អ៊ីស្រាអែល-ប៉ាឡេស្ទីន ៖ អាមេរិកសន្យាបង្ហាញផែនការសន្តិភាពលម្អិត តែត្រូវរង់ចាំសិន
យោធាអ៊ីស្រាអែល បានប្រកាសនៅថ្ងៃសៅរ៍នេះ អំពីការវាយប្រហារលើទីតាំងជាច្រើនរបស់ចលនាហាម៉ាស នៅតំបន់ហ្កាហ្សា ដើម្បីជាចម្លើយតបទៅនឹងការបាញ់រ៉ុកកែតចេញដែនដីប៉ាឡេស្ទីនមកលើទឹកដីអ៊ីស្រាអែល កាលពីល្ងាចថ្ងៃសុក្រ។ សម្រាប់ប៉ាឡេស្ទីនដើមហេតុដំបូងគឺបណ្តាលមកពីមានការប៉ះទង្គិចនៅតាមព្រំដែន ដោយទាហានអ៊ីស្រាអែលបានបាញ់លើបាតុករស្លាប់ពលរដ្ឋប៉ាឡេស្ទីនម្នាក់និងរបួសជាង៤០នាក់។ ក្នុងខណៈដែលអំពើហិង្សាចាប់រង្គើឡើងវិញដូច្នេះ វ៉ាស៊ីនតោនបានសន្យាទៅកាន់អង្គការសហប្រជាជាតិថានឹងបង្ហាញផែនការលម្អិត ស្តីពីការស្វែងរកសន្តិភាពឱ្យតំបន់ដើមបូព៌ា។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសេចក្តីថ្លែងការណ៍ យោធាអ៊ីស្រាអែលបានអះអាងថា យន្តហោះចម្បាំងរបស់ខ្លួនបានបាញ់ចំលើទីតាំងយោធាជាមូលដ្ឋានរបស់ចលនាហាម៉ាស នៅភាគខាងត្បូងតំបន់ហ្កាហ្សាផង និងចំលើរចនាសម្ព័ន្ធក្រោមដី នៅភាគខាងជើងតំបន់ហ្កាហ្សាផង។ ហើយមូលហេតុនៃការធ្វើប្រតិបត្តការនេះ ក៏ដោយហេតុតែចលនាអ៊ីស្លាមកាន់អំណាចនៅតំបន់ហ្កហ្សា ហាម៉ាស បានបាញ់គ្រាប់រ៉ុកកែត កាលពីល្ងាចថ្ងៃសុក្រ និងបានសាបព្រោះអំពើហិង្សាជាប់ជាប្រចាំ ដោយបង្ហោះប៉េងប៉ោងដាក់គ្រឿងផ្ទុះឱ្យធ្លាក់ក្នុងដែនដីអ៊ីស្រាអែល។
បើតាមប្រភពមកពីតំបន់ហ្កាហ្សាវិញ ការវាយប្រហារតាមផ្លូវអាកាសរបស់អ៊ីស្រាអែល មិនបានបង្កឱ្យមានការខូចខាត និងជនរងរបួសទេ។ ប៉ុន្តែមានពលរដ្ឋប៉ាឡេស្ទីនម្នាក់បានស្លាប់ និង៤៥នាក់បានរងរបួសនៅព្រឹកថ្ងៃសុក្រម្សិលមិញ ដោយការបាញ់របស់ទាហានអ៊ីស្រាអែលមកលើបាតុករប៉ាឡេស្ទីន។ នេះបើតាមសេចក្តីថ្លែងការណ៍របស់ក្រសួងសុខាភិបាលប៉ាឡេស្ទីន។
ហ្កាហ្សាជាដែនដីប៉ាឡេស្ទីន គ្រប់គ្រងដោយចលនាហាម៉ាស និងមានទីតាំងស្ថិតនៅចន្លោះអ៊ីស្រាអែល អេហ្ស៊ីប និងសមុទ្ទមេឌីទែរ៉ាណេ។ តាំងពីថ្ងៃទី ៣០មីនា ២០១៨មក ជនជាតិប៉ាឡេស្ទីននៅតំបន់ហ្កាហ្សាបាននាំធ្វើបាតុកម្មជារៀងរាល់ថ្ងៃសុក្រ តាមបណ្តោយព្រំដែនហ្កាហ្សានិងអ៊ីស្រាអែល ប្រឆាំងនឹងការបិទខ្ទប់របស់អ៊ីស្រាអែល។ គិតចាប់តាំងពីចលនានេះបានកើតឡើង មានបាតុករប៉ាឡេស្ទីនយ៉ាងហោចណាស់ ២៥៣នាក់បានស្លាប់ក្រោមគ្រាប់កាំភ្លើងរបស់អ៊ីស្រាអែល។ ឯខាងអ៊ីស្រាអែលមានបាត់បង់ជីវិតទាហានពីរនាក់។
កាលពីសប្តាហ៍មុន គណៈកម្មការអង្កេតរបស់អង្គការសហប្រជាជាតិ បានអះអាងថាប្រតិកម្មរបស់អ៊ីស្រាអែលទៅបាតុករប៉ាឡេស្ទីន អាចចាត់ទុកបានថាឧក្រិដ្ឋកម្មសង្គ្រាម ឬឧក្រិដ្ឋកម្មប្រឆាំងនឹងមនុស្សជាតិ។
ការបាត់បង់ជីវិតមានស្ទើររាល់ថ្ងៃ ហើយទស្សនវិស័យនៃការស្វែងរកសន្តិភាព នៅតែងងឹតឈឹងដដែល។ នៅក្នុងជំនួបប្រជុំក្រុមប្រឹក្សាសន្តិសុខអង្គការសហប្រជាជាតិ វ៉ាស៊ីនតោន បានត្រឹមសន្យាថានឹងអាមេរិកនឹងស្នើផែនការសន្តិភាពដ៏លម្អិត ដែលគ្របទាំងបញ្ហាសេដ្ឋកិច្ចនិងនយោបាយផង ប៉ុន្តែតំណាងអាមេរិកមិនបានបង្ហាញថាជាផែនការអ្វីទេ។ គេទំនងជាត្រូវរង់ចាំរាប់ខែទៀតឯណោះ។ នេះបើតាមប្រភពការទូតសុំមិនបញ្ចេញឈ្មោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ