លោក ដូណាល់ ត្រាំ ប្ដេជ្ញាចំណាយថវិកាឲ្យអស់តិចបំផុត ដើម្បីសង់ជញ្ជាំងនៅព្រំដែន
ប្រធានាធិបតីអាមេរិក លោក ដូណាល់ ត្រាំ នៅថ្ងៃសៅរ៍ម្សិលមិញនេះបានប្ដេជ្ញាថា រដ្ឋាភិបាលរបស់លោក នឹងចំណាយថវិកាឲ្យអស់តិចបំផុត សម្រាប់សង់ជញ្ជាំងព្រំដែនខណ្ឌចែកអាមេរិកនិងម៉ិចស៊ិក។ លោកត្រាំ នៅមិនទាន់ឲ្យដឹងទេថាតើការសង់ជញ្ជាំងនេះ នឹងចំណាយអស់ថវិកាប៉ុន្មាន។ លោកគ្រាន់តែបញ្ជាក់ថា ជញ្ជាំងតាមព្រំដែនខណ្ឌចែកអាមេរិកនិងម៉ិចស៊ិកនេះ កំពុងតែស្ថិតក្នុងដំណាក់កាលគូសវាសប្លង់ ហើយនៅពេលសាងសង់រួច វានឹងផ្ដល់ប្រយោជន៍ច្រើនដល់អាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នៅក្នុងសំណេរលើបណ្ដាញសង្គម Twitter ប្រធានាធិបតីអាមេរិក លោក ដូណាល់ ត្រាំ បានសរសេរថា គម្រោងសាងសង់ «ជញ្ជាំងដ៏អស្ចារ្យ» ខណ្ឌចែកអាមេរិកនិងម៉ិចស៊ិក មានតម្លៃថ្លៃជាងការរំពឹងទុកពីដំបូងរបស់រដ្ឋាភិបាល។ ប៉ុន្តែលោកថា លោកនៅមិនទាន់បានលូកដៃចូលក្នុងកិច្ចការងារនេះនៅឡើយទេ។ បើតាមលោក ដូណាល់ ត្រាំ នៅពេលលោកចូលប្រឡូកនៅក្នុងការងារសង់ជញ្ជាំងនេះ ការចំណាយនឹងត្រូវធ្លាក់ចុះយ៉ាងគំហុក។
រដ្ឋបាលរបស់លោកដូណាល់ ត្រាំ នៅមិនទាន់បញ្ចេញផែនការនិងគម្រោងចំណាយជាក់ស្ដែងសម្រាប់ការសាងសង់ជញ្ជាំងទេ ខណៈក្នុងពេលឃោសនាបោះឆ្នោត លោកត្រាំ បានប៉ាន់ស្មានថា ការចំណាយអាចស្ថិតក្នុងកម្រិត១០ពាន់លានដុល្លារ។ ប៉ុន្តែយ៉ាងណាក៏ដោយ ការសិក្សាស្រាវជ្រាវដទៃទៀតអះអាងថា រដ្ឋាភិបាលអាមេរិកត្រូវចំណាយថវិកាពី១៥ពាន់លាន ដល់២៥ពាន់លានដុល្លារ ដើម្បីសង់ជញ្ជាំងប្រវែងជាង២ពាន់គីឡូម៉ែត្រ តាមបណ្ដោយព្រំដែនអាមេរិកនិងម៉ិចស៊ិក។
នៅក្នុងសំណេរតាម Twitter ប្រធានាធិបតីអាមេរិកបានបញ្ជាក់អំពីជញ្ជាំងនេះបន្ថែមថា គម្រោងសង់ជញ្ជាំង កំពុងតែស្ថិតក្នុងដំណាក់កាលគូសវាសប្លង់ ហើយនៅពេលសាងសង់រួច វានឹងផ្ដល់ប្រយោជន៍ច្រើនណាស់ដល់អាមេរិក។ ជញ្ជាំងដែលលោកត្រាំចង់បាន គឺ ជញ្ជាំងដែលធ្វើឡើងពីថ្មបេតុង កំពស់ជាង១០ម៉ែត្រ និងដាក់កប់ជ្រៅ ទៅក្នុងដី ដើម្បីទប់ស្កាត់កុំឲ្យជនអន្តោរប្រវេសន៍ អាចជីករូងក្រោមដី ឆ្លងចូលក្នុងទឹកដីអាមេរិកបាន។
សូមរំឭកជូនថា ការសង់ជញ្ជាំងនៅព្រំដែនម៉ិចស៊ិក និងអាមេរិក គឺជានយោបាយចំបងរបស់លោកដូណាល់ ត្រាំ ដែល ធ្លាប់បានសន្យាដែរថា នឹងធ្វើឲ្យម៉ិចស៊ិកចេញលុយសង់ជញ្ជាំង។ រដ្ឋាភិបាលម៉ិចស៊ិកដែលថ្កោលទោស ក្រឹត្យបញ្ជាឲ្យសង់ជញ្ជាំង បានថ្កោលទោសជាថ្មី នៅពេលអាមេរិកបង្ហើបពីគម្រោងតម្លើងពន្ធ២០ភាគរយលើផលិតផលនាំចូលពីម៉ិចស៊ិក ដើម្បីយកលុយទៅសង់ជញ្ជាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ