វ៉េណេស៊ុយអេឡា៖ជំនួយមនុស្សធម៌កំពុងក្លាយជាអាវុធការទូតរវាងក្រុមគាំទ្រលោកម៉ាឌូរ៉ូ និងក្រុមគាំទ្រលោកហ្កាយដូ
ចុះផ្សាយនៅថ្ងៃ៖
ស្តាប់ - ០៧:០៥
នៅក្នុងប្រទេសវ៉េណេស៊ុយអេឡា ជំនួយមនុស្សធម៌កំពុងបន្តក្លាយជាអាវុធការទូតយ៉ាងផុសផុលរវាងក្រុមអ្នកគាំទ្រលោកប្រធានាធិបតីនីកូឡា ម៉ាឌូរ៉ូ និងក្រុមអ្នកគាំទ្រប្រធានាធិបតីស្តីទីប្រកាសខ្លួនឯងលោកហ័ន ហ្កាយដូ។ ខណៈដែលលោកហ្កាយដូបានប្រកាសពីការដឹកជំនួយមនុស្សធម៌របស់អាមេរិកចូលក្នុងប្រទេសនៅថ្ងៃសៅរ៍ ទី២៣ កុម្ភៈ និងការរៀបចំបាតុកម្មថ្មី លោកម៉ាឌូរ៉ូក៏បានប្រកាសពីការទទួលជំនួយមនុស្សធម៌នៅថ្ងៃពុធ ទី២០ កុម្ភៈ តែជាជំនួយមនុស្សធម៌របស់ប្រទេសរុស្ស៊ី។ នៅរសៀលថ្ងៃចន្ទ ទី១៨ កុម្ភៈ ប្រធានាធិបតីអាមេរិកលោកត្រាំបានអំពាវនាវដល់មន្រ្តីយោធា និងស៊ីវិលដែលគាំទ្រលោកម៉ាឌូរ៉ូកុំឲ្យរារាំងជំនួយមនុស្សធម៌។ ទន្ទឹមគ្នានេះ លោកត្រាំក៏បានព្រមានត្រង់លើក្រុមមេដឹកនាំយោធាដោយបានស្នើឲ្យពួកគេត្រឡប់ទៅគាំទ្រលោកហ្កាយដូវិញ។ បើមិនដូច្នោះទេ ពួកគេនឹងបាត់បង់ទាំងអស់ ហើយក៏នឹងគ្មានកន្លែងជ្រកកោនដែរ នេះជាការបន្ថែមរបស់លោកត្រាំ។
ដូចគ្រប់គ្នាបានដឹងរួចហើយថា បើកុំតែមានក្រុមមេដឹកនាំយោធាបន្តគាំទ្រលោកម៉ាឌូរ៉ូ ម្ល៉េះប្រធានាធិបតីវ៉េណេស៊ុយអេឡារូបនេះក៏មិនអាចតោងអំណាចមកដល់ថ្ងៃនេះដែរ។ ចូរកុំភ្លេចថា ប្រជាជនវ៉េណេស៊ុយអេឡាសឹងតែទូទាំងប្រទេស និងសឹងគ្រប់ជាន់ថ្នាក់បានគាំទ្រលោកហ្កាយដូយ៉ាងពេញទំហឹង។ គេមិនដឹងថា តើនៅមានមេដឹកនាំយោធាប៉ុន្មាននាក់ដែលបន្តស្មោះស្ម័គ្រនឹងលោកម៉ាឌូរ៉ូ និងមានប៉ុន្មាននាក់ដែលឈប់គាំទ្រលោកម៉ាឌូរ៉ូ តែកំពុងសម្ងំនៅស្ងៀម មិននិយាយអ្វីទាំងអស់ទេ។ ម្យ៉ាងទៀត ក៏គេនៅមិនទាន់ហ៊ាននិយាយថា តើមេដឹកនាំយោធាដែលកំពុងបន្តមានសមានចិត្តជាមួយលោកម៉ាឌូរ៉ូនឹងបន្តគាំទ្រលោកម៉ាឌូរ៉ូរហូតដល់ដង្ហើមចុងក្រោយ ឬមួយក៏នឹងព្រលែងលោកម៉ាឌូរ៉ូចោលវិញនៅថ្ងៃណាមួយនោះ។
ការអំពាវនាវ និងការព្រមានរបស់លោកត្រាំ គឺសំដៅលើក្រុមមេដឹកនាំយោធាដែលកំពុងបន្តគាំទ្រលោកម៉ាឌូរ៉ូ។ ថ្លែងនៅចំពោះមុខសហគមន៍វ៉េណេស៊ុយអេឡាក្នុងទីក្រុង Miami នៃរដ្ឋ Florida នារសៀលថ្ងៃចន្ទ ទី១៨ កុម្ភៈ លោកត្រាំបានផ្ញើសារត្រង់ៗទៅកាន់មន្រ្តីកងទ័ពវ៉េណេស៊ុយអេឡាថា ពួកគេមានផ្លូវតែពីរគត់ដែលត្រូវដើរ ទី១ បែរទៅគាំទ្រលោកហ្កាយដូ ទទួលយកការលើកលែងទោសពីលោកហ្កាដូ ហើយបន្តរួមរស់ក្នុងសង្គមគ្រួសាររបស់ពួកគេ និងទី២ ពួកគេបន្តគាំទ្រលោកម៉ាឌូរ៉ូ តែក្នុងករណីនេះ ពួកគេនឹងបាត់បង់ទាំងអស់ ហើយក៏គ្មានកន្លែងសម្រាប់ភៀសខ្លួនដែរ។ បន្ទាប់មក លោកត្រាំបានចោទរបបដឹកនាំរបស់លោកម៉ាឌូរ៉ូថា ជាអាយ៉ងរបស់ប្រទេសគុយបា ហើយបានព្រមានត្រង់ៗថា ជីវិតរបបកម្មុយនិស្តនៅវ៉េណេស៊ុយអេឡា នៅនីការ៉ាហ្កា និងនៅគុយបាជិតឈានដល់ទីបញ្ចប់ហើយ។
តើសម្តីព្រមានខ្លាំងៗរបស់លោកត្រាំពេលនេះមិនមែនជាការត្រៀមខ្លួនចូលអន្តរាគមន៍ផ្លូវយោធារបស់អាមេរិកដើម្បីទម្លាក់លោកម៉ាឌូរ៉ូទេ ឬយ៉ាងណា?។ លោកត្រាំធ្លាប់បានឆ្លើយនឹងសំណួរនេះរួចហើយថា ការបញ្ចប់អំណាចលោកម៉ាឌូរ៉ូដោយប្រើកម្លាំងបាយរបស់អាមេរិកក៏ជាវិធានការមួយនៅលើតុរបស់លោកដែរ។
លោកហ្កាយដូ និងលោកម៉ាឌូរ៉ូយកជំនួយមនុស្សធម៌ដើម្បីប្រជែងកម្លាំងគ្នា
វ៉េណេស៊ុយអេឡាដែលជាប្រទេសស្តេចប្រេងកាតមួយនៅអាមេរិកឡាទីន និងធ្លាប់បានសោយសុខនឹងធនធានធម្មជាតិមួយនេះបែរជាកំពុងមានសេដ្ឋកិច្ចត្រដរខ្យល់ខ្លាំង។ អត្រាអតិផរណាអាចកើនដល់ទៅ ១០លានភាគរយក្នុងឆ្នាំ ២០១៩ ហើយប្រជាជនវ៉េណេស៊ុយខ្វះខាតសព្វគ្រប់ តាំងពីអាហារប្រចាំថ្ងៃរហូតដល់ថ្នាំសង្កូវ។ ក្នុងរយៈពេល ៣ឆ្នាំចុងក្រោយនេះ មានពលរដ្ឋវ៉េណេស៊ុយអេឡាជិត ៣លាននាក់បានភៀសខ្លួនទៅស្វែងជីវភាពសមរម្យនៅក្នុងប្រទេសក្បែរខាង។ ក្រុមអ្នកជំនាញបានប្រមើលមើលថា បើគ្មានដំណោះស្រាយឆាប់ៗទេ មានពលរដ្ឋវ៉េណេស៊ុយអេឡាដល់ទៅ ៥លាននាក់នឹងរត់ចេញពីស្រុកកំណើតពីពេលនេះដល់ដំណាច់ឆ្នាំ ២០១៩។
គឺជាព្រឹត្តិការណ៍មួយដែលគ្មានប្រទេសណាមួយនៅអាមេរិកឡាទីនធ្លាប់បានជួបប្រទះដូចករណីវ៉េណេស៊ុយអេឡា។ លោកហ្កាយដូប្រាប់ពីការដឹកជំនួយមនុស្សធម៌អាមេរិកចូលស្រុកនៅថ្ងៃសៅរ៍ ទី២៣ កុម្ភៈ ដែលជាថ្ងៃគម្រប់ ១ខែគត់នៃការប្រកាសខ្លួនឯងជាប្រធានាធិបតីស្តីទី។ ទន្ទឹមគ្នានេះ ថ្ងៃទី២៣ កុម្ភៈក៏ជាថ្ងៃដែលលោកហ្កាយដូរៀបចំឲ្យមានក្បួនបាតុកម្មជាថ្មីដែរ។ លោកហ្កាយដូយល់មិនច្រឡំទេថា មានតែការប្រើជំនួយមនុស្សធម៌ទេទើបលោកអាចកែនប្រមូលបានការគាំទ្រកាន់តែច្រើន ព្រោះដើម្បីក្រពះ មនុស្សអាចធ្វើអ្វីៗគ្រប់យ៉ាងដើម្បីរស់ និងប្រឹងរស់។
មកដល់ពេលនេះ លោកម៉ាឌូរ៉ូបានរារាំង និងប្រើកម្លាំងទ័ពដើម្បីទប់មិនឲ្យជំនួយមនុស្សធម៌បរទេសចូលស្រុក ពិសេសជំនួយរបស់អាមេរិក។ ស្រាប់តែឥឡូវ លោកម៉ាឌូរ៉ូក៏បានប្រើយុទ្ធសាស្រ្តដូចលោកហ្កាយដូដែរដោយប្រកាសថា ជំនួយមនុស្សធម៌របស់ប្រទេសរុស្ស៊ីចំនួន ៣០០តោននឹងដឹកមកដល់នៅថ្ងៃពុធ ទី២០ កុម្ភៈ។ ឃើញថា កុំថាឡើយលោកហ្កាយដូ និងលោកម៉ាឌូរ៉ូ សូម្បីតែបរទេស ពិសេសអាមេរិក និងរុស្ស៊ីក៏បានយកជំនួយមនុស្សធម៌ធ្វើជាអាវុធការទូតដើម្បីប្រជែងកម្លាំងគ្នាក្នុងការគាំទ្រភាគីរៀងៗខ្លួនដែរ។
លោកហ្កាយដូប្តេជ្ញានាំជំនួយអាមេរិកចូលស្រុក ទោះមានរឿងអ្វីកើតឡើងក៏ដោយ
គេនៅមិនទាន់ដឹងថា តើលោកម៉ាឌូរ៉ូបានត្រៀមចាត់វិធានការអ្វីខ្លះដើម្បីរារាំងជំនួយរបស់អាមេរិកក្នុងថ្ងៃសៅរ៍ ទី២៣ កុម្ភៈទេ តែលោកហ្កាយដូបានប្តេជ្ញាចិត្តរួចហើយថា ទោះក្រោមហេតុផលអ្វី និងមានរឿងអ្វីកើតឡើងក៏ដោយ ក៏លោកនឹងនាំជំនួយមនុស្សធម៌របស់អាមេរិកចូលស្រុកឲ្យទាល់តែបាន។ តើតាមវិធីណាខ្លះ? លោកហ្កាយដូមិនបានលំអិតអ្វីបន្ថែមទេ តែគ្រាន់បញ្ជាក់ថា ជំនួយជាអាហារ និងថ្នាំសង្កូវជាច្រើនតោនកំពុងស្តុកទុកនៅក្នុងស្រុករបស់ប្រទេសកូឡុំប៊ីស្ថិតតាមបណ្តោយព្រំដែនជាមួយប្រទេសវ៉េណេស៊ុយអេឡា។
ឃើញថា កម្តៅនយោបាយអាចនឹងឡើងដល់កម្រិតកំពូលនៅតាមព្រំដែននាថ្ងៃសៅរ៍ ទី២៣ កុម្ភៈរវាងលោកហ្កាយដូដែលត្រៀមប្រើកម្លាំងមហាជន និងលោកម៉ាឌូរ៉ូដែលត្រៀមប្រើកម្លាំងកងទ័ព។ គេនៅមិនទាន់ដឹងថា បើលោកហ្កាយដូបន្តជម្នះយកជំនួយអាមេរិកចូលស្រុកឲ្យទាល់តែបាន តើប្រតិកម្មរបស់កងទ័ពនឹងមានកម្រិតណាទេ។ តែក្រុមអ្នកវិភាគបានមើលឃើញថា បើមានការបាញ់សម្លាប់រង្គាលលើប្រជាជនពីសំណាក់កងទ័ពក្នុងថ្ងៃនោះ វាអាចជាលេស ឬជាហេតុផលមួយដែលអាមេរិកអាចចូលអន្តរាគមន៍ផ្លូវយោធានៅវ៉េណេស៊ុយអេឡាដើម្បីបញ្ចប់អំណាចលោកម៉ាឌូរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ