រញ្ជួយដីខ្លាំងនៅកាលីហ្វ័រញ៉ា តែគ្មានការខូចខាតធំដុំ
រដ្ឋកាលីហ្វ័រញ៉ា បានជួបហេតុរញ្ជួយដី កំរិត ៦,៤ រ៉ិចទ័រ នៅថ្ងៃព្រហស្បតិ៍ទី ៤ កក្កដាម្សិលមិញ។ ជាការរញ្ជួយដី ដ៏ខ្លាំង ដែលពុំធ្លាប់កើតមាននៅក្នុងរដ្ឋនេះទេ គិតចាប់តាំងពី ឆ្នាំ១៩៩៩មក។ ប៉ុន្តែជាសំណាងល្អគ្រោះធម្មជាតិនេះមិនបានបង្កឱ្យការបាត់បង់ជីវិតមនុស្សទេ មានតែអ្នករងរបួសស្រាលពីរបីនាក់ និងការខូចខាតសម្ភារៈតិចតួច។ នេះបើតាមតុល្យការដំបូងផ្តល់ដោយក្រុមអ្នកសង្គ្រោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
រញ្ជួយដីបានកើតឡើងនៅវេលាម៉ោង១០និង៣៣នាទីព្រឹក ក្នុងកំរិត ៦,៤រ៉ិចទ័រ។ ហើយដីបានបន្តរញ្ជួយ ប្រមាណ១០០ដងបន្តបន្ទាប់ទៀត ក្នុងកំរិតក្រោម៤រ៉ិចទ័រ។ អាគារស្នាក់នៅជាច្រើន បានឆេះ បំពង់បង្ហូរទឹកស្អាតដាច់ធ្លាយ បង្គោលភ្លើងដាច់ដួល ផ្លូវថ្នល់ជាច្រើនត្រូវខូចខាត លែងប្រើបាន។ តែសំណាងល្អ គ្រោះរញ្ជួយដីនេះ មិនបានបង្កឱ្យមានការបាត់បង់ជីវិតមនុស្សទេ។
ជាការខូចខាតជាសម្ភារៈមិនធំដុំទេ បើយោលទៅលើកម្លាំងនៃការរញ្ជួយដី ប៉ុន្តែរញ្ជួយដីនេះបំផុសឱ្យមានការភ័យតក់ស្លុតយ៉ាងខ្លាំង ខ្លាចថាជាគ្រោះ Big One ដ៏ធ្ងន់ធ្ងរខ្លាំង។
ចំណុចកណ្តាលនៃការរញ្ជួយដី ស្ថិតនៅជម្រៅ ១០គីឡូម៉ែត្រក្រោមដី ក្នុងតំបន់ដាច់ស្រយាល ក្បែរក្រុងRidgecret ដ៏តូចមួយ (ដែលមានប្រជាជនរស់នៅ ២៨០០០នាក់) នៃរដ្ឋកាលីហ្វរញ៉ា។ កម្លាំងរញ្ជួយបានអង្រួនរង្គើដល់ក្រុងLos Angeles ដែលស្ថិតចម្ងាយប្រមាណ ២៤០គីឡូម៉ែត្រពីគ្នា។ ចំណុចរញ្ជួយនៅឆ្ងាយពីតំបន់ប្រជុំជនមែន តែក្នុងតំបន់វាលរហោស្ថាននេះ មានមូលដ្ឋានយោធាអាមេរិក US Navy Naval Air Weapons Station China Lake កន្លែងដែលទ័ពអាមេរិកតែងមកសាកល្បងគ្រាប់បែកនិងមីស៊ីល។ អ្នកទទួលខុសត្រូវមូលដ្ឋាន បានគូសបញ្ជាក់ថាមានផ្ទុះអគ្គីភ័យ ការធ្លាយទឹក និងការបែកធ្លាយសារធាតុគ្រោះថ្នាក់មួយចំនួន។ មេបញ្ជាការដ្ឋានកំពុងធ្វើការវាយតម្លៃអំពីការខូចខាតនេះ និងមិនបានផ្តល់ព័ត៌មានលម្អិតអ្វីច្រើនទេ។
កាលីហ្វ័រញ៉ា ជារដ្ឋដែលមានប្រជាពលរដ្ឋរស់នៅច្រើនជាងគេនៅសហរដ្ឋអាមេរិក និងរស់ក្នុងស្ថានភាពប្រឈមនឹងគ្រោះរញ្ជួយដីធ្ងន់ធ្ងរជាប្រចាំ។ ដីអាចនឹងរកការរញ្ជួយជាថ្មីទៀត ហើយខ្លះអាចជាការរញ្ជួយខ្លាំង។ នេះបើតាមការព្យាកររបស់អ្នកវិទ្យាសាស្ត្រ។ គ្រប់អ្នកជំនាញព្រួយបារម្ភខ្លាចតែការរញ្ជួយដីកើតឡើងនៅតំបន់ San Andreas តំបន់ប្រជុំជនរបស់Los Angeles និងតាមបណ្តោយឆ្នេរ ដែលមានមនុស្សរស់នៅច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ