អ៊ីរ៉ង់ថានៅតែអាចបន្តលក់ប្រេងបាន ទោះបីជាប់ទណ្ឌកម្មអាមេរិក
ទោះបីជាជាប់ទណ្ឌកម្មអាមេរិកយ៉ាងណាក៏ដោយ ក៏អ៊ីរ៉ង់នៅតែអាចបន្តនាំប្រេងចេញបានដដែល ! គឺនាំចេញទៅលក់តាមរយៈទីផ្សារក្រៅផ្លូវការ ឬទីផ្សារងងឹត។ នេះបើតាមប្រសាសន៍របស់រដ្ឋមន្ត្រីក្រសួងប្រេងកាតអ៊ីរ៉ង់ នៅក្នុងបទសម្ភាសន៍មួយ ក្រោយពីអ៊ីរ៉ង់បានច្រានចោលសំណើរបស់បារាំងចង់រៀចំឱ្យមានការចរចានុយក្លេអ៊ែរអ៊ីរ៉ង់ឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
អ៊ីរ៉ង់បាននាំចេញប្រេងឆៅទៅលក់ នៅតាមទីផ្សារក្រៅផ្លូវការ ឬក្រៅផ្លូវច្បាប់ ដែលសុទ្ធសឹងជាទីផ្សារសម្ងាត់។ អ៊ីរ៉ង់មិនអាចប្រាប់ថាជាទីផ្សារអ្វីបានឡើយ ព្រោះបើពុំនោះទីអាមេរិកនឹងទៅបិទបញ្ឈប់ភ្លាមជាមិនខាន។ នេះការបង្ហើបឱ្យដឹងរបស់លោករដ្ឋមន្ត្រីក្រសួងថាមពលប្រេងឥន្ធនៈ ដែលបដិសេធមិនផ្តល់ព័ត៌មានលម្អិតអ្វីបន្ថែមទាក់ទងនឹងការលក់ដូរនេះទេ។ សម្រាប់លោករដ្ឋមន្ត្រី អ៊ីរ៉ង់នឹងអាចផ្តល់តួលេខស្តីអំពីការលក់ប្រេងឆៅដោយសម្ងាត់នេះបាន ដរាបណាតែអាមេរិកលើកទណ្ឌកម្មចេញពីអ៊ីរ៉ង់តែប៉ុណ្ណោះ។
ទណ្ឌកម្មអាមេរិកដាក់លើអ៊ីរ៉ង់នៅពេលនេះ ជាទណ្ឌកម្មដ៏ធ្ងន់ធ្ងរបំផុតមិនធ្លាប់មានទេក្នុងប្រវត្តិសាស្ត្រ ប៉ុន្តែអាមេរិកគ្មានអ្វីអាចដាក់បន្ថែមឱ្យលើសពីនេះទៀតទេ ! នេះជាការយល់ឃើញរបស់លោករដ្ឋមន្ត្រីដដែល ដែលធ្លាប់អះអាងជាញយដងមកហើយថា ចេតនាអាមេរិកចង់កាត់បន្ថយការនាំចេញប្រេងអ៊ីរ៉ង់ឱ្យដល់កំរិតសូន្យ ជាគំនិតរវើរវាយ។
សូមបញ្ជាក់ថាក្រោយពីសម្រេចដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ជាឯកតោភាគីមក អាមេរិករបស់លោកត្រាំ បានអនុវត្តនយោបាយគាបសង្កត់ដាក់ទណ្ឌកម្មមួយហើយមួយទៀត ក្នុងកំរិតជាអតិបរិមា ដើម្បីបង្ខំឱ្យអ៊ីរ៉ង់ចរចាឡើងវិញ។
ប៉ុន្តែអ៊ីរ៉ង់មិនញញើត និងបដិសេធមិនសើរើជាដាច់ខាត កិច្ចព្រមព្រៀមក្រុងវីយ៉ែនដែលសម្រេចបានកាលពីឆ្នាំ២០១៥ និងដែលអាល្លឺម៉ង់ បារាំង ចិន អង់គ្លេស និងរុស្ស៊ី នៅបន្តគាំទ្រនិងការពារ។ គំនិតផ្តួចផ្តើមរបស់ប្រធានាធិបតីបារាំង ក្រោយមានជំនួបមួយទល់នឹងមួយជាមួយលោកដូណាល់ ត្រាំ កាលពីថ្ងៃព្រហស្បតិ៍ ចង់មានកិច្ចចរចាថ្មីស្តីពីនុយក្លេអ៊ែរ ក៏ត្រូវបានអ៊ីរ៉ង់ច្រានចោលទៀត។
អ៊ីរ៉ង់ធ្លាប់ទាំងបានគំរាម កាលពីខែឧសភា ចង់ដើរចេញពីកិច្ចព្រមព្រៀងអន្តរជាតិតែម្តង។ រហូតមកទល់ពេលនេះ អ៊ីរ៉ងបានដាក់លក្ខខណ្ឌច្បាស់លាស់មួយថាអាចនឹងព្រមនិយាយរកអាមេរិកវិញ ដរាបណាតែវ៉ាស៊ីនតោនលើកទណ្ឌកម្មចេញ និងត្រលប់មកចរចាក្នុងក្របខ័ណ្ឌកិច្ចព្រមព្រៀងអន្តរជាតិក្រុងវីយ៉ែនតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ