កូរ៉េខាងជើងថ្កោលទោសសមយុទ្ធយោធា អាមេរិក-កូរ៉េខាងត្បូង ថាជាការយកសាំងមកជះលើភ្លើង
មួយថ្ងៃមុនការចាប់ផ្តើមសមយុទ្ធយោធារួមគ្នា រវាងកងទ័ពកូរ៉េខាងត្បូង និងកងទ័ពអាមេរិក កូរ៉េខាងជើង បានប្រកាសថ្កោលទោសនៅថ្ងៃនេះថា ការធ្វើសមយុទ្ធយោធានេះ គឺវាមិនខុស ពីយកសាំងមកជះលើភ្លើងឡើយ។ កូរ៉េខាងជើង តែងតែចាត់ទុកការធ្វើសមយុទ្ធយោធានេះថា ជាការហាត់សម ដើម្បីចូលទៅវាយឈ្លានពាន ផ្តួលរំលំរបបដឹកនាំខ្លួន។ កូរ៉េខាងជើង បានគំរាមមកវិញថា សង្រ្គាមនុយក្លេអ៊ែរ អាចកើតឡើង ឬអត់ គឺវាអាស្រ័យថាតើ សហរដ្ឋអាមេរិក មានចិត្តសឿងគំរិតណា!
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
សមយុទ្ធដែលមានឈ្មោះថា Ulchi Freedom Guardian (UFG) តែងតែធ្វើឡើងជារៀងរាល់ឆ្នាំ ចាប់តាំងពីឆ្នាំ១៩៧៦មក ដើម្បីហាត់សម និងត្រៀមការពារ ដែនដីកូរ៉េខាងត្បូង ក្នុងករណីដែលមានការវាយប្រហារ ពីសំណាក់កូរ៉េខាងជើង។ ប៉ុន្តែសម្រាប់របបផ្តាច់ការកូរ៉េខាងជើងវិញ ការធ្វើសមយុទ្ធយោធារវាងអាមេរិក និងកូរ៉េខាងត្បូងនេះ គឺមិនខុសពីការហាត់សមដើម្បីចូលទៅផ្តួលរំលំរបបខ្លួនឡើយ។
កូរ៉េខាងជើង បានធ្វើការប្រកាស តាមរយៈបណ្តាញព័ត៌មានតែមួយគត់របស់ខ្លួន នៅថ្ងៃអាទិត្យនេះថា ការធ្វើសមយុទ្ធយោធានៅថ្ងៃស្អែកនេះ គឺជាការបង្កបញ្ហា ឲ្យកាន់តែធំ ប្រៀបបាននឹងការយកសាំងមកជះលើភ្លើង។ សារព័ត៌មាន Rodong Sinmun បន្ថែមទៀតថា ការបន្តធ្វើការហាត់សមវាយប្រហារម្តងហើយម្តងទៀត នៅក្បែរព្រំដែនកូរ៉េខាងជើង គឺជាការគំរាមដល់កូរ៉េខាងជើងដោយស្រស់ៗ។ កាសែតកូរ៉េខាងជើងនេះ បានបន្តថា អ្វីៗគឺវាអាស្រ័យលើអាកប្បកិរិយារបស់អាមេរិក។ បើអាមេរិក គិតថា ខ្លួននឹងមិនមានគ្រោះថ្នាក់អ្វី ដោយសារតែខ្លួននៅឆ្ងាយពីកូរ៉េខាងជើងនោះ វាគឺជាការយល់ច្រឡំទាំងស្រុងហើយ។
ក្នុងន័យនេះ កូរ៉េខាងជើង ចង់សំដៅថា អាវុធមីស៊ីល បាលីស្ទីករបស់កូរ៉េខាងជើង អាចរត់ទៅដល់ដែនដីអាមេរិក។ យ៉ាងណាមិញ គីម ជុងអ៊ុន ក៏ធ្លាប់បានគំរាមបាញ់កំទិញកោះហ្គាំ ដែលជាដែនដីមូលដ្ឋានទ័ពអាមេរិក នៅក្នុងមហាសមុទ្រប៉ាស៊ីហ្វិកដែរ។ តែមេដឹកនាំកូរ៉េខាងជើង ហាក់បានផ្អាកគំរោងបាញ់កំទេចនេះ ទៅវិញ ដែលតាមយោបល់អ្នកវិភាគខ្លះ គឺកូរ៉េខាងជើង ចង់ទុកពេលឲ្យអាមេរិក រកច្រកចេញ តាមរយៈការចរចាណាមួយ ដើម្បីធ្វើសម្បទានឲ្យគ្នា។
យ៉ាងណាមិញ អ្នកវិភាគជាច្រើន យល់ថាក្នុងកាលៈទេសៈនេះ គេពុំគួរធ្វើសមយុទ្ធយោធា ឲ្យកូរ៉េខាងជើងក្តៅក្រហាយបន្ថែមទេ។ ហើយបើសិនជានៅតែធ្វើ ក៏គួរតែកាត់បន្ថយសមាសភាព និងកុំធ្វើឲ្យសមយុទ្ធនេះមានទ្រង់ទ្រាយធំពេក។
ថ្នាក់ដឹកនាំកងទ័ពទាំងកូរ៉េខាងត្បូង និងអាមេរិក បានឲ្យដឹងថា គេនឹងរក្សាដំណើរការធ្វើសមយុទ្ធនៅថ្ងៃចន្ទស្អែក។ តាមការគ្រៀងទុក សមយុទ្ធនេះ គឺគេហាត់សមប្រយុទ្ធ ដោយប្រើប្រាស់ប្រព័ន្ធកុំព្យូទ័រ សឹងតែទាំងស្រុង ដោយមិនប្រើសព្វាវុធពិតទេ។ដោយឡែក បើតាមការចុះផ្សាយរបស់ទីភ្នាក់ងារ Yonhap កូរ៉េខាងត្បូង និងអាមេរិក កំពុងពិចារណា ថានឹងមិនប្រើប្រាស់នាវាផ្ទុកយន្តហោះចំបាំងទាំងពីរគ្រឿង នៅក្នុងសមយុទ្ធនេះទេ។ ចំណែកចំនួនទាហានដែលចូលរួម ក៏មានការថយចុះដែរ គឺមាន ១៧៥០០ នាក់ បើប្រៀបធៀបទៅឆ្នាំ២០១៦ គឺមានដល់ទៅ២៥០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ