អ្នកស្តាំនិយមជ្រុល Bolsonaro ជាប់ឆ្នោតជាប្រធានាធិបតីប្រេស៊ីល
ប្រេស៊ីល មានប្រធានាធិបតីថ្មីជាអ្នកស្តាំនិយមជ្រុល ! លោក ហ្សែ បុលសូណារ៉ូ Jair Bolsonaro បេក្ខជនប្រធានាធិបតីមកពីបក្សស្តាំជ្រុលនិយម បានទទួលជោគជ័យនៅក្នុងការបោះឆ្នោតជុំទីពីរ ជាមួយនឹងសំឡេងគាំទ្រ ៥៥,៣%។ ចំណែកគូប្រជែង ហ្វែណង់ដូ ហាដាដ បេក្ខជនពលករ ដែលជាបក្សឆ្វេងនិយម ទទួលបានការគាំទ្រត្រឹមតែ៤៤,៧%។ នេះ បើតាមសេចក្តីប្រកាសជាផ្លូវការ ក្រោយការរាប់សន្លឹកឆ្នោតបាន៩៨%។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ជាប់ឆ្នោតយ៉ាងត្រចះត្រចង់ ជាប្រធានាធិបតីថ្មីប្រេស៊ីល លោក ហ្សែ បុលសូណារ៉ូ នៃបក្សស្តាំជ្រុលនិយម បានថ្លែងសុន្ទរកថាជាលើកទីមួយ នៅល្ងាចថ្ងៃអាទិត្យម្សិលមិញ ក្នុងសំឡេងម៉ាត់ៗថា “នឹងប្តូរអនាគតប្រេស៊ីលរួមគ្នា » ! ដោយប្រេស៊ីលមិនបន្តជាមួយអ្នកសង្គមនិយម កុម្មុយនិស្ត និងប្រជាភិថុតឆ្វេងនិយមទៀត !
លោក បុលសូណារ៉ូ នឹងចូលកាន់តំណែងជាផ្លូវការនៅថ្ងៃទី ១មករា ឆ្នាំ២០១៩ សម្រាប់អាណត្តិ៤ឆ្នាំ បន្តពីលោកប្រធានាធិបតីផុតអាណត្តិ មីស្ហែល តេមែរ។
គ្រាន់តែបានឮសេចក្តីប្រកាសលទ្ធផលបណ្តោះអាសន្នដំបូងភ្លាម ហ្វូងមនុស្សរាប់ពាន់នាក់ បានមកជួបជុំគ្នានៅមុខគេហដ្ឋានលោកបុលសូណារ៉ា ផង នៅតាមទីលានប្រជុំជនធំៗរបស់ក្រុងសៅប៉ូឡូ ក្រុងដ៏ធំជាងគេបំផុតរបស់ប្រទេសផង ដើម្បីអបអរជ័យជំនះ។ សម្រាប់ពួកគេ លោក បុលសូណារ៉ូ គឺជាជម្រើសថ្មី ជាបុរសខ្លាំងដែលអាចប្រឈមនឹងអំពើពុករលួយរ៉ាំរៃក្នុងរដ្ឋាភិបាល និងបទឧក្រិដ្ឋហិង្សាកាន់តែខ្លាំងនៅក្នុងប្រទេស។
ប៉ុន្តែ ពីរបីម៉ោងមុនការបិទការិយាល័យបោះឆ្នោត ប្រធានតុលាការកំពូលប្រេស៊ីល បាន ប្រកាសស្នើសុំឱ្យអនាគតប្រធានាធិបតី គោរពរដ្ឋធម្មនុញ្ញ។ “កាតព្វកិច្ចដំបូងរបស់អនាគតប្រធានាធិបតីគឺគោរពរដ្ឋធម្មនុញ្ញ និងចាំបាច់ត្រូវគោរពមាត្រា៣ ដែលចែងអំពីកម្មវត្ថុគ្រឹះរបស់ប្រទេស ៖ ស្ថាបនាសង្គមសេរី ត្រឹមត្រូវ និងសាមគ្គីភាព -ធានាការអភិវឌ្ឍន៍ជាតិ - ទីបីកាត់បន្ថយភាពក្រីក្រ និងវិសមភាពសង្គម/តំបន់ និងទីបួន ត្រូវធានាសុខមាភាពពលរដ្ឋគ្រប់រូប ដោយគ្មានរើសអើងដើមកំណើត ពូជសាសន៦ ភេទ ពណ៌សម្បុរស្បែក អាយុ ទេ។ អនាគតប្រធានាធិបតីត្រូវគោរពស្ថាប័នរដ្ឋ ប្រជាធិបតេយ្យ និងនយោបាយពហុបក្ស”។
នេះជាមិនមែនជាសេចក្តីថ្លែងការណ៍ធម្មតាឡើយ ! បើទោះបីជាប្រធានតុលាការមិនបានបញ្ជាក់ឈ្មោះបេក្ខជនណាម្នាក់ក្នុងចំណោមបេក្ខជនប្រធានាធិបតីទាំងពីរឱ្យចំក៏ដោយ ក៏គេអាចយល់បានថាសំដៅលើរូបលោក បុលសូណារ៉ូដែរ។ ក្នុងពេលធ្វើយុទ្ធនាការឃោសនាបោះឆ្នោត កូនប្រុសម្នាក់របស់លោក ហ្សែ បុលសូណារ៉ូ ដែលបានជាប់ឆ្នោតជាសមាជិកសភាសហព័ន្ធ ជាថ្មី បានអះអាងថា គេត្រូវការតែ “មេម្នាក់និងកូនទាហានម្នាក់” សម្រាប់បិទតុលាការកំពូល។
ប្រធានាធិបតីជាប់ឆ្នោតថ្មីបានសន្យាការពាររដ្ឋធម្មនុញ្ញ ប្រជាធិបតេយ្យ និងសេរីភាព ! តែក្តីព្រួយបារម្ភ និងការគំរាមកំហែងប្រជាធិបតេយ្យមានខ្លាំង ព្រោះថា លោក បុលសូណារ៉ូ ប្រៀបដូចជាលោក ដូណាល់ត្រាំ មានចរិតបែបផ្តាច់ការខ្លាំង និងវាយប្រហាររិះគន់ដោយចំៗប្រព័ន្ធសារព័ត៌មានធំៗថាជាប្រភពផ្តល់ដំណឹងមិនពិត។ អគ្គលេខាអង្គការអ្នកយកការណ៍គ្មានព្រំដែនបានទាញសញ្ញាអាសន្នថា លោក ហ្សែ បុលសូណារ៉ូ ជាតំណាងនៃគំរាមកំហែងសេរីភាពសារព័ត៌មាននិងប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ