កូរ៉េខាងជើងធ្វើសមយុទ្ធ ខណៈនាវាមុជទឹកអាមេរិក ទៅដល់កូរ៉េខាងត្បូង
ចុះផ្សាយនៅថ្ងៃ៖
ស្តាប់ - ០៦:១០
ស្ថានភាពតានតឹង នៅតំបន់ឧបទ្វីបកូរ៉េ នៅមិនទាន់វិលទៅរកភាពប្រក្រតីនៅឡើយទេ។ បើតាមការចុះផ្សាយរបស់បណ្តាញព័ត៌មានកូរ៉េខាងត្បូង បានឲ្យដឹងថា នៅថ្ងៃអង្គារទី២៥មេសា នេះ របបផ្តាច់ការកូរ៉េខាងជើង បានរៀបចំពិធីរំលឹកខួប៨៥ឆ្នាំ នៃការកកើតកងទ័ពបដិវដ្តកូរ៉េខាងជើង ដោយមានធ្វើសមយុទ្ធយោធា បាញ់គ្រាប់កាំភ្លើងធំជាច្រើនគ្រាប់។ ខណៈពេលនេះដែរ នាវាមុជទឹកបាតសមុទ្រ របស់កងទ័ពអាមេរិក ទើបតែបានទៅដល់កំពង់ផែក្រុងប៊ូសាន ភាគអាគ្នេយ៍ កូរ៉េខាងត្បូង។ កងទ័ព ទាំងកូរ៉េខាងជើង ទាំងខាងត្បូង សុទ្ធតែបានប្រកាស ថាគេត្រៀមបម្រុងខ្លួន រួចជាស្រេច ក្នុងករណីមានប្រទូស្តរាយ។
កូរ៉េខាងជើងធ្វើសមយុទ្ធយោធា ខណៈអាមេរិកបញ្ជូននាវាមុជទឹកទៅដល់
ស្ថានភាព មិនមានអ្វីប្រសើរទេ មានតែធ្ងន់ជាងមុន ដោយសារភាគីនីមួយៗ គ្មាននរណាម្នាក់បន្ធូរដៃទេ។ ថ្ងៃអង្គារទី២៥មេសានេះ ជាថ្ងៃបុណ្យខួបគំរប់៨៥ឆ្នាំ នៃការបង្កើតកងទ័ពរណសិរ្យបដិវដ្តកូរ៉េខាងជើង។ បើតាមការចុះផ្សាយរបស់ទីភ្នាក់ងារ ព័ត៌មានYonhap បានឲ្យដឹងថា កងទ័ពកូរ៉េខាងជើង បានរៀបចំធ្វើសមយុទ្ធយោធា ទ្រង់ទ្រាយធំមួយ នៅតំបន់ Wonsan ជាប់ឆ្នេរខាងកើតរបស់កូរ៉េខាងជើង។ ប្រភពដដែលបញ្ជាក់ថា កងទ័ពកូរ៉េខាងជើង បានបាញ់គ្រាប់កាំភ្លើងត្បាល់ និងគ្រាប់បេប្រភេទធ្ងន់ ដែលសុទ្ធតែជាគ្រាប់ពិតទាំងអស់។ តែបើតាមការសន្និដ្ឋាន កូរ៉េខាងជើង មិនបានបាញ់សាកល្បងអាវុធនុយក្លេអ៊ែរ ដូចដែលគេធ្លាប់បានបារម្ភទេ។
តែយ៉ាងណា ក្រសួងការពារជាតិកូរ៉េខាងត្បូង នៅទាន់បានបញ្ជាក់អះអាង ពីតំណឹងសមយុទ្ធយោធារបស់កូរ៉េខាងជើងនេះ នៅឡើយទេ។ គ្រាន់តែខាងអគ្គបញ្ជាការកងទ័ពកូរ៉េខាងត្បូង បានប្រកាសនៅថ្ងៃអង្គារនេះថា កូរ៉េខាងត្បូង កំពុងតាមដានឃ្លាំមើល សកម្មភាពចល័តចុះឡើង របស់កងទ័ពកូរ៉េខាងជើង យ៉ាងម៉ដ្ឋចត់បំផុត ហើយកងទ័ពកូរ៉េខាងត្បូង ក៏បានត្រៀមកំលាំង បំរុងទុកជាស្រេច ដែរ បើសិនជាត្រូវធ្វើសង្រ្គាមមែននោះ។
ដោយឡែក សារព័ត៌មាន Rodong Sinmun របស់គណបក្សពលករកូរ៉េខាងជើង បានសរសេរចុះផ្សាយនៅថ្ងៃអង្គារនេះថា កំលាំងវាយប្រហាររបស់កងទ័ពប្រជាមានិតកូរ៉េខាងជើង គឺខ្លាំងគ្មានអ្វីទប់បានទេ ព្រោះវាពោរពេញដោយសម្ភារៈទំនើបៗ ដូចជាអាវុធនុយក្លេអ៊ែរ បំព្រួញតូច ព្រមទាំង មីស៊ីលបាលីស្ទីក ដែលបាញ់ត្រង់ចំគោលដៅមិនឲ្យខុស ហើយអាចបាញ់ចេញពីនាវាមុជទឹកបាតសមុទ្រ ថែមទៀតផង។
សកម្មភាពធ្វើសមយុទ្ធយោធារបស់កូរ៉េខាងជើង នាពេលនេះ គឺវាស្របគ្នា ជាមួយនឹងការទៅដល់របស់នាវាមុជទឹកបាតសមុទ្រ របស់អាមេរិក នៅកំពង់ផែក្រុងបូសាន របស់កូរ៉េខាងត្បូង។ នាវា មុជទឹក USS Michigan មានសមត្ថភាពអាចបាញ់មីស៊ីលបាលីស្ទីក និងមីស៊ីលឆ្លងទ្វីបទៀតផង។ កងទ័ពជើងទឹកកូរ៉េខាងត្បូង ក៏បានប្រកាសថា គេទើបបានសាកល្បងបាញ់គ្រាប់ពិត ដោយមានការចូលរួមពីសំណាក់ នាវាចម្បាំងរបស់អាមេរិក នៅភាគខាងលិចកូរ៉េខាងត្បូង នៅថ្ងៃអង្គារនេះដែរ។ យើងឃើញថា ទាំងកូរ៉េខាងជើង ទាំងកូរ៉េខាងត្បូង នៅតែបន្តត្រៀមជើងព្រួល និងប្រកាសកំញើញគ្នា ទៅវិញទៅមកដដែល។
ចិន មានតួនាទីសំខាន់ណាស់ ក្នុងការដាក់សំពាធ នឹងឃាត់កូរ៉េខាងជើង
នៅថ្ងៃអង្គារ ២៥មេសា នេះ នៅទីក្រុងតូក្យូ ជប៉ុនបានរៀបចំការប្រជុំមួយ ដោយបានអញ្ជើញអ្នកជំនាញផ្នែកនុយក្លេអ៊ែរ របស់អាមេរិក និងកូរ៉េខាងត្បូងចូលរួមដែរ។ កម្មវត្ថុនៃកិច្ចប្រជុំនេះ គឺដើម្បីប្រមើលមើលឲ្យបានច្បាស់ អំពីសមត្ថភាព និងគ្រោះថ្នាក់ពិតប្រាកដ របស់អាវុធនុយក្លេអ៊ែរកូរ៉េខាងជើង ថាវាមានដល់កំរិតណា បើសិនជារបបផ្តាច់ការនេះ នៅតែរឹងទទឹង មិនព្រមបោះបង់មហិច្ឆិតានេះចោលទេ។
ក្រោយការប្រជុំ អ្នកជំនាញការជប៉ុន ក្នុងសំណុំរឿងកូរ៉េខាងជើងនេះ បានបញ្ជាក់ថា ភាគីទាំង៣ ជប៉ុន កូរ៉េខាងត្បូង និងអាមេរិក សុទ្ធតែយល់ស្របគ្នា ថាចិនមានតួនាទីសំខាន់ណាស់ ដើម្បីជួយដោះស្រាយបញ្ហានេះ។ ចិន ត្រូវតែជួយ ដាក់សំពាធទៅលើកូរ៉េខាងជើង ដោយវិធីផ្សេងៗ ដូចជាត្រូវបញ្ឈប់ការនាំចូលប្រេងឥទ្ធនៈទៅឲ្យកូរ៉េខាងជើង ជាដើម។
យ៉ាងណាមិញ បើតាមការប្រកាសរបស់អ្នកនាំពាក្យរដ្ឋាភិបាលជប៉ុន ក៏បានឲ្យដឹងដែរថា អ្នកជំនាញការកម្មវិធីនុយក្លេអ៊ែរ របស់ចិន នឹងត្រូវជួបលោករដ្ឋមន្ត្រីក្រសួងការបរទេសជប៉ុន នៅថ្ងៃពុធ ដើម្បីពិភាក្សាគ្នា ពីបញ្ហាទាំងអស់នេះ។ ការពិតទៅ ទាំងចិន ទាំងជប៉ុន សុទ្ធតែជាអ្នកដែលព្យាយាមទប់កុំឲ្យបញ្ហានេះ ក្លាយទៅជាសង្គ្រាម ព្រោះគ្មាននរណាចំណេញទេ បើសិនជាសង្រ្គាមរវាងអាមេរិក និងកូរ៉េខាងជើងផ្ទុះមែននោះ។
អាមេរិក កំពុងបង្ខំរកដំណោះស្រាយ ពុំនោះទេ….
ក្នុងសប្តាហ៍នេះ បើតាមការរំពឹងទុក យើងឃើញថា រដ្ឋាភិបាលអាមេរិក បានបង្កើនយុទ្ធនាការការទូត យ៉ាងខ្លាំង ដើម្បីរកការគាំទ្រ ក្នុងសំណុំរឿងកូរ៉េខាងជើងនេះ។ ជាការពិត លោក ដូណាល់ ត្រាំ បានប្រកាសថា ត្រូវបញ្ឈប់គោលនយោបាយធ្មេញភ្នែកខាំមាត់ ទុកបញ្ហាឲ្យទៅជាមហារីកធ្ងន់ធ្ងរ។ លោកត្រាំ បានទាមទារថា ក្រុមប្រឹក្សាសន្តិសុខនៃអង្គការសហប្រជាជាតិ ត្រូវត្រៀមខ្លួន ចេញសេចក្តីប្រកាសថ្មីមួយទៀត ដើម្បីថ្កោលទោស និងដាក់ទណ្ឌកម្ម ឲ្យបានតឹងតែងទៅលើកូរ៉េខាងជើង។
យ៉ាងណាមិញ លោក Rex Tillerson រដ្ឋមន្ត្រីការបរទេសអាមេរិក នឹងដឹកនាំកិច្ចប្រជុំ ពិសេសមួយ ជាមួយរដ្ឋមន្ត្រីក្រសួងការពារជាតិ និងជំនាញការអាមេរិក ផ្នែកចារកិច្ច នៅថ្ងៃពុធ ស្តីពីបញ្ហាកូរ៉េខាងជើង។ បន្ទាប់មកទៀត នៅថ្ងៃសុក្រ រដ្ឋមន្ត្រីការបរទេសអាមេរិក នឹងដឹកនាំការប្រជុំពិសេសមួយទៀត រវាងរដ្ឋមន្ត្រីក្រសួងការបរទេស នៃប្រទេសសមាជិកក្រុមប្រឹក្សាសន្តិសុខទាំងអស់ ក្នុងសំណុំរឿងនុយក្លេអ៊ែរកូរ៉េខាងជើងនេះ។
តាមរយៈកិច្ចប្រជុំ ទាំងក្នុងក្របខណ្ឌរដ្ឋាភិបាលអាមេរិក ទាំងក្នុងក្របខណ្ឌអង្គការសហប្រជាជាតិ យើងឃើញថារដ្ឋាភិបាលលោកត្រាំ ហាក់ដូចជាប្រញ៉េបប្រញ៉ាប់ និងសកម្មខ្លាំងណាស់ ដើម្បីស្វែងរកការគាំទ្រ ក្នុងសំណុំរឿងនេះ។ បញ្ហាចោទ គឺថារុស្ស៊ី ដែលជាអ្នកយកជើងរាទឹក ក្នុងការដាក់ទណ្ឌកម្មបន្ថែមលើកូរ៉េខាងជើង។ ចិនវិញ ថ្វីបើបានគាំទ្រទណ្ឌកម្មមែន តែចិន ប្រកាសហើយប្រកាសទៀត ថាត្រូវតែបន្ថយកំដៅ មិនត្រូវរុញបញ្ហា ឲ្យក្លាយជាសង្រ្គាមមែនទែននោះទេ។
តែដូចយើងឃើញ អ្វីដែលកើតឡើងនៅស៊ីរីស្រាប់ រដ្ឋាភិបាលលោកត្រាំ បានសម្រេចចិត្តប្រើកំលាំងដោយឯកឯង ដោយមិនចាំបាច់មាននរណាយល់ស្របទេ។ ដូច្នេះ គេបារម្ភណាស់ថា បើក្រុមប្រឹក្សាសន្តិសុខនៅតែមិនអាចធ្វើអ្វីបាន រដ្ឋាភិបាលអាមេរិក អាចនឹងសម្រេចយកជំរើសចុងក្រោយ ដើម្បីប្រាប់ទៅគ្រប់គ្នាថា អាមេរិកនៅតែជាបងធំ ដែលមិនត្រូវការជំនួយ រឺការគាំទ្រពីនរណាទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ