លោកដូណាល់ ត្រាំគំរាមដំឡើងពន្ធ បើសិនម៉ិចស៊ិកមិនជួយទប់ស្កាត់លំហូរជនអន្តោប្រវេសន៍
ចុះផ្សាយនៅថ្ងៃ៖
ស្តាប់ - ០៧:៣៣
ខឹងក្តៅក្រហាយខ្លាំងនឹងលំហូរជនអន្តោប្រវេសន៍ខុសច្បាប់ កាន់តែច្រើន នៅព្រំដែនជាមួយប្រទេសម៉ិចស៊ិក ប្រធានាធិបតីអាមេរិក លោកដូណាល់ ត្រាំនៅថ្ងៃព្រហស្បតិ៍ ទី ៣១ឧសភា បានប្រកាស គំរាមដំឡើង បានគំរាមដំឡើងពន្ធ ពី ៥% រហូតដល់២៥% លើទំនិញនាំចូលពីម៉ិចស៊ិក ចាប់ពីថ្ងៃទី ១០មិថុនា បើសិន រដ្ឋាភិបាលម៉ិចស៊ិកមិនចាត់វិធានការទប់ស្កាត់ លំហូរជនអន្តោប្រវេសន៍ ដែលឆ្លងដែនខុសច្បាប់ចូលទឹកដីអាមេរិក។ តើមធ្យោបាយគំរាមដំឡើងពន្ធលើទំនិញម៉ិចស៊ិក នឹងអាចមានប្រសិទ្ធិភាព ដើម្បីទប់ស្កាត់ កុំឲ្យជនអន្តោប្រវេសន៍ ឆ្លងដែនខុសច្បាប់ចូលទៅទឹកដីអាមេរិកដែរឬទេ?
ប្រធានាធិបតីអាមេរិក លោកដូណាល់ ត្រាំ នៅថ្ងៃព្រហស្បតិ៍ម្សិលមិញ បានប្រកាស គំរាមដំឡើងពន្ធលើផលិតផលនាំចូលពីម៉ិចស៊ិក បើសិន រដ្ឋាភិបាលម៉ិចស៊ិក មិនចាត់វិធានការទប់ស្កាត់ លំហូរជនអន្តោប្រវេសន៍ ដែលកំពុងប្រើប្រាស់ទឹកដីម៉ិចស៊ិក ដើម្បី ឆ្លងដែនខុសច្បាប់ចូលទឹកដីអាមេរិក។ តាមសេចក្តីថ្លែងការណ៍របស់សេតវិមាន ចាប់ពីថ្ងៃទី ១០មិថុនាតទៅ អាមេរិកនឹងដំឡើងពន្ធ ពី ៥% ដល់២៥% លើទំនិញ នាំចូលពីម៉ិចស៊ីក បើសិនរដ្ឋាភិបាលម៉ិចស៊ិកមិនចាត់វិធានការដោះស្រាយបញ្ហាជនអន្តោប្រវេសន៍។
រហូតមកដល់សព្វថ្ងៃនេះ ទំនិញម៉ិចស៊ិក ត្រូវនាំចូលទៅអាមេរិក ដោយសេរី ដោយគ្មានបង់ពន្ធអ្វីនោះទេ។ ប៉ុន្តែ ចាប់ពីថ្ងៃ ទី ១០មិថុនាខាងមុខ កម្រិតដំឡើងពន្ធ លើទំនិញនាំចូលពីម៉ិចស៊ិក ទៅអាមេរិក នឹងកើនឡើងប្រមាណ ៥% ក្នុងមួយខែៗ។ ចាប់ពីខែ តុលា ឆ្នាំនេះ អាមេរិកនឹងដំឡើងពន្ធដល់២៥%លើទំនិញនាំចូលពីម៉ិចស៊ិក បើសិន អាមេរិកវាយតម្លៃថា រដ្ឋាភិបាលម៉ិចស៊ិកគ្មានចាត់វិធានការគ្រប់គ្រាន់ ដើម្បីទប់ស្កាត់ លំហូរជនអន្តោប្រវេសន៍ ទៅក្នុងទឹកដីអាមេរិក។
សេតវិមានអះអាងថា ការដំឡើងពន្ធលើទំនិញនាំចូលពីម៉ិចស៊ិក នឹងមិនទៅបំផ្លាញ កិច្ចព្រមព្រៀង អាមេរិក កាណាដា និងម៉ិចស៊ិក
នៅថ្ងៃព្រហស្បតិ៍ រដ្ឋបាលលោកដូណាល់ ត្រាំ បានបញ្ជូន កិច្ចព្រមព្រៀង អាមេរិក ម៉ិចស៊ិក និងកាណាដា មានចែងពីការដោះដូរពាណិជ្ជកម្មដោយសេរី ការលុបចោលរបាំងពន្ធគយរវាងប្រទេសទាំងបី ទៅឲ្យសភាផ្តល់សច្ចាប័ន។ នៅថ្ងៃដដែល លោកដូណាល់ ត្រាំ បានប្រកាសគំរាមដំឡើងពន្ធលើទំនិញនាំចូលពីម៉ិចស៊ិក។ លោកដូណាល់ ត្រាំ កំពុងតែដើរបញ្ច្រាសផ្ទុយ ពីអត្ថន័យ របស់កិច្ចព្រមព្រៀងអាមេរិក-ម៉ិចស៊ិក-កាណាដា (USMCA) ដែលលោកផ្ទាល់ បានចុះត្ថលេខា កាលពីចុងឆ្នាំ ២០១៨។ តាមរយៈកិច្ចព្រមព្រៀង កាណាដា និងម៉ិចស៊ិកបានចរចាឲ្យអាមេរិកលុបចោលទៅវិញ ពន្ធលើដែកថែប និងអាលុយមីញ៉ូម នាំចូលពី កាណាដា និងម៉ិចស៊ិក ដែលលោកដូណាល់ ត្រាំបានប្រកាស ដំឡើង នៅឆ្នាំ ២០១៧។ លើកនេះ ដោយប្រកាស ដំឡើងពន្ធលើផលិតផលនាំចូលពីម៉ិចស៊ិក ដោយគ្មានបញ្ជាក់មុខទំនិញអ្វីសោះ អាមេរិកនឹងអាចត្រូវគេចោទថា រំលោភលើកិច្ចព្រមព្រៀង។
ប៉ុន្តែ សម្រាប់ប្រធានខុទ្ទកាល័យរបស់សេតវិមាន រឿងដំឡើងពន្ធលើទំនិញ នាំចូលពី ម៉ិចស៊ិក ហើយនិងកិច្ចព្រមព្រៀង កាណាដា ម៉ិចស៊ិក និងអាមេរិក ជារឿងពីរ ចែកដាច់ពីគ្នា។ មួយជារឿងតម្លៃពន្ធ សម្រាប់ករណីមានជម្លោះពាណិជ្ជកម្ម និងមួយទៀត ជារឿងដំឡើងពន្ធ នៅពេលមានបញ្ហាជនអន្តោប្រវេសន៍។ នេះជាការបកស្រាយបែបការពារខ្លួនរបស់សេតវិមាន ប៉ុន្តែ ភាគីម៉ិចស៊ិកវិញបានប្រតិកម្មរួចហើយថា នឹងចាត់វិធានការតបវិញ បើសិនអាមេរិកដំឡើងពន្ធលើទំនិញ នាំចូលពីម៉ិចស៊ិកមែន។
ប្រធានាធិបតី ម៉ិចស៊ិក លោក Andres Manuel Lopez Obrador បានទូរស័ព្ទទៅលោកដូណាល់ ត្រាំ ដោយថា ម៉ិចស៊ិក ហើយនិងមន្រ្តីពាណិជ្ជកម្មអាមេរិកផ្ទាល់សង្ឃឹមថា ភាគីទាំងពីរ នឹងអាចដោះស្រាយ បញ្ហាខ្វែងគំនិតគ្នាឲ្យបានកាន់តែឆាប់ ដើម្បីជៀសវាង មហន្តរាយសេដ្ឋកិច្ច ព្រោះថា ការដំឡើងពន្ធមិនត្រឹមតែប៉ះពាល់ដល់សេដ្ឋកិច្ចរបស់ម៉ិចស៊ិកតែប៉ុណ្ណោះទេ ប៉ុន្តែ វាប៉ះពាល់ផងដែរ ដល់អ្នកប្រើប្រាស់ក្នុងទឹកដីអាមេរិក ដែលពឹងផ្អែកច្រើនលើទំនិញ ប្រើប្រាស់ ដែលមានតម្លៃថោក នាំចូលពីម៉ិចស៊ិក៕
ចំនួនជនអន្តោប្រវេសន៍ខុសច្បាប់ បានកើនឡើងដល់កម្រិតកំពូល មិនធ្លាប់ នៅអាមេរិក
អាជ្ញាធរការពារព្រំដែនអាមេរិក ដែលប្រចាំការនៅព្រំដែន ជាមួយម៉ិចស៊ិក លែងអាចគ្រប់គ្រងបញ្ហាជនអន្តោប្រវេសន៍ ។ ចំនួន ជនអន្តោប្រវេសន៍ខុសច្បាប់ ដែលអាជ្ញាធរអាមេរិក ចាប់ឃាត់ខ្លួន នៅព្រំដែនជាមួយម៉ិចស៊ិក បានកើនឡើងជារៀងរាល់ថ្ងៃ ប្រមាណ ៤៥០០នាក់ ក្នុងមួយថ្ងៃៗ។ តាមទីភ្នាក់ងារការពារព្រំដែនអាមេរិក ចាប់តាំងពីខែតុលា ឆ្នាំមុន រហូតដល់ខែមេសាឆ្នាំនេះ ចំនួនជនអន្តោប្រវេសន៍ ដែលឆ្លងដែនខុសច្បាប់ ទៅក្នុងទឹកដីអាមេរិកបានកើនឡើងដល់ចំនួនបំបែកឯតទគ្គកម្ម ជិត ៥សែននាក់។
នៅពេលដែលអាជ្ញាធរ ឆ្មាំព្រំដែនអាមេរិក អស់សមត្ថភាព លែងអាចគ្រប់គ្រង ទប់ស្កាត់ លំហូរជនអន្តោប្រវេសន៍ ដែលមានកាន់តែច្រើន លោកដូណាល់ ត្រាំ ដែលមិនអាចបិទព្រំដែនជាមួយប្រទេសម៉ិចស៊ិក ដោយសារខ្លាចមានគ្រោះមហន្តរាយសេដ្ឋកិច្ច របស់ប្រទេសទាំងពីរ គឺមានតែដើរជម្រើសចុងក្រោយគឺ ដំឡើងពន្ធ ដើម្បី ដាក់សម្ពាធលើភាគីម៉ិចស៊ិក។
ទប់ស្កាត់លំហូរជនអន្តោប្រវេសន៍ ខុសច្បាប់ ទៅក្នុងទឹកដីអាមេរិក គឺជានយោបាយអាទិភាព របស់លោកដូណាល់ ត្រាំ តាំងពីក្នុងយុទ្ធនាការឃោសនាបោះឆ្នោត។ ដើម្បី ទប់ស្កាត់ លំហូរជនអន្តោប្រវេសន៍ លោកដូណាល់ ត្រាំ ធ្លាប់បានចាត់វិធានការកណ្តាប់ដៃដែក ជាច្រើន ដូចជា ផ្តាច់ជំនួយ ដល់ប្រទេសអាមេរិកកណ្តាលចំនួន ៣ ដូចជាក្វាតេម៉ាឡា សាល់វ៉ាដ័រ និងហុងឌុយរ៉ាស ដែលជាប្រភពចាកចេញភាគច្រើន របស់ជនអន្តោប្រវេសន៍។ លោកដូណាល់ត្រាំ ធ្លាប់បានទាមទារថវិកាសាងសង់ជញ្ជាំង នៅព្រំដែនជាមួយប្រទេសម៉ិចស៊ិក ដែលជាច្រកចូលសំខាន់របស់ជនអន្តោប្រវេសន៍ខុសច្បាប់ ប៉ុន្តែ មិនបានសំរេច ដោយសារសភាមិនយល់ស្របតាម។ លោកដូណាល់ ត្រាំ ធ្លាប់បានបញ្ជាឲ្យចាប់ឃុំខ្លួន ជនអន្តោប្រវេសន៍ ទាំងគ្រួសារៗ ប៉ុន្តែ តុលាការសហព័ន្ធអាមេរិក បានសម្រេចចាត់ទុក ការបញ្ជារបស់ប្រធានាធិបតី ជាមោឃៈ ក្នុងហេតុផលថា វិធានការរបស់ប្រធានាធិបតី មានលក្ខណៈអមនុស្សធម៌ បំបែកកូនៗពីឪពុកម្តាយ។
នយោបាយដំឡើងពន្ធ ជាអាវុធពិសេស លោកដូណាល់ ត្រាំ ចូលចិត្តប្រើជាមួយដៃគូចរចា
លោកដូណាល់ ត្រាំ ធ្លាប់ប្រកាសកាត់ផ្តាច់ជំនួយ ដល់ប្រទេសក្វាតេម៉ាឡា អេលសាល់វ៉ាឌ័រ និងហុងឌូរ៉ាស ដែលជាប្រភពចាកចេញរបស់ជនអន្តោប្រវេសន៍ ក្នុងហេតុផលថា រដ្ឋាភិបាលប្រទេសទាំងនោះ គ្មានចាត់វិធានការអ្វី ដើម្បីទប់ស្កាត់ប្រជាជនរបស់ខ្លួន ដើម្បី ចាកចេញពីប្រទេស។ ប៉ុន្តែ នយោបាយរបស់លោកដូណាល់ ត្រាំ បរាជ័យធ្លាក់ទឹក ព្រោះ ជនអន្តោប្រវេសន៍នៅតែ បន្តចាកចេញពីប្រទេស ធ្វើដំណើរសំដៅទឹកដីអាមេរិកដដែល។
សម្រាប់អ្នកជំនាញខាងអន្តោប្រវេសន៍ ដែលកាសែតអាមេរិក Washington Post បានជួបសំភាសន៍ នយោបាយដំឡើងពន្ធលើទំនិញនាំចូលពីម៉ិចស៊ិក នឹងធ្វើឲ្យប៉ះពាល់ខ្លាំងដល់សេដ្ឋកិច្ចម៉ិចស៊ិក។ សេដ្ឋកិច្ចចុះខ្សោយរបស់ម៉ិចស៊ិក នឹងធ្វើឲ្យប្រជាជនរបស់ប្រទេសនេះ ធ្វើចំណាកស្រុក ឆ្លងដែន ចូលទៅរកការងារធ្វើ នៅអាមេរិក។ អាចនិយាយម្យ៉ាងថា វិធានការដំឡើងពន្ធរបស់លោកដូណាល់ ត្រាំ មិនត្រឹមតែមិនទៅជួយទប់ស្កាត់ លំហូរជនអន្តោប្រវេសន៍ ពី តំបន់អាមេរិកកណ្តាលតែប៉ុណ្ណោះទេ ប៉ុន្តែ ផ្ទុយទៅវិញ វារឹតតែជំរុញ ឲ្យប្រជាជនម៉ិចស៊ិក ដែលគ្មានការងារធ្វើ ដោយសារតែនយោបាយ ដំឡើងពន្ធនោះ ធ្លាក់ខ្លួន ជាជនអន្តោប្រវេសន៍ សម្រុកចូលទៅទឹកដីអាមេរិក បន្ថែមមួយកម្រិតទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ