អាមេរិក គ្រោងដាក់ទណ្ឌកម្មលើរុស្ស៊ីករណីបំពុលសម្លាប់អតីតភ្នាក់ងារចារកិច្ចរុស្សី
សហរដ្ឋអាមេរិក បានប្រកាសឲ្យដឹង កាលពីថ្ងៃពុធ ទី៨ សីហាម្សិលមិញនេះថា ខ្លួនកំពុងតែរៀបចំដាក់ទណ្ឌកម្មថ្មីទៅលើប្រទេសរុស្ស៊ី ជុំវិញរឿងដែលទីក្រុងមូស្គូ ប៉ុនប៉ងសម្លាប់អតីតចារបុរសរុស្សី ដែលបំរើការឲ្យអង់គ្លេស តាមរយៈការប្រើប្រាស់សារធាតុពុល បំពានលើច្បាប់អន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
“ទណ្ឌកម្មថ្មីទៅលើរុស្សី ធ្វើឡើងក្នុងគោលបំណងផ្តន្ទាទោសរដ្ឋាភិបាលរបស់លោកប្រធានាធិបតី វ្ល៉ាឌីមៀរពូទីន ដែលនៅពីក្រោយការប្រើប្រាស់សារធាតុពុល ប៉ុនប៉ងសម្លាប់មនុស្សក្នុងទឹកដីអង់គ្លេស។ ទណ្ឌកម្មថ្មីនេះ នឹងចូលជាធរមានក្នុងរយៈពេល ១៥ ថ្ងៃ បន្ទាប់ពីចូលដល់ដៃសភា”។ នេះ បើតាមអ្នកនាំពាក្យក្រសួងការបរទេសអាមេរិក។
មន្ត្រីអាមេរិកម្នាក់បានប្រាប់ដោយសុំមិនបញ្ចេញឈ្មោះថា ទណ្ឌកម្មដែលសហរដ្ឋអាមេរិកត្រៀមដាក់លើរុស្សី គឺហាមឃាត់លើការលក់ដូរប្រព័ន្ឋបច្ចេកវិទ្យាសុវត្តិភាពសម្ងាត់របស់អាមេរិក ដែលរុស្សីចង់បានទៅឲ្យរុស្សី។ ហើយទណ្ឌកម្មនេះ អាចកាត់បន្ថយការនាំចេញរាប់រយលានដុល្លារទៅកាន់ប្រទេសរុស្ស៊ី។
រីឯទណ្ឌកម្មបន្ទាប់ អាចនឹងរួមមាន ការរាំងខ្ទប់ប្រាក់កម្ចីរបស់ធនាគារអាមេរិកទាំងអស់ ឲ្យទៅអង្គភាពរុស្ស៊ីនានា ការហាមឃាត់ទាំងស្រុងលើការនាំចេញរបស់សហរដ្ឋអាមេរិកទៅកាន់ប្រទេសរុស្ស៊ី និងការព្យួរទំនាក់ទំនងការទូត។
ទោះបីជាទីក្រុងវ៉ាស៊ីនតោន មិនទាន់បានប្រកាសជាផ្លូវការ ពីទណ្ឌកម្មថ្មីចំពោះរុស្សីយ៉ាងណាក្តី ក៏ដំណឹងនេះ បានបក់បោកនឹងធ្វើឲ្យប្រាក់រូប និងភាគហ៊ុននៅក្នុងទីក្រុងម៉ូស្គូ ធ្លាក់ចុះបាត់ទៅហើយនាពេលបច្ចុប្បន្ននេះ។
គួរជ្រាបថា លោក Sergei Skripal អតីតភ្នាក់ងារចារកិច្ចរុស្សី ដែលធ្វើការឲ្យរដ្ឋអង់គ្លេស ត្រូវបានគេបំពុល ក្នុងទឹកដីអង់គ្លេស កាលពីខែមីនា ឆ្នាំ២០១៨ កន្លងទៅ។ ភ្លាមៗនោះ ប្រទេសអង់គ្លេស បណ្តាប្រទេសទ្វីបអឺរ៉ុប រួមទាំងសម្ព័នមិត្ត មានអាមេរិកជាដើម ក៏ចាប់ផ្ទុះមានសង្គ្រាមការទូតនឹងគ្នាយ៉ាងខ្លាំងជាមួយប្រទេសរុស្សី។ ហើយក៏ព្រោះតែ ភាគីរុស្សីនៅតែបដិសេធដាច់អហង្ការថា មិនបាននៅពីក្រោយហេតុការណ៍ប៉ុនប៉ងបំពុលសម្លាប់នេះ ទើបអាមេរិករៀបចំដាក់ទណ្ឌកម្មថ្មីលើរដ្ឋាភិបាលទីក្រុងម៉ូស្គូតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ