លោកត្រាំ ឱ្យមេធាវីរបស់សេតវិមាន សហការជាមួយរដ្ឋអាជ្ញាពិសេសអង្កេតរឿងរុស្ស៊ី
មេធាវីប្រចាំរបស់សេតវិមាន លោក Donald McGahn បានសហការយ៉ាងល្អិតល្មួតជាមួយក្រុមការងាររបស់រដ្ឋអាជ្ញាពិសេស លោក រ៉ូប៊ែរ មូឡឺ Robert Mueller។ រដ្ឋអាជ្ញាពិសេស ដែលកំពុងបើកអង្កេត អំពីការលូកដៃជាយថាហេតុរបស់រុស្ស៊ី ជាមួយក្រុមការងាររបស់លោកត្រាំ នៅក្នុងយុទ្ធនាការឃោសនាបោះឆ្នោតប្រធានាធិបតីឆ្នាំ២០១៦។ នេះបើតាមកាសែត ញូវយ៉កថែមស៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោកដូណាល់ ត្រាំ បានប្រកាសនៅថ្ងៃល្ងាចមិញ ថាលោកបានផ្តល់ការអនុញ្ញាតឱ្យមេធាវីរបស់សេតវិមាន ព្រមទាំងបុគ្គលិករបស់វិមានប្រធានាធិបតីផ្សេងទៀត ទៅសហការឱ្យបានពេញលេញ ជាមួយក្រុមរដ្ឋអាជ្ញាពិសេស ដែលកំពុងអង្កេតសំណុំរឿងសង្ស័យថារុស្ស៊ីអាចលូចដៃក្នុងយុទ្ធនាការឃោសនាបោះឆ្នោតប្រធានាធិបតីអាមេរិក។ មិនតែប៉ុណ្ណោះ លោកត្រាំបានបង្ហោះសារបន្ថែមទៀតថា « លើសពីនេះ យើងបានផ្តល់ឯកសារជាង១លានទំព័រទៀត។ ជាតម្លាភាពបំផុតក្នុងប្រវត្តិសាស្ត្រ ! គ្មានទេការលូកដៃ ! គ្មានទេការរារាំង!”។
សេចក្តីប្រកាសរបស់លោកត្រាំ តាមប្រព័ន្ធទ្វីតទ័រ បានបង្ហោះឡើង ក្រោយពីកាសែតញូវយ៉កថែមស៍ បានផ្សព្វផ្សាយថា មេធាវីរបស់សេតវិមាន លោក Donald McGahn បានជួបសហការ ជាមួយក្រុមអង្កេតដឹកនាំដោយលោករដ្ឋអាជ្ញា រ៉ូប៊ែរ មូឡឺ ចំនួនបីលើក ក្នុងរយៈពេល៩ខែចុងក្រោយនេះ ដោយផ្តល់បទសម្ភាសន៍ឆ្លើយឆ្លងដល់ទៅ ប្រមាណជាង៣០ម៉ោង។
ជាការសហការ ដោយស្ម័គ្រចិត្ត ក្នុងនាមជាសាក្សី ដូចអ្វីដែលសេតវិមានលើកឡើងមែន !បើតាមសំណេររបស់កាសែតដដែល លោកមេធាវី បានរៀបរាប់យ៉ាងលម្អិត គ្រប់វគ្គគ្រប់ស្នើដែលអ្នកអង្កេតចាប់អារម្មណ៍ ដើម្បីផ្ទៀងផ្ទាត់ថាលោកប្រធានាធិបតី ត្រាំ ពិតជាមានចេតនាចង់រារាំងការអង្កេត ដូចជាប៉ុនប៉ងផ្តួលលោក រ៉ូប៊ែរ មូឡឺ ឬការដកនាយកភ្នាក់ងារចារកិច្ចអាមេរិកFBI លោក ចេម ខមី។ លោកមេធាវី មិនបានផ្តល់ព័ត៌មានអ្វីដែលអាក្រក់ប៉ះពាល់ដល់លោកប្រធានាធិបតីត្រាំទេ ប៉ុន្តែលោកបានឆ្លៀតព្រមានថា មិនដែលឃើញលោកត្រាំ ធ្វើអ្វីហួសពីអំណាចស្របច្បាប់របស់លោកឡើយ។
សម្រាប់កាសែតញូវយ៉កថែមស៍ អ្វីដែលគួឱ្យកត់សម្គាល់ខ្លាំងនោះ គឺគេកម្រឃើញមេធាវីរបស់សេតវិមានណា បើកទូលាយខ្លាំងជាមួយក្រុមអង្កេត ដូចលោកMcGahnនេះណាស់។ សូមបញ្ជាក់ថា តាំងពីផ្ទុះការសង្ស័យមក លោក ដូណាល់ ត្រាំ តែងច្រានចោលរាល់ការចោទប្រកាន់ តាំងពីដំបូង និងបានចាត់ទុកការអង្កេតរបស់រដ្ឋអាជ្ញាពិសេសនេះ ថាជាម៉ាស៊ីន ប្រឆាំងនឹងលោកតែប៉ុណ្ណោះ ហើយបានអំពាវនាវឱ្យបិទបញ្ចប់ការអង្កេតទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ