៧៣៧Max បានធ្វើឱ្យប៊ូអ៊ីងថយប្រាក់ចំណេញនិងប្រាក់ចំណូល
ក្រុមហ៊ុនយន្តហោះអាមេរិកប៊ូអ៊ីង បានប្រកាសនៅថ្ងៃពុធទី ២៤មេសា ២០១៩ អំពីការចុះថយប្រាក់ចំណូលនិងប្រាក់ចំណេញ របស់ខ្លួន ប្រចាំត្រីមាសទីមួយឆ្នាំ២០១៩។ មូលហេតុគឺបណ្តាលមកពីយន្តហោះប៊ូអ៊ីងប្រភេទ ៧៣៧Max ដែលជាផលិតផលពេញនិយមជាងគេរបស់ក្រុមហ៊ុន មានបញ្ហាបច្ចេកទេស បង្កឱ្យធា្លក់អស់ពីរគ្រឿងក្នុងរវាងតែ៥ខែ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
ប្រាក់ចំណេញបានធ្លាក់ចុះ អស់ ១៣,២% នៅក្នុងត្រីមាសដំបូងដើមឆ្នាំ២០១៩។ ឯប្រាក់ចំណូលរបស់ក្រុមហ៊ុនធ្លាក់ចុះអស់ ៨,៦% មកនៅត្រឹម១១,៨ពាន់លានដុល្លារ ទល់នឹង១០,៩% កាលពីត្រីមាសទីមួយឆ្នាំ២០១៨។ នេះបើតាមការគូសបញ្ជាក់របស់ក្រុមហ៊ុនដែលប្រកាសលុបចោលការកំណត់កម្មវត្ថុហិរញ្ញវត្ថុប្រចាំឆ្នាំខ្លួន កាលពីដើមឆ្នាំ ព្រោះការព្យាករហិរញ្ញវត្ថុឆ្នាំ២០១៩ មិនបានគិតដល់អំពីផលប៉ះពាល់បង្កឡើងដោយយន្តហោះ៧៣៧Max ទេ។ ក្រុមហ៊ុនត្រូវធ្វើការព្យាករថ្មី ដែលផ្តល់ជូននៅពេលក្រោយ។
ក្រុមហ៊ុនប៊ូអ៊ីង បាននិងកំពុងជួបវិបត្តិយ៉ាងធ្ងន់ធ្ងរមិនធ្លាប់មាន ទាក់ទងនឹងលក់យន្តហោះប្រភេទ៧៣៧Max តាំងពីយន្តហោះរបស់ក្រុមហ៊ុនអេត្យូពីអ៊ែរឡាញ បានធ្លាក់ស្លាប់មនុស្សអស់១៥៧នាក់ កាលពីថ្ងៃទី ១០មីនា ក្រោយពីហោះឡើងបានតែប៉ុន្មាននាទីមក។ គ្រោះថ្នាក់នេះ កើតឡើងតែ៥ខែក្រោយការធ្លាក់យន្តហោះរបស់ក្រុមហ៊ុនឥណ្ឌូណេស៊ី ដែលប្រើប្រភេទយន្តហោះ៧៣៧Maxដែរ។ គ្រោះថ្នាក់ពីរ ក្នុងចន្លោះពេលដ៏ខ្លី និងក្នុងលក្ខខណ្ឌដូចគ្នា បានជំរុញឱ្យពិភពលោកផ្អាកការហោះហើរយន្តហោះប្រភេទ៧៣៧Max និងតម្រូវឱ្យមានការធ្វើតេស្តសុវត្ថិភាពឡើងវិញ មុននឹងអាចផ្តល់អាជ្ញាបណ្ណឱ្យធ្វើចរាចរណ៍ហោះហើរជាថ្មី។ នៅសហរដ្ឋអាមេរិក ក្រសួងយុត្តិធម៌បានបើកអង្កេត ចំណែកក្រសួងដឹកជញ្ជូនកំពុងត្រួតពិនិត្យសំណុំបែបបទសុំសិទ្ធិហោះហើរ។
ក្រុមហ៊ុនប៊ូអ៊ីង បានបញ្ជាក់នៅថ្ងៃពុធនេះ ថាធ្វើការកែប្រែ ពង្រឹងសុវត្ថិភាពហោះហើរ ព្រមទាំងធ្វើការសាកល្បងជាង១៣៥លើកដោយជោគជ័យ ដោយសហការយ៉ាងស្អិតល្មួតជាមួយនឹងក្រុមជំនាញអាកាសចរណ៍អន្តរជាតិ និងដោយសង្ឃឹមថាយន្តហោះនឹងមានសិទ្ធិហោះហើរឡើងវិញនៅរវាងបីបួនខែទៀតខាងមុខ។
ប៉ុន្តែផលប៉ះពាល់ហិរញ្ញវត្ថុមានទំហំធំខ្លាំង។ ក្នុងរយៈពេលបីខែដំបូងនេះ ប៊ូអ៊ីងបានប្រគល់យន្តហោះទៅឱ្យអតិថិជន តែ១៤៩គ្រឿងប៉ុណ្ណោះ ពោលគឺជាការធ្លាក់ចុះអស់១៩% បើគិតជាអត្រាប្រចាំឆ្នាំ។ ការប្រគល់យន្តហោះ គឺជាសញ្ញាបញ្ជាក់អំពីដំណើរការល្អរបស់ក្រុមហ៊ុន ព្រោះតាមទម្លាប់ប៊ូអ៊ីងគិតគូរវិក័យបណ្ណនៅពេលប្រគល់ទំនិញ។
គិតត្រឹមចុងខែមីនា ក្រុមហ៊ុនមានប្រាក់ចំណូលក្នុងហិប តែ២,៨ពាន់លានដុល្លារ ទល់នឹង៣,១ពាន់លានដុល្លារកាលពីឆ្នាំទៅ តែគ្រាន់បើជាងក្តីរំពឹងរបស់ទីផ្សារភាគហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ