស រំលេច​ឱ្យ​ឃើញ​ពីចន្លោះប្រហោង​នៃចារកិច្ចបារាំង

បាតុកម្ម ៥ថ្ងៃ ដែល​សម្លាប់​ជនជាតិ​អ៊ីរ៉ាក់ ជិត​១០០នាក់ និង​របួស ជាង ៤ពាន់នាក់

ហុងកុង៖ បាតុកម្ម​កាន់តែ​ហិង្សា​ឡើង ក្រោយ​អាជ្ញាធរ​ហុងកុង​ចេញ​ច្បាប់​ថ្មី ហាម​​មិន​ឱ្យ​ពាក់​ម៉ាស់​បិទមុខ​ធ្វើ​បាតុកម្ម​

លោកដូណាល់ ត្រាំ​ស្នើសុំ​ជាចំហ ឲ្យ​ចិន​ស៊ើបអង្កេត​កូនប្រុស​​លោក Joe Biden

អ៊ីរ៉ាក់៖មូលហេតុដែលបានបញ្ឆេះកំហឹងប្រជាជនឲ្យចុះផ្លូវធ្វើបាតុកម្មប្រឆាំងរដ្ឋាភិបាល

Brexit: នាយករដ្ឋមន្ត្រី​អង់គ្លេស ចង់ដាក់​សំណើ​ថ្មីបែង​ចែក​«ព្រំដែនពីរ»​រវាង​អង់គ្លេស​និង​អៀរឡង់​

ចិនបានបង្ហាញមហិទ្ធិឫទ្ធិប្រាប់ពិភពលោកនៅក្នុងខួប ៧០ឆ្នាំនៃការបង្កើតសាធារណរដ្ឋប្រជាមានិតចិន

មរណភាព​របស់លោកហ្សាក់ ស្ហៀរ៉ាក់៖ ហេតុអ្វី​អាមេរិក​យឺតយ៉ាវ​ចេញសេចក្តីថ្លែងការ​រំលែកទុក្ខ?

បារាំង ៖ អគ្គីភ័យ​នៅរោងចក្រ​គីមី​កំពុង​បំផុស​ក្តី​បារម្ភ​ចំពោះ​សុខភាព​និង​បរិស្ថាន

អាហ្វហ្កានីស្ថាន៖ការរៀបចំបោះឆ្នោតប្រធានាធិបតីពោរពេញដោយហានិភ័យ និងការភ័យខ្លាច