តួកគី ប្រកាសបើកប្រតិបត្តិការយោធានៅលើទឹកដ៏ស៊ីរី ក្នុងពេលដ៏ឆាប់ៗ
ភាពស្រពិចស្រពិលកំពុងកើតមាននៅតាមព្រំដែនខាងជើងប្រទេសស៊ីរីជាមួយតួកគី។ តួកគីបានប្រកាសត្រៀមចេញធ្វើប្រតិបត្តិការយោធាថ្មី នៅលើទឹកដីស៊ីរី ប្រឆាំងនឹងកងប្រដាប់អាវុធប្រជាធិបតេយ្យស៊ីរី ដែលភាគច្រើនជាគួដឌីស្ថាន។ សេចក្តីប្រកាសនេះ ធ្វើឡើងបើទោះបីជាប្រធានាធិបតីអាមេរិក ប្រាប់ថាអាមេរិកមិនបោះបង់ក្រុមគូដឌីស្ថានយ៉ាងណាក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
តាំងពីថ្ងៃចន្ទមក យោធាតួកគី បានបញ្ជូនកងកម្លាំងដូចជារថក្រោះទៅ ព្រំដែនស៊ីរី រថពាសដែកថ្មីៗបានទៅដល់តាមក្រោយនៅថ្ងៃអង្គារ ក្បួនយោធារាប់សិបឡាន បានទៅផ្តុំកម្លាំងនៅក្រុង Akçakale ជាប់ព្រំដែន។ បន្ថែមពីលើទិដ្ឋភាពថានឹងអាចមានការវាយប្រហារលើក្រុមប្រដាប់អាវុធគូដឌីស្ថាន រដ្ឋមន្ត្រីក្រសួងការពារជាតិតួកគីបានគូសបញ្ជាក់ថា ការរៀបចំបើកប្រតិបត្តិការបានត្រៀមរួចស្រេចបាច់ហើយ !
ទាហានតួកគីនឹងឆ្លងព្រំដែនទៅធ្វើប្រតិបត្តិការប្រឆាំងនឹងកងប្រដាប់អាវុធប្រជាធិបតេយ្យស៊ីរី ដឹកនាំដោយចលនាគួដឌីស្ថាន នឹង ចាប់ផ្តើមក្នុងពេលដ៏ឆាប់ៗ ! ទាហានគួដឌីស្ថានអាចចុះចូលជាមួយតួកគី ឬមិនដូច្នោះទេ តួកគីគ្មានជម្រើសអ្វីនឹងត្រូវវាយបំបែកក្រុមដែលរំខានការប្រយុទ្ធប្រឆាំងនឹងពួកអង្គការរដ្ឋអ៊ីស្លាម។ នេះបើតាមសេចក្តីថ្លែងការណ៍របស់វិមានប្រធានាធិបតីតួកគីចុះផ្សាយក្នុងក្នុងកាសែតវ៉ាស៊ីនតោនប៉ុស្តិ៍។
ប៉ុន្តែបើតាមប្រភពកងកម្លាំងគួដឌីស្ថាន យោធាតួកគីបានបើកផ្តើមទម្លាក់គ្រាប់បែកលើមូលដ្ឋានទ័ពរបស់គួដឌីស្ថាន តាំងពីល្ងាចថ្ងៃអង្គារមកម្ល៉េះ។ ជាមូលដ្ឋានដែលទាហានអាមេរិកទើបដកចេញកាលពីចន្ទ។
តើតួកគីពិតជានឹងបើកប្រតិបត្តិការលើទឹកដីស៊ីរីមែនឬយ៉ាងណា ? ពេលនេះ ភាពសង្ស័យនិងច្របូលច្របល់ មានកាន់តែខ្លាំង ព្រោះសូមបញ្ជាក់ថាកាលពីល្ងាចថ្ងៃអាទិត្យទី ៦តុលា សេតវិមានបានប្រកាសដកកងទ័ពអាមេរិកដែលឈរជើងនៅតាមបណ្តោយព្រំដែនស៊ីរី-តួកគី ដើម្បីឱ្យតួកគីអាចបើកយុទ្ធនាការទ្រង់ទ្រាយធំនៅភាគខាងជើងប្រទេស តាមផែនការគ្រោងទុកតាំងពីយូរមក។ សេចក្តីសម្រេចនេះបានរងការរិះគន់យ៉ាងខ្លាំង ថាអាមេរិកបោះបង់សម្ព័ន្ធមិត្តគួដឌីស្ថាន។ នៅទីបំផុត លោកដូណាល់ ត្រាំ បានកែតម្រូវសុន្ទរកថារបស់ខ្លួន ដោយអះអាង “សេដ្ឋកិច្ចប្រទេសនឹងត្រូវខ្ទេចខ្ទាំទាំងស្រុង បើតួកគីហ៊ានកន្លងបន្ទាត់ហាមឃាត់។ អាមេរិកកំពុងចាកចេញពីស៊ីរី មែន តែមិនបោះបង់ទាហានគួដឌីស្ថានឡើយ អាមេរិកបន្តផ្តល់ជំនួយហិរញ្ញវត្ថុនិងអាវុធដល់ពួកគេដដែល”។ តែលោកត្រាំក៏បានប្រកាសទទួលលោកអ៊ែរដូហ្កានប្រធានាធិបតី នៅវ៉ាស៊ីនតោន នៅថ្ងៃទី ១៣វិច្ឆកាខាងមុខ។
អាមេរិកធ្លាប់ឃាត់តួកគីបាននៅនាទីចុងក្រោយមិនឱ្យវាយប្រហារលើស៊ីរីម្តងហើយ កាលពីខែសីហាកន្លងទៅ ដោយស្នើចាប់ដៃគ្នាបង្កើត តំបន់សន្តិសុខ តាំងពីពេលនោះមកអង់ការ៉ាតែងបរិហារសកម្មភាពយឺតយ៉ាវ និងគំរាមបើកយុទ្ធនាការជាឯកតោភាគីរហូត។
ប្រឈមនឹងស្ថានការណ៍បែបនេះ សហគមន៍អន្តរជាតិ អង្គការសហប្រជាជាតិ សហភាពអឺរ៉ុបបានសម្តែងក្តីព្រួយបារម្ភយ៉ាងខ្លាំង ខ្លាចមានវិបត្តិមនុស្សធម៌កើតឡើងជាថ្មីនៅស៊ីរី។ សង្គ្រាមស៊ីរី តាំងពីឆ្នាំ២០១១មកបានសម្លាប់ជីវិតមនុស្សអស់ជាង៣សែន ៧ម៉ឺននាក់ និងជនផ្លាស់ទីរាប់លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ