វីដេអូបង្ហាញ ប៉ូលិសស្បែកស បាញ់សម្លាប់បុរសស្បែកខ្មៅ ពីក្រោយខ្នង
សហគមន៍ប្រជាជនអាមេរិកាំងស្បែកខ្មៅ ផ្ទុះកំហឹងជាថ្មី បន្ទាប់ ពី បុរសស្បែកខ្មៅម្នាក់ ត្រូវបានប៉ូលិសស្បែកស បាញ់សម្លាប់ កាលពីថ្ងៃសៅរ៍ នៅក្នុងរដ្ឋការ៉ូលីនខាងត្បូង។ ក្រោយការបង្ហាញ វីដេអូរដែលថតបានសកម្មភាពរបស់ប៉ូលិសប្រើកាំភ្លើងបាញ់សម្លាប់បុរសស្បែកខ្មី ប៉ូលិស Michael Slagerត្រូវបានចាប់ខ្លួន កាលពីថ្ងៃអង្គារ និងប្រឈមនឹងបទចោទប្រកាន់ សម្លាប់មនុស្សដោយគិតទុកជាមុន។
ចុះផ្សាយនៅថ្ងៃ៖
ស្តាប់ - ០៧:២៧
រឿងដើមហេតុដំបូងកើតចេញមកពីការត្រួតពិនិត្យជាទម្លាប់របស់ប៉ូលិសអាមេរិក ទៅលើអ្នកបើករថយន្តណាដែលប៉ូលិសមានការសង្ស័យ។ នៅថ្ងៃសៅរ៍ ទី ៤មេសា ប៉ូលិសបានឃាត់រថយន្តរបស់បុរសស្បែកខ្មៅម្នាក់ ឈ្មោះ Walter Scott ពីបទដែលភ្លើងម្ខាងរបស់រថយន្តរបស់គាត់ខូច មិនដំណើរការ។ បុរសស្បែកខ្មៅបានរត់ចេញពីឡាន ចូលទៅក្នុងសួនច្បារសាធារណៈក្បែរនោះ ប៉ុន្តែ ត្រូវប៉ូលិសស្បែកសម្នាក់ តាមពីក្រោយ។
យោងតាមកាសែត អាមេរិកាំង The New York times ប៉ូលិស ដៃដល់ Michael Slager បាននិយាយនៅក្នុងប្រព័ន្ធទាក់ទងប៉ូលិសថា គេបានបាញ់ទៅលើ Walter Scott ក្នុងមូលហេតុការពារខ្លួន។ តាមប៉ូលិស ស្បែស ជីវិតរបស់គេ កំពុងប្រឈមនឹងគ្រោះថ្នាក់ ព្រោះ Walter Scottបានដណ្តើមកាំភ្លើង Taser កាំភ្លើងបាញ់ឲ្យឆក់ ពីដៃរបស់ខ្លួន។
ប៉ូលិសស្បែកស នឹងរួចខ្លួន នៅសុខស្រួល ដូចជាប៉ូលិសមុនៗ ដែលធ្លាប់បាញ់សម្លាប់បុរសស្បែខ្មៅ។ ប៉ុន្តែ ដោយសារខ្សែវីដេអូ ដែលថតបានដោយអ្នកដំណើរតាមផ្លូវម្នាក់ និងដែលត្រូវកាសែត The New York times បានចុះផ្សាយ ប៉ូលិស Michael Slagerត្រូវបានគេចាប់ខ្លួន នៅថ្ងៃអង្គារ គឺ ៣ថ្ងៃក្រោយហេតុការណ៍។
តាមរូបភាពវីដេអូ Michael Slager ជាប៉ូលិសស្បែក ស បានបាញ់សំដៅ Walter Scottចំនួន ៨គ្រាប់ពីក្រោយខ្នង។ ៥គ្រាប់បានរត់ទៅបុកទម្លាយ ខ្លួន Walter Scott និងដែលមួយគ្រាប់ រត់ទៅទម្លុះបេះដូងរបស់ជនរងគ្រោះ។
ប៉ូលិស Michael Slagerបាននិយាយក្នុងប្រព័ន្ធទាក់ទងរបស់ប៉ូលិស គេបាញ់ជនរងគ្រោះ ដើម្បីការពារខ្លួន ប៉ុន្តែ ខ្សែវីដេអូបានបង្ហាញយ៉ាងច្បាស់ថា ប៉ូលិសស្បែកស Michael Slagerបានបាញ់ទៅលើបុរសស្បែកខ្មៅ ពីក្រោយខ្នង ដែលនេះ មិនមែនជាលក្ខណៈការពារខ្លួនទាល់តែសោះ។ រូបភាពវីដេអូនៅបង្ហាញថា ប៉ូលិស Michael Slagerបានទម្លាក់អ្វីម្យ៉ាង នៅក្បែរសាកសព ដែលធ្វើឲ្យគេគិតថា ប៉ូលិសកំពុងបន្លំ ប្តូរដាន នៅកន្លែងកើតហេតុ ឲ្យទៅជារឿងប៉ូលិសបាញ់កាពារខ្លួន។ ចំណុចមួយទៀត ដែលធ្វើឲ្យក្រុមគ្រួសារ រន្ធត់ខ្លាំង គឺ បន្ទាប់ពីបាញ់សម្លាប់ជនរងគ្រោះហើយ ប៉ូលិស Michael Slagerបានចាប់វៃដាក់ខ្នោះជនរងគ្រោះ ដែលបានដេកស្លាប់ក្នុងថ្លុកឈាមរួចទៅហើយនោះ។ រូបភាពវីដេអូ នៅបានបង្ហាញថា ប៉ូលិសបានចាប់ជីពចរ ដើម្បីដឹងថា តើជនរងគ្រោះ នៅរស់ដែរឬទេ គឺមិនបានធ្វើចលនាបេះដូង ដើម្បីធ្វើឲ្យជនរងគ្រោះដឹងខ្លួន ដូចដែលប៉ូលិសបាននិយាយការពារខ្លួននោះទេ។
តាមកាសែតក្នុងស្រុក បុរសស្បែកខ្មៅ Walter Scottអាយុ៥០ឆ្នាំ ធ្លាប់ត្រូវប៉ូលិសស្គាល់មុខ ដោយសារគាត់ត្រូវបានចាប់ឃាត់ខ្លួន ជាង១០ដង ក្នុងបទល្មើសធុនស្រាល មួយចំនួន ដូចជាបង្ករបួសស្នាម ឬមានប្រើដំបងឆក់ជាដើម។ បងប្រុសរបស់ជនរងគ្រោះវិញបាននិយាយថា Walter Scottអាចរត់គេចពីប៉ូលិស ព្រោះគាត់ខ្លាចថា ប៉ូលិសចាប់គាត់ពីរឿង មិនបានបង់ប្រាក់ចិញ្ចឹមឧបត្ថម្ភកូន៤នាក់របស់គាត់ ។ Walter Scottមានការងារធ្វើ និងកំពុងមានសង្សារ។ ដូច្នេះ គាត់មិនចង់ជាប់គុក ដោយសារមិនបានបង់លុយចិញ្ចឹមកូននោះទេ។
កាលពីថ្ងៃអង្គារ Michael Slagerត្រូវបានបណ្តេញចេញពីមុខតំណែងប៉ូលិស និងចាប់ឃុំខ្លួន។ តាំងពីមុនពេលដែលតុលាការបើកការស៊ើបអង្កេតជាផ្លូវការទៅទៀត ចៅហ្វាយក្រុង North Charleston ផ្ទាល់ កាលពីថ្ងៃពុធ ដែលចង់បន្ថយភាពតានតឹង និងកំហឹងរបស់ប្រជាជនដែលតវ៉ានៅមុខសាលាក្រុង បានចាត់ទុកសកម្មភាពរបស់ប៉ូលិស Michael Slagerថា ជាការធ្វើមនុស្សឃាត។ តាមចៅហ្វាយក្រុង សាលាក្រុងនឹងបំពាក់កាម៉េរ៉ា ថតរូបភាព នៅលើខ្លួនប៉ូលិស នៅក្នុងពេលឆាប់ៗខាងមុខ ទៅតាមការកំណត់របស់លោកប្រធានាធិបតីបារ៉ាក់ អូបាម៉ា។
តាមសាលដីកាចាប់ខ្លួន ដែលទីភ្នាក់ងារព័ត៌មានបារាំងAFPបានទទួលអាន កាលពីថ្ងៃពុធ ប៉ូលិស Michael Slagerបានបាញ់សម្លាប់ ជនរងគ្រោះ ដោយខុសច្បាប់ និងដោយមានការគិតទុកជាមុន។ តាមច្បាប់ អាមេរិក Michael Slager អាចប្រឈមនឹងទោសជាប់គុក ៣០ឆ្នាំ ឬទោសប្រហារជីវិត។
ប៉ូលិសស្បែកស តែងតែរួចខ្លួន បើទោះបី ជាគេបានសម្លាប់ជនរងគ្រោះ
នៅក្នុងឃាតកម្ម សម្លាប់ស្មូមយាចក ស្បែកខ្មៅ ម្នាក់ នៅ ទីក្រុងញូវយ៉ក រូបភាពវីដេអូបានបង្ហាញថា ប៉ូលិសចាប់សង្កត់ជនរងគ្រោះ រហូតដល់ដាច់ដង្ហើម ប៉ុន្តែ ប៉ូលិសបានត្រឹមដកចេញពីតំណែង គឺគ្មានត្រូវបានកាត់ទោសអ្វីទេ។
មានការតវ៉ាជាច្រើន ដែលលើកឡើងថា ប៉ូលិសអាមេរិក ដែលភាគច្រើន ជាជនជាតិអាមេរិកាំងស្បែកស បាញ់សម្លាប់ជនជាតិស្បែកខ្មៅ ដោយសារតែការរើសអើង ប្រកាន់ពូជសាសន៍។ តាមការសិក្សារបស់សមាគមការពារប្រជាជនស៊ីវិលមួយ គេឃើញថា ចំនួន ជនជាតិស្បែកខ្មៅ ដែលត្រូវបានប៉ូលិសចាប់ឃាត់ ឬឆេកឆេរ មាន៤ដង ច្រើនជាងប្រជាជនស្បែកស។ នៅក្រោយហេតុការណ៍បាញ់សម្លាប់ជនជាតិស្បែកខ្មៅម្តងៗ សំណួរតែងចោទឡើង អំពីអតុល្យភាពនៃការបែងចែកអំណាច ព្រោះថា ជាទូទៅ ជនស្បែកសច្រើន នៅក្នុងជួរប៉ូលិស គឺដល់ទៅ៨០ ភាគរយ ក្នុងរដ្ឋ ឬទីក្រុង ដែលតាមពិតសំបូរដោយប្រជាជនស្បែកខ្មៅ។
យោងតាមច្បាប់អាមេរិកាំង ប៉ូលិសអាចប្រើអាវុធបាញ់មនុស្សដោយស្របច្បាប់ បើសិនជាប៉ូលិសទទួលការគំរាមកំហែងដល់អាយុជីវិត ឬក្នុងស្ថានភាពដែលប្រជាជនកំពុងស្ថិតនៅក្នុងគ្រោះថ្នាក់។ ក្នុងករណី ខ្លះ ច្បាប់បានបើកសិទ្ធិឲ្យប៉ូលិស បាញ់ បើសិនឧក្រិដ្ឋជនដែលបានប្រព្រឹត្តបទល្មើស ឬឃាតកម្មកំពុងរត់គេចខ្លួន។
ហេតុការណ៍ប៉ូលិសស្បែកស បាញ់សម្លាប់បុរសស្បែកខ្មៅ កាលពីថ្ងៃសៅរ៍ បានស្តែងឲ្យឃើញជាថ្មី ពីអំពើហិង្សារបស់ប៉ូលិស ទៅលើប្រជាជនស៊ីវិល។ យោងតាមអង្គការការពារសិទ្ធិមនុស្សhuman rights watch ចាប់តាំងពីឆ្នាំ ២០០៥ ដល់ឆ្នាំ ២០១១ ប៉ូលិសបានប្រើសិទ្ធិបាញ់ការពារខ្លួន ដោយបានសម្លាប់មនុស្ស២៧០០នាក់។ ប៉ុន្តែ មានតែ៤១ករណីទេ ដែលប៉ូលិសត្រូវចោទប្រកាន់ថា មានកំហុស ធ្វើមិនត្រឹមត្រូវ។ យ៉ាងណាក៏ដោយ ប៉ូលិស មិនដែលត្រូវនាំទៅកាត់ទោស នៅតុលាការទេ។
នៅFergusonក្នុងរដ្ឋមីស៊ូរី បន្ទាប់ពីបាញ់សម្លាប់យុវជនស្បែកខ្មៅ ប៉ូលិសត្រូវបានដោះលែង ទៅវិញ ដោយសារគ្មានភស្តុតាងគ្រប់គ្រាន់។ ការសម្រេចរបស់តុលាការបានបង្កឲ្យមានបាតុកម្មតវ៉ា រហូតឈានដល់ហិង្សា រីករាលដាន ក្នុងទឹកដីអាមេរិក។
តាមអ្នកជំនាញខ្លះ អំពើហិង្សា និងការរំលោភអំណាចរបស់ប៉ូលិស ទៅលើប្រជាជនកើតមានឡើង ដោយសារប្រពៃណីប្រើអាវុធក្នុងចំណោមប្រជាជនអាមេរិកាំង។ ប៉ូលិសថ្នាក់មូលដ្ឋាន នៅ អាមេរិក មានអាវុធប្រើ កាន់តែទំនើបៗ ដែលនៅសេសសល់ពីការធ្វើសង្រ្គាមនៅអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ