កូរ៉េខាងជើង៖ ទណ្ឌកម្មសេដ្ឋកិច្ចចាប់ផ្តើមអនុវត្ត
បន្ទាប់ពីសកម្មភាពព្រហើនជាបន្តបន្ទាប់របស់កូរ៉េខាងជើង តាមរយៈការបាញ់សាកល្បងអាវុធនុយក្លេអ៊ែរ និងគ្រាប់មីស៊ីល ក្រុមប្រឹក្សាសន្តិសុខបានសម្រេចដាក់ទណ្ឌកម្មកាលពីថ្ងៃទី ៣មីនា ដែលទណ្ឌកម្មទាំងនោះត្រូវបានគេអះអាងថា ជាទណ្ឌកម្មធ្ងន់បំផុតមិនធ្លាប់មានទេ សម្រាប់ករណីកូរ៉េខាងជើង។ ចិន ដែលជាដៃគូពាណិជ្ជកម្មធំបង្អស់ និងជាអ្នកតែងតែជួយការពារកូរ៉េខាងជើងកន្លងមក ក៏បានយល់ព្រមលើទណ្ឌកម្មទាំងនេះដែរ។ កាលពីថ្ងៃទី ៥ មីនា ហ្វីលីពីន ទើបតែបានឃាត់ទុកនាវាដឹកទំនិញមួយគ្រឿង ក្នុងដែនទឹករបស់ខ្លួន ដោយសំអាងលើការអនុវត្តនៃទណ្ឌកម្មរបស់អង្គការសហប្រជាជាតិ ទៅលើកូរ៉េខាងជើង។ ចំណែកកូរ៉េខាងត្បូងវិញ បានសន្យាថានឹងដាក់ទណ្ឌកម្មជាឯកតោភាគីដាច់ដោយឡែកផ្សេងទៀត លើកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៤
ហ្វីលីពីនចាប់នាវាកូរ៉េខាងជើង៖
តាមធម្មតា ប្រទេសទាំងអស់ មានតួនាទីសហការជាមួយអង្គការសហប្រជាជាតិ ក្នុងការអនុវត្តគ្រប់សេចក្តីសម្រេចរបស់ស្ថាប័នកំពូលនេះ។ ដូច្នេះក្នុងករណីនេះ អាជ្ញាធរហ្វីលីពីន មានសិទ្ធិឃាត់ រឺរឹបអូសនាវារបស់កូរ៉េខាងជើង រឺក៏ជានាវា ដែលមានជាប់ពាក់ព័ន្ធនឹងក្រុមហ៊ុន រឺក៏សហគ្រាស ដែលរកស៊ីជាមួយកូរ៉េខាងជើង។
បើតាមការឲ្យដឹងពីអ្នកនាំពាក្យរដ្ឋាភិបាលហ្វីលីពីន អាជ្ញាធរហ្វីលីពីន បានចាប់ឃាត់នាវាដឹកដូងប្រេងមួយគ្រឿង មានទំងន់ ៦៨៣០តោន ដែលធ្វើដំណើរចេញពីតំបន់ ប៉ាឡំបាង ប្រទេសឥណ្ឌូណេស៊ី។ នាវានោះមានឈ្មោះថា Jin Teng ដែលមានទង់ជាតិចុះបញ្ជីរនៅប្រទេសសេរ៉ាឡេអូន។ បច្ចុប្ប្បន្ននេះ នាវានេះត្រូវឃាត់ទុកនៅកំពង់ផែ ស៊ូប៊ិក ភាគឦសានទីក្រុងម៉ានីល រឺឯបុគ្គលិក ដែលធ្វើការនៅលើនាវា នឹងត្រូវបានគេបណ្តេញឲ្យចាកចេញ ពីប្រទេសហ្វីលីពីន។ គេកំពុងតែរងចាំក្រុមការងាររបស់អង្គការសហប្រជាជាតិ ដែលនឹងចុះមកត្រួតពិនិត្យ។ ប៉ុន្តែបើតាមព័ត៌មានបឋមគឺថា នៅក្នុងនាវាមានសុទ្ធតែដូងប្រេង ហើយគេពុំមានរកឃើញ សារធាតុគ្រោះថ្នាក់ រឺមួយក៏អាវុធអ្វីទេ។
នាវារបស់ក្រុមហ៊ុន មានឈ្មោះក្នុងបញ្ជីរខ្មៅ៖
សូមបញ្ជាក់ថា នាវាដែលហ្វីលីពីនចាប់ជារបស់ប្រទេសសេរ៉ាឡេអូន ក៏ប៉ុន្តែវាគឺជានាវារបស់ក្រុមហ៊ុនមួយ ដែលមានឈ្មោះក្នុងបញ្ជីរខ្មៅ ដែលអង្គការសហប្រជាជាតិ បានដាក់ទណ្ឌកម្មក្នុងសំណុំរឿងកូរ៉េខាងជើង។ ពាក្យថាដាក់ទណ្ឌកម្មលើកូរ៉េខាងជើង គឺមានន័យថា ជាការដាក់ទណ្ឌកម្មទៅលើមនុស្សម្នាក់ មនុស្សមួយក្រុម រឺក្រុមហ៊ុនណាមួយ ដែលរកស៊ីជាមួយកូរ៉េខាងជើង។ ធ្វើដូច្នេះ ដើម្បីបិទដង្ហើមសេដ្ឋកិច្ចរបស់កូរ៉េខាងជើង។ ជាក់ស្តែង បើយោងតាមឯកសាររបស់អង្គការសហប្រជាជាតិ ក្រុមមនុស្សដែលមានជាប់ពាក់ព័ន្ធនឹងកម្មវិធីនុយក្លេអ៊ែររបស់កូរ៉េខាងជើង គឺមាន១៦នាក់ ដែលភាគច្រើនមាននៅអ៊ីរ៉ង់ ស៊ីរី និងវៀតណាម។ ហើយបើនិយាយពីក្រុមហ៊ុន ដែលរកស៊ីជាមួយកូរ៉េខាងជើងវិញ គឺភាគច្រើន ជាក្រុមហ៊ុនរបស់ចិនតែម្តង។ ករណីចាប់នាវាដឹកទំនិញ នៅហ្វីលីពីននេះ គឺជាលើកដំបូងហើយ បន្ទាប់ពីមានការអនុម័តជាឯកច្ឆ័នរបស់អង្គការសហប្រជាជាតិ។
កូរ៉េខាងត្បូងគ្រោងដាក់ទណ្ឌកម្មដាច់ដោយឡែកបន្ថែមទៀត៖
ក្រុមប្រឹក្សាសន្តិសុខអង្គការសហប្រជាជាតិ បានសម្រេចទណ្ឌកម្មរួម ហើយទន្ទឹមនឹងនេះ ប្រទេសទាំងអស់ មានសិទ្ធិដាក់ទណ្ឌកម្មជាលក្ខណៈឯកតោភាគី បន្ថែមទៀត បើខ្លួនយល់ថាវាត្រឹមត្រូវ ទៅតាមស្មារតី នៃទណ្ឌកម្មរួមរបស់អង្គការសហប្រជាជាតិ។ កូរ៉េខាងត្បូង មិនមែនជាអ្នកទីមួយទេ ដែលធ្វើបែបនេះ។ ជប៉ុនក៏ធ្លាប់ ដាក់ទណ្ឌកម្មដាច់ដោយឡែក តែម្នាក់ឯង ទៅលើកូរ៉េខាងជើងដែរ។
សម្រាប់ពេលនេះ រដ្ឋាភិបាលកូរ៉េខាងត្បូង មិនទាន់បានបញ្ជាក់លំអិតថា ទណ្ឌកម្មដាច់ដោយឡែក ដែលគេគ្រោងនឹងដាក់នោះ មានអ្វីខ្លះទេ។ ប៉ុន្តែបើយោងតាម ទីភ្នាក់ងារព័ត៌មាន យុនហាប់ បានឲ្យដឹងថា កូរ៉េខាងត្បូងអាចនឹងហាមឃាត់ គ្រប់នាវាដឹកទំនិញទាំងអស់ ដែលធ្លាប់ចូលចតនៅកូរ៉េខាងជើង មិនឲ្យចូលឆ្លងកាត់ច្រកសមុទ្ររបស់កូរ៉េខាងត្បូងទេ។ ទីភ្នាក់ងារដដែលរាយការណ៍ថា កូរ៉េខាងត្បូងនឹងធ្វើបញ្ជីរខ្មៅមួយដែរ ដើម្បីចុះឈ្មោះមនុស្សជនជាតិកូរ៉េខាងជើង រឺក្រុមហ៊ុនកូរ៉េខាងជើង ដែលគេសង្ស័យថាបានចូលរួមក្នុងកម្មវិធីនុយក្លេអ៊ែរកូរ៉េខាងជើង។
សមយុទ្ធយោធា កូរ៉េខាងត្បូង-អាមេរិក៖
ដោយឡែក កូរ៉េខាងត្បូងនិងអាមេរិក គ្រោងធ្វើសមយុទ្ធយោធារួមគ្នា ក្នុងពេលឆាប់ៗនេះ។ សមយុទ្ធយោធានេះ មានពីរដំណាក់កាល។ តំណាក់កាលទីមួយ ដែលចាប់ផ្តើមធ្វើនៅថ្ងៃចន្ទ ទី៧មីនា មានឈ្មោះថា Key Resolve ជាសមយុទ្ធដែលប្រើប្រាស់តែប្រព័ន្ធម៉ាស៊ីនកុំព្យូទ័រទេ។ ដំណាក់កាលទីពីរ គឺឈ្មោះ Foal Eagle ដែលប្រើប្រាស់កម្លាំងកុម្មង់ដូពិសេស ប្រើប្រាស់នាវាផ្ទុកយន្តហោះចម្បាំង និងនាវាមុជទឹកបាទសមុទ្រជាដើម។ បើតាមការឲ្យដឹង សមយុទ្ធលើកនេះ គឺមានទាហានអាមេរិកចូលរួម លើសកាលពីឆ្នាំ២០១៥ ដល់ទៅ៤ដងឯនោះ ពោលគឺមានទាហានអាមេរិកចូលរួមប្រមាណជា ១៥០០០នាក់។
ទណ្ឌកម្មអាចធ្វើឲ្យរបបព្យុងយ៉ាងកាន់តែទ័លច្រក និងកម្រោលចូល៖
បញ្ហានេះតែងតែត្រូវគេចោទសួរជារឿយៗ ឲ្យតែមានការដាក់ទណ្ឌកម្មម្តងៗ។ បើយើងនិយាយពីទណ្ឌកម្មសេដ្ឋកិច្ច គឺវាមានប្រសិទ្ធភាព មិនអត់តែ គ្រាន់តែប្រសិទ្ធិភាពនោះ វាប៉ះពាល់កម្រិតណា ទៅលើកូរ៉េខាងជើង។ ករណីកូរ៉េខាងជើង វាខុសពីករណីអ៊ីរ៉ង់។ អ៊ីរ៉ង់ មានសេដ្ឋកិច្ចរំពឹងច្រើនទៅលើការនាំប្រេងចេញ ហើយនឹងមានចរាចរណ៍ភាគហ៊ុន នៅលើទីផ្សារបរទេសទៀត។ ដូច្នេះការដាក់ទណ្ឌកម្មសេដ្ឋកិច្ចលើអ៊ីរ៉ង់ មានផលប៉ះពាល់ដោយផ្ទាល់ខ្លាំងទៅលើសេដ្ឋកិច្ចអ៊ីរ៉ង់។
ប៉ុន្តែសម្រាប់កូរ៉េខាងជើង គឺវាពុំសូវមានចរាចរណ៍ភាគហ៊ុន រឺក៏កំចីឥណ្ឌទាន នៅលើទីផ្សារអន្តរជាតិច្រើនទេ។ ការដាក់ទណ្ឌកម្មអាចធ្វើទៅបាន តែទៅលើក្រុមហ៊ុនមួយចំនួន ដែលរកស៊ី នាំចូលទំនិញទៅកូរ៉េខាងជើងតែប៉ុណ្ណោះ។ ម្យ៉ាងវិញទៀត របបផ្តាច់ការព្យុងយ៉ាង តាំងពីដើមមក មិនដែលខ្វល់ពីបញ្ហាសេដ្ឋកិច្ចប្រជាជនខ្វះស្បៀង រស់នៅវេទនាស្អីទេ។ របបនេះជារបបផ្តាច់ការពេញទី សុខចិត្តឲ្យប្រជាជនស្លាប់ តែមិនសុខចិត្តបាក់មុខទេ។ ផ្ទុយទៅវិញ ការដាក់ទណ្ឌកម្មលើក្រុមហ៊ុន ដែលរកស៊ីជាមួយកូរ៉េខាងជើង គឺវាជះឥទ្ធិពលទៅលើប្រជាជនកូរ៉េខាងជើង ដោយសារតែវានឹងធ្វើឲ្យកាន់តែខ្សត់ទំនិញ ខ្វះស្បៀង ខ្វះសម្ភារៈប្រើប្រាស់ ស្បៀងអាហារឡើងថ្លៃជាដើម។
អ្នកដែលគេរិះគន់គេថា ចង់ដាក់ទណ្ឌកម្មលើរបបផ្តាច់ការកូរ៉េខាងជើង តែប្រជាជនកូរ៉េខាងជើងទេ ដែលជាអ្នកវេទនា។ តែបើនិយាយម្យ៉ាងទៀត គឺថារបបផ្តាច់ការនេះ យកប្រជាជនខ្លួនឯងធ្វើខែល ដើម្បីការពារខ្លួន។ ដូច្នេះហើយ បានជាគេបារម្ភថា ទណ្ឌកម្មទាំងអស់នេះ វានឹងជម្រុញឲ្យគីម ជុងអ៊ុន កាន់តែមួរម៉ៅ កាន់តែឡើងចាង។ ចំណុចមួយទៀតគួរលើកឡើងដែរ គឺថាលើកនេះ ចិនក៏បានចូលរួមដាក់ទណ្ឌកម្មនឹងគេដែរ ដូច្នេះកូរ៉េខាងជើងប្រាកដជាមានអារម្មណ៍ឯកោ និងទល័ច្រក ដែលគេគ្រប់គ្នា ព្រួតគ្នាដាក់ទណ្ឌកម្មលើខ្លួន។ មនុស្សយើងតែកាលណាទ័លចក្រ គឺអ្វីក៏ហ៊ានធ្វើដែរ!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ