អ៊ីរ៉ង់អះអាងថា បានបាញ់ទម្លាក់យន្តហោះដ្រូនរបស់អាមេរិក
អ៊ីរ៉ង់ នៅថ្ងៃព្រហស្បតិ៍ទី ២០មិថុនា បានប្រកាសថា កងទ័ពរបស់ខ្លួនរបស់បាញ់ទម្លាក់យន្តហោះដ្រូន គ្មានមនុស្សបើក មួយគ្រឿងរបស់អាមេរិក ដែលបានហោះ ចូល ដោយខុសច្បាប់ ក្នុងដែនអាកាសរបស់អ៊ីរ៉ង់។ មន្រ្តីយោធាអាមេរិក បញ្ជាក់បន្ថែម ដំណឹងនេះ ប៉ុន្តែ ទាំងភាគីអ៊ីរ៉ង់ និងអាមេរិក មានព័ត៌មានមិនដូចគ្នា ត្រង់ទីតាំង ហើយនិងប្រភេទយន្តហោះដ្រូនដែលត្រូវមីស៊ីលអ៊ីរ៉ង់បាញ់ទម្លាក់ នៅ ព្រឹកថ្ងៃព្រហស្បតិ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
នៅក្នុងសេចក្តីថ្លែងការណ៍ នៅថ្ងៃព្រហស្បតិ៍នេះ ឆ្មាំបដិវត្តន៍អ៊ីស្លាមរបស់អ៊ីរ៉ង់បានអះអាងថា ខ្លួនបានបាញ់ទម្លាក់យន្តហោះដ្រូន យកការណ៍ របស់អាមេរិក នៅក្នុងខេត្តជាប់ឆ្នេរសមុទ្រ។ តាមឆ្មាំបដិវត្តន៍អ៊ីរ៉ង់ កងកម្លាំងការពារទ័ពអាកាសបានប្រើមីស៊ីល បាញ់ទម្លាក់យន្តហោះដ្រូនអាមេរិក ប្រភេទ RQ-4 Global Hawk នៅពេលវាហោះចូលក្នុងដែនអាកាសរបស់អ៊ីរ៉ង់។
សម្រាប់ អគ្គមេបញ្ជាការឆ្មាំបដិវត្តអ៊ីរ៉ង់ លោក Hossein Salami ព្រំដែនអ៊ីរ៉ង់ គឺជាខ្សែបន្ទាត់ក្រហម ហើយការបាញ់ទម្លាក់យន្តហោះដ្រូន គឺជាសារយ៉ាងច្បាស់មួយពីខាងអ្នកការពារព្រំដែនអ៊ីរ៉ង់។
នៅក្រោយការប្រកាសរបស់អ៊ីរ៉ង់ អ្នកទទួលខុសត្រូវអាមេរិកម្នាក់ បានបញ្ជាក់ព័ត៌មាននេះ ទៅទីភ្នាក់ងារព័ត៌មានអង់គ្លេស Reuters ថា យន្តហោះដ្រូនរបស់អាមេរិក ត្រូវបានបាញ់ទម្លាក់ នៅពេលវាកំពុងហោះនៅក្នុងដែនអាកាសអន្តរជាតិ នៅពីលើច្រកសមុទ្រ Ormuz។ ចំណែកយន្តហោះដ្រូនដែល ត្រូវមីស៊ីល បាញ់ទម្លាក់នោះ ជាប្រភេទយន្តហោះMQ-4C Tritonរបស់កងទ័ពជើងទឹកអាមេរិក។
ទូរទស្សន៍រដ្ឋអ៊ីរ៉ង់បានចុះផ្សាយថា តំបន់ដែលមីស៊ីលរបស់ឆ្មាំបដិវត្តន៍អ៊ីរ៉ង់បាញ់ទម្លាក់យន្តហោះដ្រូនអាមេរិក ស្ថិតនៅក្បែរច្រកសមុទ្រOrmuz ប៉ុន្តែ មិនបានបង្ហាញរូបភាពយន្តហោះដ្រូនដែលត្រូវបានបាញ់ទម្លាក់នោះទេ។
ថ្មីៗនេះ កងទ័ពអាមេរិក ធ្លាប់បានចោទប្រកាន់អ៊ីរ៉ង់ ថា ធ្លាប់បានប៉ុនប៉ងបាញ់ទម្លាក់យន្តហោះដ្រូនរបស់អាមេរិក និងថា យន្តហោះដ្រូនមួយគ្រឿងរបស់ខ្លួន ត្រូវបានពួកឧទ្ទាមហ៊ូទី នៅយេម៉ែន ដែលគាំទ្រដោយកងទ័ពអ៊ីរ៉ង់ បានបាញ់ទម្លាក់ផងដែរ កាលពីថ្ងៃទី ៦មិថុនាកន្លងទៅ។
ហេតុការណ៍បាញ់ទម្លាក់យន្តហោះដ្រូនអាមេរិក កើតជួនចំពេលដែលអាមេរិក និងអ៊ីរ៉ង់ កំពុងតានតឹងខ្លាំងនឹងគ្នា ពោល គឺចាប់តាំងអាមេរិក ដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ និងបានត្រលប់ទៅដាក់ទណ្ឌកម្មសេដ្ឋកិច្ចលើអ៊ីរ៉ង់។
ទោះបីជាភាគីអាមេរិក និងអ៊ីរ៉ង់បានប្រកាសថា ខ្លួនមិនចង់បង្កសង្រ្គាម ប៉ុន្តែ ហេតុការណ៍អាក្រក់ៗ ផ្ទួនៗគ្នា នៅឈូងសមុទ្រ ពែរ្ស នៅមួយខែមកនេះ ធ្វើឲ្យគេខ្លាចថា អំបែងភ្លើង តូចមួយ នឹងអាចធ្វើឲ្យផ្ទុះ កើតមានភ្លើងសង្រ្គាម សាជាថ្មី នៅតំបន់ឈូងសមុទ្រ។
នៅថ្ងៃចន្ទ រដ្ឋមន្រ្តីការពារជាតិអាមេរិកបានប្រកាសបញ្ជូនបន្ថែម កងទ័ពអាមេរិក ១ពាន់នាក់ទៀត ទៅតំបន់ដើមបូព៌ា នៅក្រោយ ការវាយប្រហារទៅលើកប៉ាល់ដឹកប្រេង ដែលអាមេរិកបានចោទប្រកាន់ ទម្លាក់កំហុសទៅលើអ៊ីរ៉ង់ ថា ជាអ្នកប្រព្រឹត្ត។ អ៊ីរ៉ង់វិញបានបដិសេធទាត់ចោលការចោទប្រកាន់របស់អាមេរិក និងវាយបកទៅវិញ ថា ការវាយប្រហារទៅលើកប៉ាល់ដឹកប្រេងជប៉ុន និងន័រវែស អាចជារឿងរៀបចំឡើង ដោយភាគីអាមេរិក ដើម្បីយកលេស ប្រើកម្លាំងយោធាវាយប្រហារទៅលើអ៊ីរ៉ង់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ