ការបោះឆ្នោតប្រេស៊ីល៖បេក្ខជនប្រធានាធិបតីស្តាំនិយមជ្រុលឡើងកូដ ដោយសារបណ្តាញសង្គម
ចុះផ្សាយនៅថ្ងៃ៖
ស្តាប់ - ០៧:១៩
នៅប្រទេសប្រេស៊ីល ប្រជាជន ប្រមាណ ១៤៧លាននាក់ត្រូវចេញទៅបោះឆ្នោត នៅថ្ងៃអាទិត្យទី២៨ តុលា ដើម្បីជ្រើសរើសប្រធានាធិបតីថ្មី សម្រាប់អាណត្តិ៥ឆ្នាំ។ នៅក្នុងប្រទេសដែលកំពុងញាំញ៉ី ដោយសាររឿងអាស្រូវពុករលួយរបស់រដ្ឋាភិបាល ការកើនឡើងនៃបទឧក្រិដ្ឋដ៏ហិង្សា បេក្ខជនមកពីក្រុមស្តាំនិយមជ្រុល កំពុងឡើងកូដខ្លាំង និងមានសំឡេងគាំទ្រ នាំមុខ បេក្ខជនមកពីគណបក្សឆ្វេងនិយម ដែលធ្លាប់ដឹកនាំរដ្ឋាភិបាលប្រេស៊ីល អស់១០ឆ្នាំមកហើយ។
ប្រេស៊ីលរៀបចំការបោះឆ្នោតប្រធានាធិបតីជុំទី២ នៅថ្ងៃអាទិត្យទី ២៨តុលា។ ជាការបោះឆ្នោត ដែលអាចធ្វើឲ្យប្រទេសធំជាងគេនៅអាមេរិកឡាទីន ធ្លាក់ទៅក្រោមការកាន់កាប់សាជាថ្មី នៃរបបផ្តាច់ការ បើសិន បេក្ខជនស្តាំនិយមជ្រុល លោកហ្សែ បុលសូណារ៉ូ ទទួលជ័យជំនះ លើគូប្រជែងមកពីគណបក្សពលករ របស់អតីតប្រធានាធិបតីដ៏ល្បីឈ្មោះ លោកលូឡា។
ការស្ទង់មតិ នៅថ្ងៃសៅរ៍ម្សិលមិញបានបង្ហាញថា លោកហ្សែ បុលសូណារ៉ូ បេក្ខជនស្តាំនិយមជ្រុលប្រេស៊ីល បានទទួលសំលេងគាំទ្រ ដល់ទៅ៥៤ភាគរយ ចំណែកលោកហ្វ៊ែរណង់ដូ ហាដដាដបេក្ខជនមកពីគណបក្សកណ្តាលឆ្វេងនិយម បានទទួលសំឡេងគាំទ្រតែ ៤៥ភាគរយប៉ុណ្ណោះ។ ការបោះឆ្នោតប្រធានាធិបតីប្រេស៊ីល ជាព្រឹត្តិការណ៍ដែលគេតាមដានខ្លាំង ព្រោះវាជាលើកទី១ ដែលក្រុមស្តាំនិយមជ្រុល ឡើងកូដប្រជាប្រិយភាព ទទួលសំឡេងគាំទ្រខ្លាំង នៅប្រទេសប្រេស៊ីល ពោលគឺចាប់តាំងពីរបបផ្តាច់ការ យោធា បានបិទបញ្ចប់ នៅប្រេស៊ីល នៅឆ្នាំ ១៩៨៥។
បើសិនអតីតប្រធានាធិបតីប្រេស៊ីលដ៏ល្បីល្បាញ លោកលូឡា មិនជាប់ពន្ធនាគារដោយសារតែរឿងអាស្រូវពុករលួយទេ នោះ លោក ហ្សែរ បុលសូណារ៉ូ ក៏ទំនងជាមិនអាចឈានដល់ចំណុចខ្ពស់ដូចថ្ងៃនេះដែរ។ តាំងពីបោះឆ្នោតប្រធានាធិបតី ជុំទី ១ម្ល៉េះ បេក្ខជន ស្តាំនិយមជ្រុល លោកបុលសូណារ៉ូ បានទទួលសំឡេងគាំទ្រ ច្រើន គឺនាំមុខ បេក្ខជន មកពីគណបក្សពលករ លោក ហ្វ៊ែរណង់ដូ ហាដដាដ ដែលត្រូវបានលោកលូឡា ទើបជ្រើសរើសឲ្យជំនួសលោក សម្រាប់តំណាងបក្សពលករប្រេស៊ីល កាលពីខែសីហាកន្លងទៅ។ លោកហ្វ៊ែរណង់ដូ ហាដដាដ អតីតចៅហ្វាយក្រុងសៅប៉ូឡូ ដែលប្រជាជនប្រេស៊ីលមិនសូវស្គាល់ពីមុនមកសោះ គឺជាអ្នកនយោបាយ ដែលមិនសូវមានបុគ្គលិក លក្ខណៈ ទាក់ទាញខ្លាំង ដូចអតីតប្រធានាធិបតីប្រេស៊ីល លោកលូឡានោះទេ។
នៅក្នុងបរិបទដែលប្រទេសប្រេស៊ីលកំពុងជួបរឿងអាស្រូវពុករលួយ របស់មន្រ្តីរដ្ឋាភិបាល មកពី គណបក្សពលករ លោកហាដដាដ កំពុងរងថ្មបាក់មួយទៀត ដោយសារអប្រជាប្រិយភាពរបស់រដ្ឋាភិបាល។ ប្រជាជនប្រេស៊ីល ពេលនេះ កំពុងចង់ផ្លាស់ប្តូរថ្នាក់ដឹកនាំថ្មី ដែលមិនធ្លាប់ប្រលាក់ប្រឡូសនឹងរឿងពុករលួយទាល់តែសោះ។ សម្រាប់កែវភ្នែកប្រជាជនប្រេស៊ីល លោកបុលសូណារ៉ូ ជាបេក្ខជនដែលសក្តិសមបំផុត។ គេអាចនិយាយថា អ្នកដែលទៅបោះឆ្នោត គាំទ្រលោកហ្សែ បុលសូណារ៉ូ គឺអ្នកដែលនឿយណាយ ប្រឆាំងនឹងប្រព័ន្ធដឹកនាំរបស់រដ្ឋាភិបាលចាស់។
ហេតុអ្វីបានជាលោកបុលសូណារ៉ូទទួលបានកូដប្រជាប្រិយភាពខ្លាំង?
ជាសមាជិកសភាប្រេស៊ីល មកពីគណបក្សដែលមិនសូវល្បីឈ្មោះ លោកបុលសូណារ៉ូ ត្រូវបានគេចាប់ស្គាល់មុខ តាមរយៈ សំដី រិះគន់មើលងាយមនុស្សស្រី។ នៅ ឆ្នាំ ២០០៣ នៅពេលឈ្លោះជាមួយអ្នកតំណាងរាស្រ្តស្រ្តីម្នាក់ លោកធ្លាប់បានជេរប្រមាថ គូសត្រូវរបស់លោកមិនស្មើ សមនឹងត្រូវគេរំលោភផង។ លោកបុលសូណារ៉ូ ធ្លាប់បន្លឺពាក្យស្អប់រើសអើងប្រកាន់ពូជសាសន៍ ដោយថា ប្រជាជនស្បែកខ្មៅ ខ្ជិល ឬថា លោកសុខចិត្តឲ្យកូនរបស់លោក ស្លាប់ ជាជាង ទៅរៀបការជាមួយ មនុស្សប្រុសដូចគ្នា។
ជាអ្នកកាន់សាសនាកាតូលិក ដ៏មុតជ្រៅ លោកបុលសូណារ៉ូបានទទួលការគាំទ្រពីមេដឹកនាំសាសនាគ្រឹស្ត នៅប្រេស៊ីល ជាទី ១ភាគ៣នៃប្រជាជនជាគ្រឹស្តសាសនិក។ នៅក្នុងវិស័យសេដ្ឋកិច្ច លោកបានសន្យា ធ្វើឯកជនភាវូបនីយកម្មនៅប្រទេសប្រេស៊ីល ជាទី ដែលក្រុមអ្នកវិនិយោគ អ្នកមាន ធុញទ្រាន់នឹងរបបនយោបាយចាស់របស់រដ្ឋាភិបាលដឹកនាំដោយគណបក្សពលករ។
ការកើនឡើងសម្លេងគាំទ្រ លោកបុលសូណារ៉ូ បេក្ខជនប្រធានាធិបតីមកពីក្រុមស្តាំនិយមច្រុលប្រេស៊ីលលើកនេះ កើតមានឡើង នៅក្នុងកាលៈទេសៈមួយដែលពលរដ្ឋប្រេស៊ីល កំពុងមិនសប្បាយចិត្ត ហើយនិងខកចិត្តចំពោះការដឹកនាំរបស់រដ្ឋាភិបាល មកពីគណបក្សឆ្វេងនិយម ដែលពេលនេះកំពុងរងការចោទប្រកាន់ពីតុលាការ ក្នុងបទប្រព្រឹត្តអំពើពុករលួយ ជាមួយក្រុមហ៊ុនប្រេងជាតិប្រេស៊ីល។
នៅខណៈដែលប្រជាជនប្រេស៊ីលកំពុងមិនសប្បាយចិត្តនឹងបញ្ហាសេដ្ឋកិច្ច ភាពក្រីក្រ ការកើនឡើងនៃអំពើហិង្សាឧក្រិដ្ឋកម្ម ហើយនិងរឿងអាស្រូវពុករលួយដ៏ខ្ចរខ្ចាយរបស់រដ្ឋាភិបាលមុនផង លោកហ្សែ បុលសូណារ៉ូ ដែលមិនធ្លាប់ចូលប្រលូកក្នុងរដ្ឋាភិបាលម្តងសោះនោះ បានឆ្លៀតឆក់ឱកាសដែលអតីតប្រធានាធិបតី ល្បីល្បាញ លោកលូឡា ជាប់ពន្ធនាគារ មិនអាចចូលឈរឈ្មោះបោះឆ្នោត ដើម្បី ទាក់ទាញសំលេងគាំទ្រពីប្រជាជនប្រេស៊ីល។
លោកបុលសូណារ៉ូ បានទទួលសំឡេងគាំទ្រភ្លូកទឹកភ្លូកដីលើកនេះ ក៏ដោយសារតែយុទ្ធសាស្រ្តឃោសនារបស់លោក គឺខុសដាច់បេក្ខជន ផ្សេងទៀត។ រងរបួសដោយសារការចាក់នឹងកាំបិតរបស់បុរសម្នាក់ ដែលប្រឆាំងនឹងនយោបាយរបស់លោក លោកបុលសូណារ៉ូ បានយកលេស មិនទៅចូលរួម ក្នុងការពិភាក្សា សួរដេញដោលរបស់បេក្ខជននយោបាយនៅតាមទូរទស្សន៍។ លោកបុលសូណារ៉ូ ទាត់ចោល ប្រព័ន្ធឃោសនាចាស់ ដូចជាការពិភាក្សា ដេញដោលរបស់បេក្ខជននៅតាមទូរទស្សន៍នោះទេ ប៉ុន្តែ ងាកទៅប្រើបណ្តាញសង្គមនៅលើអ៊ីនធ័រនែតវិញ។
បេក្ខជនស្តាំនិយមជ្រុលប្រេស៊ីល លោក បុលសូណារ៉ូ បានទទួលសំឡេងគាំទ្រច្រើន ដែលគេមិននឹកស្មានដល់ នៅពេលនេះ ក៏ដោយសារតែក្រុមរបស់លោក បានសម្រុកផ្តោតខ្លាំងលើការឃោសនានៅលើបណ្តាញសង្គមទៅវិញ ដូចជា ហ្វេសប៊ុក Twitter whats App ជាដើម។ លោកបុលសូណារ៉ូ ដែលធ្លាប់មានអ្នកតាមតែប៉ុន្មានពាន់នាក់ នៅលើបណ្តាញសង្គម កាលពីឆ្នាំ ២០១៤ ឥលូវនេះ គឺមានអ្នកតាមចូលចិត្តគាំទ្រ ដល់ទៅជាង ១៥លាននាក់ឯណោះ។
គេជឿថា ជាមួយបណ្តាញសង្គមដែលគ្មានការត្រួតពិនិត្យ គ្រប់ជ្រុងជ្រោយពីរដ្ឋាភិបាល ក្រុមស្តាំនិយមជ្រុល របស់លោកបុលសូណារ៉ូ បានផ្សព្វផ្សាយព័ត៌មានមិនពិតជាច្រើន ដូចជាសំណុំរឿងពុករលួយរបស់រដ្ឋាភិបាល បំប៉ោងរឿងឧក្រិដ្ឋកម្មសម្លាប់មនុស្ស ដើម្បីទាក់ទាញម្ចាស់ឆ្នោត។ នៅលើបណ្តាញសង្គម លោកបុលសូណារ៉ូ ដែលធ្លាប់ជាទាហានឆ័ត្រយោង មិនលាក់លៀមទេ ពីកម្មវិធីនយោបាយរបស់លោក ដែលនៅក្នុងនោះ លោកបានសន្យានឹងបំពាក់អាវុធ ឲ្យប្រជាជនដើម្បីការពារខ្លួន។ នៅក្នុងប្រទេសដែលមានឧក្រិដ្ឋកម្មសម្លាប់មនុស្សដល់ទៅ ជាង ៦សែនករណី នៅឆ្នាំ ២០១៧ កម្មវិធីនយោបាយរបស់លោកបុលសូណារ៉ូទាក់ទាញខ្លាំងណាស់ប្រជាជនប្រេស៊ីល ដែលអស់ជំនឿលើការការពាររបស់ប៉ូលិស ទាហានប្រេស៊ីល នៅចំពោះការគំរាមកំហែងរបស់ឧក្រិដ្ឋជនជួញដូរគ្រឿងញៀន។ លោកបុលសូណារ៉ូ បានសន្យាផងដែរថា នឹងកែច្បាប់ កុំឲ្យដាក់ទោសប៉ូលិសដែលបានបាញ់សម្លាប់ជនសង្ស័យ នៅពេលកំពុងបំពេញបេសកកម្ម ឬក៏អនុញ្ញាតិឲ្យប៉ូលិសអាចធ្វើទារុណកម្ម ជនសង្ស័យជួញដូរគ្រឿងញៀនជាដើម។
តើប្រេស៊ីលនឹងអាចក្លាយជារបបផ្តាច់ការយោធាសាជាថ្មី
នៅក្នុងបណ្តាញសង្គម លោកបុលសូណារ៉ូមិនរារែកនឹងនិយាយថា នៅក្នុងការដឹកនាំរបស់ខ្លួន របបសឹកប្រេស៊ីលបានប្រព្រឹត្តកំហុសមួយ គឺបានត្រឹមតែធ្វើទារុណកម្ម ប៉ុន្តែ មិនបានសម្លាប់ ដែលជាហេតុធ្វើឲ្យកើតមានក្រុមប្រឆាំង។ ជាមួយនឹងជំហរនយោបាយបែបនេះ ៥០ភាគរយនៃប្រជាជនប្រេស៊ីលដែលគេបានសំភាសន៍បានសំដែងការព្រួយបារម្ភដែលថា ប្រេស៊ីលនឹងអាចធ្លាក់ក្នុងដៃរបស់ ជនអំណាចផ្តាច់ការ។ ប៉ុន្តែ អ្នកជំនាញខាងនយោបាយប្រេស៊ីលមួយចំនួនវាយតម្លៃថា ទោះជាលោកបុលសូណារ៉ូ អាចជាប់ឆ្នោត កា្លយជាប្រធានាធិបតីប្រេស៊ីល ប៉ុន្តែ ប្រេស៊ីលដែលមានស្ថាប័នអាយ្យការឯករាជ្យ មានតុលាការកំពូលមានសមត្ថភាព ហើយនិងសភា ដែលដំណើរការ មិនស្ថិតក្រោមអំណាចរបស់ប្រធានាធិបតី នៅតែអាចទប់ស្កាត់មិនឲ្យលោកបុលសូណារ៉ូ ប្រែក្លាយប្រេស៊ីលទៅជាប្រទេសផ្តាច់ការសាជាថ្មីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ