អាមេរិកកាត់ជំនួយមនុស្សធម៌ជាង ២០០លានដុល្លារសម្រាប់ពលរដ្ឋប៉ាឡេស្ទីន
អាមេរិកបានប្រកាសឲ្យដឹងនៅថ្ងៃសុក្រ ទី២៤ សីហាពីការលុបចោលជំនួយមនុស្សធម៌សម្រាប់ប្រជាជនប៉ាឡេស្ទីនដែលមានទឹកប្រាក់ជាង ២០០លានដុល្លារ។ តាមគម្រោង ជំនួយមនុស្សធម៌នេះត្រូវប្រើនៅក្នុងកម្មវិធីមនុស្សធម៌សម្រាប់ទឹកដីតំបន់ស៊ីហ្សកដានី និងតំបន់ហ្កាហ្សា។ អ្នកទទួលខុសត្រូវជាន់ខ្ពស់អាមេរិកម្នាក់នៃក្រសួងការបរទេសបានបញ្ជាក់ថា ទឹកប្រាក់ជំនួយដែលកាត់ពីប៉ាឡេស្ទីនពេលនេះនឹងត្រូវបង្វែរទៅប្រើប្រាស់នៅក្នុងកម្មវិធីអាទិភាពនៅកន្លែងផ្សេងវិញ។
ចុះផ្សាយនៅថ្ងៃ៖
ស្តាប់ - ០១:៥២
គឺតាមសំណើរបស់លោកដូណាល់ ត្រាំដែលរដ្ឋបាលអាមេរិកបានសម្រេចលុបចោលជំនួយមនុស្សធម៌ជាង ២០០លានដុល្លារសម្រាប់ប៉ាឡេស្ទីនពេលនេះ។ ទីក្រុងវ៉ាស៊ីនតោនបានទម្លាក់កំហុសដាក់ចលនាប៉ាឡេស្ទីនហាម៉ាស់ថាជាអ្នកទទួលខុសត្រូវនៃការលុបចោលជំនួយមនុស្សធម៌ និងការធ្លាក់ចុះនៃលក្ខខណ្ឌមនុស្សធម៌របស់ប្រជាជនប៉ាឡេស្ទីន។ ជាមួយនឹងការកាត់ជំនួយមនុស្សធម៌នេះ អាមេរិកចង់បញ្ចុះកម្លាំងរបស់ពួកហាម៉ាស់ដែលកំពុងកាន់កាប់តំបន់ហ្កាហ្សា និងចង់ដាក់សម្ពាធលើរដ្ឋអំណាចប៉ាឡេស្ទីនឲ្យវិលត្រឡប់ចូលតុចរចាឡើងវិញ។
តែលោក Dave Harden អតីតអ្នកទទួលខុសត្រូវទីភ្នាក់ងារអាមេរិកដើម្បីអភិវឌ្ឍតំបន់ស៊ីហ្សកដានី និងតំបន់ហ្កាហ្សាមិនបានយល់ឃើញយ៉ាងដូចនេះទេ។ សម្រាប់លោក Harden គំនិតផ្តួចផ្តើមរបស់រដ្ឋបាលអាមេរិកក្នុងការកាត់ជំនួយមនុស្សធម៌លើប្រជាជនប៉ាឡេស្ទីននឹងជួយពង្រឹងអំណាចរបស់ពួកហាម៉ាស់ និងធ្វើឲ្យលក្ខខណ្ឌជីវិតរស់នៅប្រចាំរបស់ពលរដ្ឋប៉ាឡេស្ទីនដែលកំពុងជួបវិបត្តិមនុស្សធម៌ស្រាប់នឹងកាន់ធ្លាក់ដុនដាបថែមទៀត ពិសេសអ្នករស់នៅក្នុងតំបន់ហ្កាហ្សា។
ការកាត់បន្ថយជំនួយជាង ២០០លានដុល្លាររបស់អាមេរិកចំពោះប៉ាឡេស្ទីននឹងធ្វើឲ្យប៉ះពាល់ដល់បេសកកម្មមនុស្សធម៌មួយចំនួន ដូចយ៉ាងការចែកចាយស្បៀងអាហារដល់អ្នកខ្វះខាតខ្លាំង ជំនួយផ្នែកសុខភាព ឬមួយជំនួយក្នុងកម្មវិធីអប់រំជាដើម។ លោក Hanane Achraoui អ្នកទទួលខុសត្រូវជាន់ខ្ពស់ម្នាក់របស់អង្គការរំដោះប៉ាឡេស្ទីន OLP បានអះអាងថា អាមេរិកបានយកជំនួយមនុស្សធម៌ធ្វើជាឧបករណ៍នយោបាយ និងថា ប្រជាជនប៉ាឡេស្ទីនមិនចុះញ៉មនឹងការគំរាមសម្លុតឡើយ។ គួររម្លឹកថា ទំនាក់ទំនងរវាងអាមេរិក និងប៉ាឡេស្ទីនបានស្គាល់ភាពតានតឹងតាំងពីដំណាច់ឆ្នាំ ២០១៧ មកម្ល៉េះ ពោលតាំងពីលោកដូណាល់ ត្រាំបានទទួលស្គាល់ហ្សេរ៉ុយសាឡិមជាទីក្រុងផ្តាច់មុខរបស់ប្រទេសអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ