ណាសានឹងបាញ់បង្ហោះផ្កាយរណបទៅសង្កេតតាមដានការរលាយទឹកកកលើផែនដី
ទីភ្នាក់ងារអវកាសណាសា របស់អាមេរិក នៅថ្ងៃសៅរ៍នេះ នឹងបាញ់បង្ហោះ បញ្ជូនផ្កាយរណប ដ៏ទំនើបមួយទៅក្នុងទីអវកាស ដើម្បីតាមដានសង្កេតមើល ទំហំផ្ទៃទឹកកក នៅលើផែនដី។ គោលដៅចំបងរបស់ទីភ្នាក់ងារណាសា គឺដើម្បីចង់ដឹងពីបរិមាណទឹកកកដែលរលាយ ទៅធ្វើឲ្យកំពស់ទឹកសមុទ្រកើនឡើង នៅលើផែនដីដែលកាន់តែក្តៅខ្លាំង ដោយសារឧស្ម័នផ្ទះកញ្ចក់។
ចុះផ្សាយនៅថ្ងៃ៖
ស្តាប់ - ០២:១៩
មីស៊ីលផ្ទុកផ្កាយរណប Laserទម្ងន់កន្លះតោន នឹងត្រូវបាញ់បង្ហោះចេញ ពីស្ថានីយ៍អវកាសក្នុងរដ្ឋកាលីហ្វនីអាមេរិក។ សម្រាប់អ្នកទទួលខុសត្រូវកម្មវិធីបាញ់បង្ហោះផ្កាយរណប ICESat 2 បេសសកម្ម ដែលតម្លៃ ១ពាន់លានដុល្លារ អាមេរិក សំខាន់ខ្លាំងណាស់សម្រាប់ផ្នែកវិទ្យាសាស្រ្ត។ សំខាន់ ព្រោះថា តាំងពី១០ឆ្នាំមកហើយ ទីភ្នាក់ងារណាសា លែងមានផ្កាយរណប សម្រាប់តាមដានទំហំ និងកម្រាសផ្ទាំងទឹកកកនៅលើផែនដី។ ផ្កាយរណបចុងក្រោយរបស់ណាសា ដែលមានតួនាទីថត តាមដានផ្ទាំងទឹកកកនៅលើផែនដីបានបញ្ចប់បេសកកម្ម កាលពីឆ្នាំ ២០០៩។ កាលណោះ តួលេខប្រមូលបានពីផ្កាយរណប បានជួយឲ្យអ្នកវិទ្យាសាស្រ្តស្វែងយល់ថា ផ្ទាំងទឹកកកបានចុះស្តើងជាងមុន ចំណែកផ្ទៃលើផ្ទាំងទឹកកកនៅជាយតំបន់ទឹកកក Groenland និងមហាសមុទ្រអង់តាក់ទិក គឺបានរលាយបាត់អស់។
ក្នុងរយៈពេល១០ឆ្នាំ នេះ ដោយសារតែគ្មានផ្កាយរណប មធ្យោបាយរបស់ទីភ្នាក់ងារ ណាសា ដើម្បីថតតាមដានផ្ទាំងទឹកកក ធ្វើឡើងតាមរយៈយន្តហោះតែប៉ុណ្ណោះ។ ប៉ុន្តែ នៅក្នុងកាលៈទេសៈបច្ចុប្បន្ន ដែលផែនដីកំពុងប្រឈមនឹងអាកាសធាតុប្រែប្រួល ហើយនិងការគំរាមកំហែងនៃការឡើងកំពស់ទឹកសមុទ្រទៅលើទីក្រុងជាប់ឆ្នេរសមុទ្រ ដោយសារតែការឡើងកំដៅនៃផែនដី ការប្រមូលទិន្នន័យលម្អិត និងទាន់សភាពការណ៍ គឺជារឿងបន្ទាន់។ គេសង្ឃឹមថា ជាមួយនឹងបេសសកម្មលើកនេះ ផ្កាយរណបLaser ដ៏ទំនើបដែលជាបច្ចេកវិទ្យាចុងក្រោយរបស់អ្នកវិទ្យាសាស្រ្ត នឹងផ្តល់ព័ត៌មានលម្អិតមែនទែន របស់ផ្ទៃទឹកកក នៅលើផែនដី តាំងពីទំហំ កម្រាសរបស់វា ហើយនិងបរិមាណរលាយ បើទោះបីជា តិចតួចក្នុងមួយថ្ងៃៗ ហើយផលប៉ះពាល់របស់វាទៅលើកំពស់ទឹកសមុទ្រ។
ពោលគឺ តាមរយៈផ្កាយរណបLaser អ្នកវិទ្យាសាស្រ្តចង់ដឹងពីការចូលរួមរបស់ទឹកកករលាយ ទៅក្នុងកំពស់ទឹកសមុទ្រ។
តាមទីភ្នាក់ងារណាសា ទោះបីជាLaser មានកម្លាំងខ្លាំងក្តី ប៉ុន្តែ វានឹងមិនទៅប៉ះពាល់ ធ្វើឲ្យរលាយទឹកកក នៅកន្លែងដែលពន្លឺLaser បានទៅដល់នោះទេ ព្រោះថា Laser ស្ថិតនៅលើផ្កាយរណបដែលហោះក្នុងគន្លងតារាវិថី ចម្ងាយ ៥០០គីឡូម៉ែត្រពីផែនដី។ បេសសកម្មថតតាមដានផ្ទៃ និងការរលាយទឹកកកនៅលើប៉ូលរបស់ផែនដី នឹងមានរយៈពេល៣ឆ្នាំ ប៉ុន្តែ ជាមួយនឹងថាមពលប្រេងបម្រុង ផ្កាយរណបLaser អាចធ្វើការបានដល់១០ឆ្នាំ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ