អាមេរិកដកខ្លួនចេញពីក្រុមប្រឹក្សាសិទ្ធិមនុស្សនៃអង្គការសហប្រជាជាតិ
សហរដ្ឋអាមេរិក នៅថ្ងៃអង្គារបានប្រកាសដកខ្លួនចេញពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។ បន្ទាប់ពីការចាកចេញ សហរដ្ឋអាមេរិក បានថ្កោលទោសចំពោះសមាជិកនៃក្រុមប្រឹក្សានេះ ហើយចោទប្រកាន់ថាក្រុមប្រឹក្សាសិទ្ធិមនុស្សរបស់អង្គការសហប្រជាជាតិ មានភាពលំអៀងប្រឆាំងនឹងប្រទេសអ៊ីស្រាអែល ដែលជាសម្ព័ន្ធមិត្តរបស់ខ្លួន។
ចុះផ្សាយនៅថ្ងៃ៖
សេចក្តីសម្រេចរបស់វ៉ាស៊ីនតោននាពេលនេះ ត្រូវបានប្រកាសឲ្យដឹងដោយលោកស្រី Nikki Haley ឯកអគ្គរដ្ឋទូតអាមេរិកប្រចាំអង្គការសហប្រជាជាតិ។ យ៉ាងណាក៏ដោយ លោកស្រី នៅតែបញ្ជាក់ថាសហរដ្ឋអាមេរិកនៅតែជាប្រទេសឈានមុខគេ ក្នុងកិច្ចការពារសិទ្ធិមនុស្សដដែល។
ជាការកត់សម្គាល់សេចក្តីប្រកាសនេះ ត្រូវបានធ្វើឡើង បន្ទាប់ពីមន្ត្រីជាន់ខ្ពស់ផ្នែកសិទ្ធិមនុស្សរបស់អង្គការសហប្រជាជាតិ រិះគន់ក្រុងវ៉ាស៊ីនតោនចំពោះអំពើពង្រាត់កុមារពីឪពុកម្តាយរបស់ពួកគេ ខណៈដែលពួកគេកំពុងស្វែងរកសិទ្ធិជ្រកកោននៅក្នុងទឹកដីសហរដ្ឋអាមេរិក បន្ទាប់ពីចាកចេញពីម៉ិកស៊ិក។
លោកស្រី Haley និងលោក Pompeo រដ្ឋមន្ត្រីក្រសួងការបរទេសអាមេរិក បានបញ្ជាក់ថា ការសម្រេចចិត្តចាកចេញនាពេលនេះ គឺបន្ទាប់ពីរយៈពេលជាងមួយឆ្នាំ ដែលសហរដ្ឋអាមេរិកតែងតែជំរុញឲ្យមានការធ្វើកំណែទម្រង់ និងដកសមាជិកនៃក្រុមប្រឹក្សាសិទ្ធិមនុស្ស ដែលកំពុងរំលោភបំពានសិទ្ធិមនុស្សចេញ។
លោកស្រី Haley បញ្ជាក់ថា ការធ្វើកំណែទម្រង់គឺជារឿងចាំបាច់មួយដែលត្រូវតែធ្វើសម្រាប់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ដើម្បីឲ្យស្ថាប័នមួយនេះ ក្លាយជាអ្នកលើកស្ទួយសិទ្ធិមនុស្ស។ លោកស្រីបន្តថា ជាច្រើនឆ្នាំមកនេះ ក្រុមប្រឹក្សាសិទ្ធិមនុស្សរបស់អង្គការសហប្រជាជាតិបានការពារប្រទេស ដែលកំពុងរំលោភបំពានសិទ្ធិមនុស្ស និងមានភាពលំអៀងផ្នែកនយោបាយ។ លោកស្រីបញ្ជាក់ថា ពេលនេះ គ្រប់គ្នាឃើញច្បាស់ហើយ ថាស្ថាប័នកំពូលផ្នែកសិទ្ធិមនុស្សមួយនេះ មិនបានទទួលយកការធ្វើកំណែទម្រង់នោះទេ។
សូមជម្រាបជូនថាក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ត្រូវបានបង្កើតឡើងនៅឆ្នាំ២០០៦ ក្នុងគោលដៅការពារសិទ្ធិមនុស្សនៅទូទាំងពិភពលោក។ ប៉ុន្តែការចេញរបាយការណ៍នីមួយៗរបស់ស្ថាប័នមួយនេះតែងតែប៉ះទៅលើសហរដ្ឋអាមេរិក។ បញ្ហាថ្មីៗនេះ គឺក្រុមប្រឹក្សាសិទ្ធិមនុស្សអង្គការសហប្រជាជាតិ បានចេញរបាយការណ៍ ផ្តោតសំខាន់លើសកម្មភាពរបស់អ៊ីស្រាអែល មកលើប៉ាឡេស្ទីន ដែលធ្វើឲ្យក្រុងវ៉ាស៊ីនតោនមិនសប្បាយចិត្ត។
ភ្លាមៗនៅក្រោយការប្រកាសរបស់សហរដ្ឋអាមេរិកដកខ្លួនចេញពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិ លោកនាយករដ្ឋមន្ត្រីអ៊ីស្រាអែល Benjamin Netanyahu បានស្វាគមន៍សហរដ្ឋអាមេរិក។ ក្រៅពីនេះលោកនាយករដ្ឋមន្ត្រីអ៊ីស្រាអែលបញ្ជាក់ថា នេះបង្ហាញកាន់តែច្បាប់ពីភាពលំអៀង និងប្រឆាំងអ៊ីស្រាអែល ដែលក្រុមប្រឹក្សាសិទ្ធិមនុស្សតែងតែធ្វើកន្លងមក ដែលផ្ទុយពីបេសកកម្មរបស់ខ្លួនក្នុងការការពារសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ