សង់ជញ្ជាំងព្រំដែន៖ តើលោកដូណាល់ ត្រាំ កំពុងទ័លគំនិត?
ចុះផ្សាយនៅថ្ងៃ៖
ស្តាប់ - ០៧:១៤
នៅសេតវិមាន នៅថ្ងៃសៅរ៍ម្សិលមិញ ប្រធានាធិបតីអាមេរិក លោកដូណាល់ ត្រាំ បានប្រកាសធ្វើសម្បទានដើម្បីបិទបញ្ចប់វិបត្តិថវិកា ដែលបានធ្វើឲ្យស្ថាប័ន និងក្រសួងមួយផ្នែក របស់រដ្ឋសហព័ន្ធត្រូវបិទទ្វារ មិនដំណើរការ ៤សប្តាហ៍មកហើយ។ តើលោកដូណាល់ ត្រាំ បានប្រកាសធ្វើសម្បទានអ្វីខ្លះ? តើShutdown ដែលបានធ្វើឲ្យប៉ះពាល់ ដល់បុគ្គលិករដ្ឋអាមេរិកាំង ៨សែននាក់ នឹងត្រូវបិទបញ្ចប់ទៅមែន ដោយសារដំណោះស្រាយរបស់លោកដូណាល់ ត្រាំ កាលពីថ្ងៃសៅរ៍ម្សិលមិញ?
ប្រធានាធិបតីអាមេរិក លោកដូណាល់ ត្រាំ នៅថ្ងៃសៅរ៍ម្សិលមិញ បានលើកសំណើជាច្រើន ដើម្បីបិទបញ្ចប់វិបត្តិថវិកា ដែលមានរយៈពេល ១ខែគត់ គិតមកដល់ថ្ងៃអាទិត្យនេះ។ នៅក្នុងសុន្ទរកថា ថ្លែង ដែលលោកចាត់ទុកថា ជាការប្រកាសដ៏ធំសម្បើម និងសំខាន់សម្រាប់ដោះស្រាយវិបត្តិថវិកា ឬ Shutdown លើកនេះ លោកដូណាល់ ត្រាំបានប្រកាសធ្វើសម្បទានជាច្រើន ជាពិសេស នៅក្នុងរឿង ជនអន្តោប្រវេសន៍ ខុសច្បាប់ ប្រមាណ ១លាននាក់ ដែលក្រុមគណបក្សប្រជាធិបតេយ្យកំពុងការពារ កុំឲ្យរដ្ឋបាលលោកដូណាល់ ត្រាំ ចាប់បណ្តេញចេញពីទឹកដីអាមេរិក។
នៅក្នុងសំណើរបស់លោក នៅថ្ងៃសៅរ៍ លោកដូណាល់ ត្រាំ បាននិយាយថា លោកនឹងអនុញ្ញាតឲ្យជនអន្តោប្រវេសន៍ Dreamer ដែលបានចូលមកដល់ទឹកដីអាមេរិក ដោយខុសច្បាប់ តាំងពីក្នុងវ័យកុមារ ជាមួយឪពុកម្តាយរបស់ពួកគេនោះ នឹងអាចមានសិទ្ធិបន្តធ្វើការ នៅទឹកដីអាមេរិក៣ឆ្នាំទៀត។ ចំណែក ជនអន្តោប្រវេសន៍ ៣សែននាក់ផ្សេងទៀត ដែលបានទទួលសិទ្ធិជ្រកកោនបណ្តោះអាសន្ន នៅអាមេរិក ដោយសារគ្រោះមហន្តរាយធម្មជាតិ ឬជម្លោះប្រដាប់អាវុធ នៅក្នុងប្រទេសរបស់ពួកគ ប៉ុន្តែ ដែលត្រូវប្រឈមនឹងការចាប់បណ្តេញចេញ ពីអាមេរិក នោះ ក៏នឹងត្រូវលោកដូណាល់ ត្រាំ អនុញ្ញាតឲ្យពន្យារពេលរស់នៅ ធ្វើការ នៅអាមេរិក៣ឆ្នាំទៀតដែរ។
ដោយបន្ទន់ជំហរ មិនបណ្តេញ ជនអន្តោប្រវេសន៍ ដែលក្រុមគណបក្សប្រជាធិបតេយ្យ ចេញមុខការពារខ្លាំង លោកដូណាល់ ត្រាំចង់បង្ហាញថា លោកបានធ្វើសម្បទានច្រើនណាស់។ ក្រៅតែធ្វើសម្បទាន ក្នុងរឿងជនអន្តោប្រវេសន៍ លោកដូណាល់ ត្រាំ នៅបានយកគាប់ យកគួរ ក្រុមប្រជាធិបតេយ្យ ដែលជាអ្នកមានសំលេងអារកាត់ នៅសភាតំណាងរាស្រ្ត ថា លោកនឹងសុំឲ្យបង្កើនថវិកាសម្រាប់ជំនួយមនុស្សធម៌ ប្រមាណ ៨០០លានដុល្លារ។ បង្កើនភ្នាក់ងារ ត្រួតពិនិត្យតាមព្រំដែនដល់ទៅជិត ៣ពាន់នាក់ ហើយនិងបង្កើនចំនួនក្រុមចៅក្រមសម្រាប់បញ្ហាអន្តោប្រវេសន៍ ៧៥ក្រុមទៀត ដែលជាការទាមទារចង់បានកន្លងមក របស់ក្រុមគណបក្សប្រជាធិបតេយ្យ។
ទីភ្នាក់ងារ Standard & Poor’s៖ Shutdownធ្វើឲ្យអាមេរិកខាតបង់ ០,៣%នៃGDP
នៅថ្ងៃម្សិលមិញនេះ លោកដូណាល់ ត្រាំ លើកសំណើ ដើម្បីចរចា តថ្លៃ ជាមួយក្រុមគណបក្សប្រជាធិបតេយ្យតែប៉ុណ្ណោះ ប៉ុន្តែ មិនបានប្រកាសយល់ព្រម ទទួលយកច្បាប់ថវិកា របស់សភា ដើម្បីបិទបញ្ចប់វិបត្តិថវិកាលើកនេះទេ។ សូមរំលឹកបន្តិចថា លោកដូណាល់ ត្រាំ មិនព្រមទទួលយកច្បាប់ថវិការបស់សភា ដោយសារតែនៅក្នុងច្បាប់ថវិកា នោះ គ្មានបូកបញ្ចូល ទឹកប្រាក់៥ពាន់ ៧០០លានដុល្លារ ដែលលោកដូណាល់ ត្រាំ ចង់បានសម្រាប់សង់ជញ្ជាំងនៅព្រំដែនម៉ិចស៊ិក។
នៅក្នុងការប្រកាស នៅថ្ងៃម្សិលមិញ លោកប្រធានាធិបតីអាមេរិក ហាក់បង្ហាញថា លោកបានបន្ទន់ជំហរ ជាពិសេស នៅក្នុងរឿងជនអន្តោប្រវេសន៍ ដែលលោកប្រឆាំងស្អប់រហូត។ ប៉ុន្តែ តាមការពិត គឺជាការតថ្លៃជាមួយ គណបក្សប្រជាធិបតេយ្យដែលកំពុងគ្រប់គ្រងសំលេងភាគច្រើននៅសភាអ្នកតំណាងរាស្រ្តទៅវិញទេ ពីព្រោះថា នៅពេលលោកដូណាល់ ត្រាំ ប្រកាស យល់សណ្តោសប្រណី ដល់កូនៗរបស់ជនអន្តោប្រវេសន៍ខុសច្បាប់ នៅអាមេរិក លោកដូណាល់ ត្រាំនៅតែទាមទារឲ្យសភា ដាក់បញ្ចូល ថវិកាជាង ៥ពាន់លានដុល្លារ សម្រាប់សង់ ជញ្ជាំងនៅតាមព្រំដែនជាមួយប្រទេសម៉ិចស៊ិកដដែល។
វិបត្តិថវិកាបានផ្ទុះឡើងលើកនេះ ដោយសារតែ លោកដូណាល់ ត្រាំ មិនព្រមចុះហត្ថលេខា លើច្បាប់ថវិកា របស់រដ្ឋសភាដែលគ្មានបូកបញ្ចូល ថវិកាសម្រាប់សង់ជញ្ជាំងរបស់លោក។ ដោយសារតែលោកដូណាល់ ត្រាំ មិនចុះហត្ថលេខាលើច្បាប់ថវិកា បានជាក្រសួងស្ថាប័នរដ្ឋមួយផ្នែកត្រូវបិទទ្វារ។ បុគ្គលិករដ្ឋអាមេរិកាំង ប្រមាណ ៨សែននាក់ ត្រូវរងប៉ះពាល់ ដែលនៅក្នុងនោះ មនុស្សជាង ៤សែននាក់ ដូចជាមន្រ្តីអន្តោប្រវេសន៍ បុគ្គលិករបស់ទីភ្នាក់ងារស៊ើបការណ៍សម្ងាត់ មន្រ្តីសន្តិសុខ ត្រូវធ្វើការ មួយខែមកហើយ ដោយគ្មានបានទទួលប្រាក់ខែ។
Shutdown ដែលមានរយៈពេលវែង មិនធ្លាប់មានក្នុងប្រវត្តិអាមេរិក នឹងអាចបន្តពន្យារពេលតទៅទៀត ព្រោះថា ក្រុមប្រជាធិបតេយ្យបានបង្ហាញហើយថា គេនឹងមិនទទួលយកសំណើរបស់លោកដូណាល់ ត្រាំនោះទេ។
Shutdown ដែលកើតចេញមកពីជម្លោះរវាងប្រធានាធិបតី ហើយនិងអំណាចនិតិបញ្ញតិនៅអាមេរិក ពេលនេះ កំពុងចាប់ផ្តើមជះឥទ្ធិពលអាក្រក់ដល់សេដ្ឋកិច្ចអាមេរិក។ ទីភ្នាក់ងារវាយតម្លៃហានិភ័យ Standard and Poor ដែលរកឃើញថា ដោយសារតែShutdown លើកនេះ អាមេរិក ខាតបង់ប្រាក់ ជាង ៣ពាន់លានដុល្លារ នៅរៀងរាល់២សប្តាហ៍ម្តង។
សម្បទានដើម្បីទម្លាក់កំហុសលើក្រុមប្រជាធិបតយ្យ
នៅមុនលោកដូណាល់ ត្រាំ ប្រកាសទៅទៀត ប្រធានក្រុមគណបក្សប្រជាធិបតេយ្យនៅសភាអ្នកតំណាងរាស្រ្តបានបដិសេធ មិនទទួលយកសំណើរបស់លោកដូណាល់ ត្រាំ ពោលគឺគេនៅតែមិនព្រមផ្តល់ថវិកាជាង ៥ពាន់លានដុល្លារ សម្រាប់សង់ជញ្ជាំងនៅព្រំដែន ម៉ិចស៊ិក ដែលពួកគេ វាយតម្លៃថា គ្មានប្រសិទ្ធិភាព និងជាជញ្ជាំង អសីលធម៌ ដែលប្រជាជនអាមេរិកាំងមិនអាចទទួលយកបាន។ ដោយប្រកាសយោគយល់ដល់ជនអន្តោប្រវេសន៍ខុសច្បាប់ ទៅតាមការចង់បានរបស់ក្រុមប្រជាធិបតេយ្យ លោកដូណាល់ ត្រាំ ចង់បង្ហាញថា លោកបានផ្តល់ឱកាស ធ្វើសម្បទានច្រើនណាស់ ដើម្បីរកច្រកចេញ ឲ្យវិបត្តិថវិកាលើកនេះ។ ប៉ុន្តែ គឺខាងក្រុមប្រជាធិបតេយ្យនៅសភាទេ ដែលមិនព្រមសហការចង់ដោះស្រាយវិបត្តិលើកនេះ។ តាមរយៈ វិធីសាស្រ្តមួយគ្រានេះ លោកដូណាល់ ត្រាំ កំពុងចង់ទម្លាក់កំហុស ទៅលើក្រុមប្រជាធិបតេយ្យ ព្រោះថា រហូតមកដល់ពេលនេះ ការស្ទង់មតិជាច្រើនបានបង្ហាញថា មានពលរដ្ឋអាមេរិកាំង កាន់តែច្រើន ដែលបានស្តីបន្ទោសគណបក្សសាធារណរដ្ឋ ហើយនិងលោកដូណាល់ ត្រាំ ដែលមិនព្រមចុះហត្ថលេខាលើច្បាប់ថវិកា រហូតធ្វើឲ្យមានShutdown។
ក្រុមប្រជាធិបតេយ្យវិញ មិនងាយចាញ់កលរបស់លោកដូណាល់ ត្រាំនោះទេ។ នៅក្រោយការប្រកាសរបស់លោកដូណាល់ តែបន្តិច មន្រ្តីជាន់ខ្ពស់របស់គណបក្សប្រជាធិបតេយ្យនៅសភាអ្នកតំណាងរាស្រ្តបាននិយាយថា លោកដូណាល់ ត្រាំ គិតតែរឿងចង់បានលុយ សង់ជញ្ជាំង ប៉ុន្តែ មិនបាននិយាយមួយម៉ាត់ដល់បុគ្គលិកអាមេរិក ដែលខ្លះធ្វើការទាំងគ្មានប្រាក់ខែ និងខ្លះទៀត ត្រូវ បញ្ឈប់ ពីការងារ គ្មានប្រាក់សម្រាប់បង់ថ្លៃផ្ទះ ឬទិញអាហារ បង់ថ្លៃសាលារៀនរបស់កូន។ ដើម្បីបានប្រាក់៥ពាន់លានដុល្លារ សម្រាប់សង់ជញ្ជាំង លោកដូណាល់ ត្រាំ គ្មានរារែកដើម្បី ចាប់យកបុគ្គលិករដ្ឋអាមេរិកាំងធ្វើជាចំណាប់ខ្មាំង ជំរិត ទារថ្នូរពីសភា។ អាចថា ដើម្បីចង់គោរពតាមការសន្យា លោកដូណាល់ ត្រាំកំពុងប្រថុយនឹងបាត់បង់មុខមាត់ ដែលមិនងាយនឹងស្តាររួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ