ហេតុអ្វីបានជាអាមេរិក ហើយនិងតួកគីឈ្លោះគ្នា ដោយសារតែរឿងគ្រូគង្វាល?
វិបត្តិការទូតអាមេរិក និងតួកគី កាន់តែធ្លាក់ចុះជ្រៅ។ នៅក្នុងជំនួបក្រៅកិច្ចប្រជុំអាស៊ាន នៅប្រទេសសិង្ហបុរី នៅថ្ងៃសុក្រនេះ ប្រមុខការបរទេសអាមេរិក លោកMike Pompeo បរាជ័យ មិនអាចបញ្ចុះបញ្ចូលឲ្យសមភាគីតួកគី យល់ព្រមដោះលែង គ្រូគង្វាលអាមេរិកាំង ដែលតួកគីបានចាប់ដាក់ពន្ធនាគារ ក្នុងបទចោទប្រកាន់ធ្វើចារកម្ម និងភេរវកម្ម។ វ៉ាស៊ីនតោននៅថ្ងៃពុធ សប្តាហ៍នេះបានប្រកាសដាក់ទណ្ឌកម្មសេដ្ឋកិច្ចលើមន្រ្តីរដ្ឋាភិបាលតួកគី ២រូប ដែលជាប់ពាក់ព័ន្ធ នឹងការចាប់ខ្លួនគ្រូគង្វាលអាមេរិកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
ជំនួបរវាងប្រមុខការបរទេសអាមេរិក តួកគីមិនបានផ្តល់លទ្ធផលវិជ្ជមាន ទៅតាមការទន្ទឹងចង់បានរបស់ក្រុងវ៉ាស៊ីនតោន ដែលទាមទារឲ្យតួកគីដោះលែងជាបន្ទាន់ គ្រូគង្វាលអាមេរិកាំង ដើមចម នៃភាពតានតឹងការទូតមួយរបស់អាមេរិក និងតួកគី។
លោក Brunson គ្រូគង្វាលគ្រិស្តសាសនិក អាមេរិកាំង ទើបត្រូវបានតុលាការតួកគីសម្រេចដាក់ឃុំខ្លួន ក្នុងគេហដ្ឋាន កាលពីសប្តាហ៍មុន បន្ទាប់ពីជាប់ឃុំខ្លួន ក្នុងពន្ធនាគារ ជាង១ឆ្នាំកន្លះ ក្នុងបទចោទប្រកាន់ ធ្វើចារកម្ម ហើយនិងគាំទ្រក្រុមភេរវនិយម។ តាមតុលាការតួកគី លោកBrunson ហើយនិងជនជាតិអាមេរិកាំង៣នាក់ទៀត ដែលធ្វើការសម្រាប់វិហារគ្រិស្តសាសនានៅតួកគីបានធ្វើចារកម្មឲ្យបណ្តាញ Gülen នៅអាមេរិក ដែលរដ្ឋាភិបាលក្រុងអង់ការ៉ាចាត់ទុកជា ក្រុមភេរវនិយម។
គ្រូគង្វាលBrunson ដែលបានបដិសេធការចោទប្រកាន់ បានទទួលការគាំទ្រពីក្រុងវ៉ាស៊ីនតោន ជាពិសេសលោកប្រធានាធិបតីដូណាល់ ត្រាំ។ រដ្ឋាភិបាលអាមេរិកបានទាមទារឲ្យរដ្ឋាភិបាលតួកគីដោះលែងគ្រូគង្វាល Brunson និងជនជាតិអាមេរិកផ្សេងទៀត ដែលវ៉ាស៊ីនតោនចាត់ទុកថា ជាមនុស្សស្អាតស្អំ គ្មានកំហុស។
អាមេរិក ដែលវាយតម្លៃថា អង់ការ៉ាកាន់តែធ្វើឲ្យរឿងធ្លាក់ធ្ងន់ធ្ងរ ដោយសារតែមិនព្រមដោះលែង គ្រូគង្វាលអាមេរិកាំង បានសម្រេចប្រកាសដាក់ទណ្ឌកម្មលើរដ្ឋមន្រ្តីយុត្តិធម៌ ហើយនិងក្រសួងមហាផ្ទៃ តួកគី ដែលអាមេរិកចោទថា ជាអ្នកទទួលខុសត្រូវឲ្យមានការចាប់ខ្លួនជនជាតិអាមេរិកាំងក្នុងទឹកដីតួកគី។ នៅមុនជំនួបជាមួយរដ្ឋមន្រ្តីការបរទេសតួកគី នៅថ្ងៃសុក្រនេះ ប្រមុខការបរទេសអាមេរិក លោក Mike Pompeo បាននិយាយព្រមានជាមុនថា ទណ្ឌកម្ម របស់អាមេរិក ជាសញ្ញាបញ្ជាក់ថា អាមេរិកមិនចាត់ទុកសំណុំរឿង គ្រូគង្វាលជារឿងលេងសើចនោះទេ។ គ្រូគង្វាល Brunson និងជនជាតិអាមេរិកាំងផ្សេងទៀត ដែលស្អាតស្អំ ត្រូវបានគេចាប់ដាក់ឃុំយូរពេកហើយ។ ពួកគេត្រូវការត្រលប់មកផ្ទះ នៅអាមេរិកវិញ។ នេះជាប្រសាសន៍របស់រដ្ឋមន្រ្តីការបរទេសអាមេរិក។
ប្រមុខការបរទេសតួកគី វិញ បាននិយាយនៅក្រោយជំនួបជាមួយភាគីអាមេរិក ថា ពាក្យគំរាមកំហែង ហើយនិងទណ្ឌកម្ម មិនជួយផ្តល់លទ្ធផលនោះទេ។ តួកគីដែលបានរិះគន់ការដាក់ទណ្ឌកម្មរបស់អាមេរិក បានព្រមានតបវិញ ថា នឹងចាត់វិធានប្រឆាំងនឹងការដាក់ទណ្ឌកម្មរបស់អាមេរិកវិញ។
សំណុំរឿងចាប់ឃុំ គ្រូគង្វាលអាមេរិកគ្រាន់តែជារឿងបន្ថែមមួយនៃភាពតានតឹងរវាងអាមេរិក និងតួកគី។ រដ្ឋាភិបាលតួកគី រហូតមកបានទាមទារឲ្យអាមេរិកចាប់បញ្ជូន Gülen មេដឹកនាំក្រុមប្រឆាំងតួកគី ដែលនិរទេសនៅអាមេរិក ដែលលោកប្រធានាធិបតីតួកគីចោទប្រកាន់ថា ជាអ្នកនៅពីក្រោយរដ្ឋប្រហារមិនបានសម្រេចកាលពីឆ្នាំ ២០១៦។ ប៉ុន្តែ អាមេរិក ហាក់ធ្វើមិនដឹង មិនលឺនឹងការទាមទាររបស់តួកគី ដែលតាមពិត ជាសម្ព័ន្ធមិត្តរបស់អាមេរិក នៅក្នុងអង្គការអូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ