ប៉េរូទទួលភារៈរៀបចំកិច្ចប្រជុំអង្គការសហប្រជាជាតិស្តីពីអាកាសធាតុ ដើម្បីស្វែងរកកិច្ចព្រមព្រៀងឆ្នាំ២០១៥
ចុះផ្សាយនៅថ្ងៃ៖
ស្តាប់ - ០៦:២៧
នៅថ្ងៃចន្ទនេះ ទីក្រុងលីម៉ា ប្រទេសប៉េរូ ផ្តើមធ្វើជាម្ចាស់ផ្ទះរៀបចំកិច្ចប្រជុំអង្គការសហប្រជាជាតិ លើកទី២០ ស្តីពីបញ្ហាអាកាសធាតុ។ កិច្ចប្រជុំនេះប្រព្រឹត្តទៅ រយៈពេល ១២ថ្ងៃ ដោយមាន ប្រទេសចំនួនជាង ១៩០ចូលរួម និងមនុស្សប្រមាណជា ១២ ០០០នាក់មកពីគ្រប់ជ្រុងជ្រោយក្នុងលោក ពិសេស វត្តមាន ប្រមុខរដ្ឋ ប្រមុខរដ្ឋាភិបាល ព្រមទំាងអង្គការអន្តរជាតិនានា។ កម្មវត្ថុនៃកិច្ចប្រជុំនៅលីម៉ាពេលនេះ ក៏ជាការត្រៀមរៀបចំសន្និសីទអន្តរជាតិស្តីពីអាកាសធាតុនៅក្នុងទីក្រុងប៉ារីស នាឆ្នំា ២០១៥ខាងមុខ។
លីម៉ាបានត្រៀមលក្ខណៈជាស្រេច ក្នុងការទទួលបើកសន្និសីទស្តីអំពីអាកាសធាតុលើកទី ២០ ឬហៅថាជាជំនួបCOP២០។ COP ជាស្ថាប័នដែលបានបង្កើតឡើងនៅឆ្នាំ១៩៩២ នាឱកាសដែលអង្គការសហប្រជាជាតិបានអនុម័តអនុសញ្ញាគោល ស្តីពីការប្តូរផ្លាស់អាកាសធាតុ និងដែលមានប្រទេសចំនួន ១៩៥បានផ្តល់សច្ចាប័ន។
តំណាងប្រតិភូមកពី១៩៥ប្រទេស ត្រូវជួបប្រជុំ ធ្វើការនៅក្នុងអគារដ៏ពិសេសមួយ រៀបចំឡើងសម្រាប់ព្រឹត្តិការណ៍ធំៗនៅលីម៉ា រដ្ឋធានីរបស់ប៉េរូ ដោយចាប់ផ្តើមពិភាក្សា ឬបន្តពិគ្រោះពិចារណាគ្នាលើប្រធានបទប្រចាំសតវត្សរ៍ “ការប្តូរផ្លាស់អាកាសធាតុ” និងជាពិសេស លើវិធានការ ដែលប្រទេសជាសមាជិកនីមួយៗត្រូវសន្យា ត្រូវប្រកាន់យកដើម្បីកាត់បន្ថយការបញ្ចេញឧស្ម័នផ្ទះកញ្ចក់។
កម្មវត្ថុ និង កិច្ចព្រមព្រៀង
កម្មវត្ថុឬបំណងនៃកិច្ចប្រជុំនេះ គឺធ្វើយ៉ាងណាឱ្យការចរចាស្តីពី អាកាសធាតុ មានការជឿនលឿនទៅមុខខ្លាំង និងអាចសម្រេចតាក់តែងឱ្យបាននូវអត្ថបទច្បាប់មួយ យ៉ាងសព្វជ្រុងជ្រោយ ដែលនឹងក្លាយជាទៅកិច្ចព្រមព្រៀងចុងក្រោយ អាចចុះហត្ថលេខាបាន ក្នុងសន្និសីទអង្គការសហប្រជាជាតិលើកទី ២១ នៅទីក្រុងប៉ារីស ឆ្នាំ២០១៥។ ជាកិច្ចព្រមព្រៀង ដែលភាគីពាក់ព័ន្ធទាំងអស់អាចអនុវត្តតាមបានចាប់ពីឆ្នាំ២០២០ និងដែលមានអត្ថន័យខ្លឹមសារ ឆ្លើយតបបានទៅនឹងកម្មវត្ថុរបស់អង្គការសហប្រជាជាតិ ក្នុងការកំរិតការឡើងកម្តៅនៃភពផែនដី ត្រឹមតែ ២អង្សារ។
លីម៉ាចង់រកឱ្យឃើញកិច្ចព្រមព្រៀងរវាងប្រទេស លើប្រភេទនៃកម្មវត្ថុជាតិដែលប្រទេសនីមួួយៗត្រូវលើកមកបង្ហាញឱ្យបានមុនខែមីនា ២០១៥។
ថ្វីបើជំនួបប្រជុំប្រព្រឹត្តទៅដោយបិទទ្វារ សាធារណជនអាចតាមដាន និងចូលរួមចំណែក ក្នុងសន្និសីទរណបតូចៗ ឬការជួបជុំពិភាក្សាផ្សេងៗ ទន្ទឹមនឹងជំនួបប្រជុំផ្លូវការ COP ដែលរដ្ឋាភិបាលប៉េរូបានផ្តួចផ្តើមរៀបចំឡើង។ សូមបញ្ជាក់ថាប៉េរូ ជាម្ចាស់ផ្ទះថ្ងៃនេះ ក៏ជាប្រទេសមួយ ក្នុងចំណោមប្រទេសដែលរងផលប៉ះពាល់ និងងាយរងគ្រោះជាងគេពីការផ្លាស់ប្តូរអាកាសធាតុ។
បរិបទមានសុទិដ្ឋនិយម
គ្រប់គ្នានៅចងចាំមិនភ្លេចទេ បរាជ័យនៃជំនួបកំពូលស្តីពីអាកាសធាតុនៅទីក្រុងកូផេនហាក ប្រទេសដាណឺម៉ាក ឆ្នាំ២០០៩ ដែលបានបិទបញ្ចប់ទៅដោយគ្មានរកឃើញកិច្ចព្រមព្រៀង គួរឱ្យកត់សម្គាល់សោះ។ ប៉ុន្តែនៅលើកនេះ បរិបទហាក់ដូចជាមានសុទិដ្ឋនិយមជាងលើកមុនៗ ៖ រយៈពេលចុងក្រោយនេះ ដំណឹងល្អច្រើនធ្លាក់មកបន្តបន្ទាប់គ្នា ទាក់ទងនឹងសំណុំអាកាសធាតុ។
នាឱកាសជំនួបកំពូលAPEC (វេទិកាសហប្រតិបត្តិការអាស៊ីប៉ាស៊ីហ្វិក) កាលពីពាក់កណ្តាលខែវិច្ឆិកា នៅប៉េកាំង សហរដ្ឋអាមេរិក និងចិនព្រមព្រៀងរួមគ្នាកាត់បន្ថយរៀងៗខ្លួនការបញ្ចេញឧស្ម័នផ្ទះកញ្ចក់ ៖ អាមេរិកសន្យាបញ្ចុះ ពីពេលនេះ ដល់ឆ្នាំ២០២៥ ការបញ្ចេញឧស្ម័នកាបូនិក CO2 ពី ២៦ទៅ ២៨% ចំណែកខាងចិនវិញ ក៏ព្រមកាត់បន្ថយបន្តិចម្តងៗការបញ្ចេញឧស្ម័នផ្ទះកញ្ចក់ តាមការសន្យាឱ្យបាននៅឆ្នាំ២០៣០។ ជាលើកទីមួយហើយ ដែលមហាយក្សខាងបញ្ចេញឧស្ម័នពុលទាំងពីរព្រមព្រៀងគ្នាយ៉ាងដូច្នេះ។
កាលពីប៉ុន្មានថ្ងៃមុននេះទៀត ដល់វេនសហភាពអឺរ៉ុបម្តង ! សមាជិកទាំង២៨ បានប្រកាសកាត់បន្ថយឧស្ម័នផ្ទះកញ្ចក់ឱ្យបាន៤០%នៅឆ្នាំ២០៣០ បើប្រៀបទៅឆ្នាំ១៩៩០ និងងាកទៅចាប់យកថាមពលមិនចេញរីកស្ងួតមកប្រើលាយជាមួយថាមពលផ្សេងទៀត ឱ្យបាន២៧%។ ការសន្សំថាមពល២៧% ក៏នឹងត្រូវសម្រេចនាពេលខាងមុខដ៏ខ្លី។
ជាចុងក្រោយ គឺហិបមូលនិធិបៃតង ដែលប្រទេសមហាអំណាចឧស្សាហកម្មបានសន្យាផ្តល់ នាកាលពី ឆ្នាំ២០០៩ ដើម្បីជួយដល់ប្រទេសក្រីក្រសម្រាប់ប្រយុទ្ធប្រឆាំងនឹងការឡើងកម្តៅនៃភពផែនដី ចាប់ផ្តើមបំពេញជាបណ្តើរៗ។ ២១ប្រទេសឧស្សាហកម្មបានសន្យាបង់លុយចូលហិបមូលនិធិបៃតងឱ្យបាន៧៤ពាន់លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ