អារ៉ាប៊ី សាអូឌីតទាមទារឲ្យមានវិធានការឆ្លើយតបរហ័ស ទៅនឹងការគំរាមកំហែងលើប្រភពផ្គត់ផ្គង់ថាមពល
២ថ្ងៃក្រោយ ការវាយប្រហារទៅលើកប៉ាល់ដឹកប្រេង នៅឈូងសមុទ្រ អូម៉ង់ ប្រទេសអេមីរ៉ាអារ៉ាប់រួម បានអំពាវនាវឲ្យសហគមន៍អន្តរជាតិ ចូលរួមធានាសន្តិសុខដល់ចរាចរណ៍ដឹកជញ្ជូន ថាមពល ដែលមានប្រភពចេញមកពីតំបន់ឈូងសមុទ្រពែរ្ស។ មានជំហរដូច អេមីរ៉ា អារ៉ាប់រួម រដ្ឋមន្រ្តីក្រសួងថាមពលអារ៉ាប៊ី សាអូឌីត នៅក្នុងអង្គប្រជុំរបស់រដ្ឋមន្រ្តីថាមពលរបស់ក្រុមប្រទេស មហាឧស្សាហកម្ម G20 បានទាមទារផងដែរឲ្យមានការចាត់វិធានការរហ័សមួយទៅនឹងការគំរាមកំហែងលើការផ្គត់ផ្គង់ប្រភពថាមពល នៅឈូងសមុទ្រពែរ្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
នៅក្នុងកិច្ចប្រជុំ ថ្នាក់រដ្ឋមន្រ្តីថាមពលនិងបរិស្ថានរបស់ក្រុមប្រទេសមហាឧស្សាហកម្ម G20 នៅប្រទេសជប៉ុន រដ្ឋមន្រ្តីអារ៉ាប៊ី សាអូឌីតបានទាមទារឲ្យមានចម្លើយឆាប់រហ័ស ទៅនឹងការគំរាមកំហែង ដែលបង្កើតឡើង ថ្មីៗនេះ ដោយក្រុមភេរវនិយម នៅក្នុងឈូងសមុទ្រអារ៉ាប់។ រដ្ឋមន្រ្តីថាមពលអារ៉ាប៊ី សាអូឌីតចង់សំដៅដល់ការវាយប្រហារទៅលើកប៉ាល់ដឹកប្រេង ២គ្រឿង នៅឈូងសមុទ្រអូម៉ង់ កាលពីថ្ងៃព្រហស្បតិ៍ ដែលជាមូលហេតុធ្វើឲ្យប្រេងឡើងថ្លៃ មួយកម្រិតទៀត នៅទីផ្សារអន្តរជាតិ។
សម្រាប់ រដ្ឋមន្រ្តីពាណិជ្ជកម្មជប៉ុន ដែលមានវត្តមានចូលរួមកិច្ចប្រជុំក្រុមប្រទេសG20 ទាក់ទងនឹងសន្តិសុខថាមពលពិភពលោក វាមានសារៈសំខាន់ណាស់ដែលសហគមន៍អន្តរជាតិត្រូវចូលរួមសហការទាំងអស់គ្នាដើម្បី គ្រប់គ្រងស្ថានការណ៍។
តាំងពីជំនួបកំពូលនៅ ប្រទេសបុលហ្គារី រដ្ឋមន្រ្តីការបរទេសរបស់ប្រទេសអេមីរ៉ា អារ៉ាប់រួម វិញបានអំពាវនាវឲ្យសហគមន៍អន្តរជាតិសហការគ្នា ដើម្បី ធានាការពារសុវត្ថិភាពនិងសន្តិសុខ នៅឈូងសមុទ្រ អូម៉ង់ ដែលជាច្រកចេញចូលសំខាន់សម្រាប់១ភាគបីនៃចរាចរណ៍ដឹកប្រេងតាមផ្លូវទឹក នៅក្នុងពិភពលោក។ “តំបន់ដើមបូព៌ាស្មុគស្មាញ និងសំបូរដោយប្រភពថាមពល មិនថា ប្រេង ឬឧស្ម័នដែលសំខាន់សម្រាប់ពិភពលោកទាំងមូល។ យើងចង់ឲ្យការដឹកជញ្ជូន ផ្គត់ផ្គង់ថាមពលទាំងនោះ នៅតែរលូន ដើម្បីធានាស្ថិរភាពសេដ្ឋកិច្ចសកល”។ នេះជាប្រសាសន៍របស់ប្រមុខការបរទេសអេមីរ៉ា អារ៉ាប់រួម។
អេមីរ៉ា អារ៉ាប់រួម ដែលមានព្រំដែនទឹក ជាមួយអ៊ីរ៉ង់ នៅត្រង់ឈូងសមុទ្រ អូម៉ង់ បានអំពាវនាវផងដែរ ភាគីជម្លោះ ទប់ចិត្ត ទប់កំហឹងនៅក្នុងផ្ទៃ សង្រ្គាមពាក្យសំដីរវាងអាមេរិក និងអ៊ីរ៉ង់។
ដូចករណីវាយប្រហារទៅលើកប៉ាល់ ដឹកប្រេង ៤គ្រឿង កាលពី១ខែមុន ប្រធានាធិបីអាមេរិក លោកដូណាល់ ត្រាំ ដែលពឹងផ្អែកលើរូបថត របស់ចារកិច្ចអាមេរិក បានចោទប្រកាន់ អ៊ីរ៉ង់ថា ជាអ្នកវាយប្រហារទៅកប៉ាល់ដឹកប្រេងជប៉ុន និងន័រវែសនៅថ្ងៃព្រហស្បតិ៍។ ការចោទប្រកាន់ដែលអ៊ីរ៉ង់បានបដិសេធទាត់ចោលរហូតមក។
ប្រតិកម្មទៅនឹងពាក្យគំរាមរបស់អ៊ីរ៉ង់ដែលថា នឹងបិទច្រកសមុទ្ទយុទ្ធសាស្ត្រ Ormuz ដែលភ្ជាប់ទៅឈូងសមុទ្រ អូម៉ង់ ក្នុងករណីមានភាពប្រឈមយោធាជាមួយនឹងសហរដ្ឋអាមេរិក លោកប្រធានាធិបតីដូណាល់ ត្រាំ បានអះអាង កាលពីថ្ងៃសុក្រថា អ៊ីរ៉ង់ នឹងមិនអាចបិទច្រកសមុទ្របានទេ ហើយអ៊ីរ៉ង់ដឹងរឿងនេះច្បាស់ណាស់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ