តុលាការអាមេរិកបើកសវនការជំនុំជម្រះអតីតប្រធានក្រុមឃោសនារបស់លោកដូណាល់ត្រាំ
សវនការជំនុំជម្រះ អតីតប្រធានក្រុមឃោសនាបោះឆ្នោតរបស់លោកដូណាល់ ត្រាំត្រូវបើកធ្វើ នៅថ្ងៃអង្គារនេះ នៅតុលាការក្រុងវ៉ាស៊ីនតោន។ លោកប៉ូល ម៉ាណាហ្វរ ដែលធ្លាប់ជាប្រធានក្រុមឃោសនាបោះឆ្នោតរបស់លោកដូណាល់ ត្រាំ ត្រូវតុលាការជំនុំជម្រះ កាត់ទោសពីបទគេចពន្ធ លាងលុយ និងរឿងជាប់ទាក់ទងជាមួយអ៊ុយក្រែន។ ក៏ប៉ុន្តែ គេក៏កំពុងតែរង់ចាំមើលដែរ អំពីសំណុំរឿងលូកដៃរបស់រុស្ស៊ី ក្នុងការបោះឆ្នោតប្រធានាធិបតីអាមេរិក ដែលមានលោកដូណាល់ ត្រាំ ជាអ្នកឈ្នះឆ្នោត។
ចុះផ្សាយនៅថ្ងៃ៖
ជាប់ក្នុងឃុំតាំងពីពាក់កណ្តាលខែមិថុនា លោកប៉ូល ម៉ាណាហ្វរ អតីតប្រធានក្រុមឃោសនាបោះឆ្នោត របស់លោកដូណាល់ត្រាំ ត្រូវតុលាការអាមេរិកបើកសនវការជំនុំជម្រះ ចាប់ពីថ្ងៃអង្គារ (ក្នុងរយៈពេល៣សប្តាហ៍) ពីបទគេចពន្ធ លាងលុយ។
ធ្លាប់ជាមនុស្សមានឥទ្ធិពល និងមានលុយចាយវាយហឺហារ នៅវ៉ាស៊ីនតោន លោកប៉ូល ម៉ាណាហ្វរ បានធ្លាក់ខ្លួន និងត្រូវអាជ្ញាធរអាមេរិកចាប់ឃុំខ្លួន ទៅតាមការចោទប្រកាន់របស់រដ្ឋអាជ្ញាពិសេស លោក Robert Mueller ដែលកំពុងស៊ើបអង្កេតលើការលូកដៃរបស់រុស្ស៊ីក្នុងការបោះឆ្នោត អាមេរិក។
ទោះជារដ្ឋអាជ្ញាពិសេស ជាអ្នកផ្តើមគំនិតឲ្យមានការចាប់ខ្លួន លោកប៉ូល ម៉ាណាហ្វរក្តី ប៉ុន្តែ អតីតប្រធានក្រុមឃោសនាបោះឆ្នោតរបស់លោកដូណាល់ ត្រាំ នឹងត្រូវតុលាការបើកការជំនុំជម្រះតែទៅលើបទចោទប្រកាន់ ពីបទលាងលុយ និងលួចគេចពន្ធ តែប៉ុណ្ណោះ។ នៅខែកញ្ញាខាងមុខ អតីតប្រធានក្រុមឃោសនាបោះឆ្នោតរបស់លោកដូណាល់ ត្រាំ នឹងត្រូវនាំខ្លួនមកជំនុំជម្រះម្តងទៀត នៅក្នុងបទចោទប្រកាន់ ស៊ុំគ្រលំ លាងលុយ ដើម្បីផលប្រយោជន៍របស់មេដឹកនាំបរទេស។ ក្រុមស៊ើបអង្កេតរបស់រដ្ឋអាជ្ញាពិសេស សង្ឃឹមថា សវនការជំនុំជម្រះលោកប៉ូល ម៉ាណាហ្វរ នឹងផ្តល់ពន្លឺច្រើន សម្រាប់ដំណើរការ ស៊ើបអង្កេតលើការលូកដៃរបស់រុស្ស៊ីនៅក្នុងការបោះឆ្នោតអាមេរិក ព្រោះថា លោកប៉ូល ម៉ាណាហ្វរ ធ្លាប់ជួយអតីតប្រធានាធិបតីអ៊ុយក្រែន ដែលគាំទ្ររុស្ស៊ី មុននឹងក្លាយជាប្រធានចាត់ចែងការឃោសនាបោះឆ្នោតរបស់លោកដូណាល់ ត្រាំ។
រងបទចោទប្រកាន់ចំនួន ១៨ ដែលអាចឲ្យលោកប្រឈមនឹងការកាត់ទោសឲ្យជាប់ពន្ធនាគារយ៉ាងតិច ៣០ឆ្នាំ លោកម៉ាណាហ្វរ ជាមនុស្សតែម្នាក់គត់ ក្នុងចំណោមជនជាប់សង្ស័យជាង៣០នាក់របស់រដ្ឋអាជ្ញាពិសេស ដែលបានទាត់ចោលការចោទប្រកាន់ និងបដិសេធមិនព្រមសហការជាមួយក្រុមអ្នកស៊ើបអង្កេត។ គេបានវាយតម្លៃថា ដោយធ្វើដូច្នេះ លោកប៉ូល ម៉ាណាហ្វរ ចង់បង្ហាញថា លោកនៅតែស្មោះត្រង់ នឹងលោកដូណាល់ ត្រាំ និងសង្ឃឹមបានទទួលការលើកលែងទោសពីប្រធានាធិបតី ក្នុងករណីរងការផ្តន្ទាទោសពីតុលាការ។
ការឈានទៅដាក់ទោសណាមួយ លើអតីតមេក្រុមឃោសនារបស់លោកដូណាល់ ត្រាំ អាចជាការបោះជំហានមួយទៅមុខ របស់ក្រុមស៊ើបអង្កេត របស់រដ្ឋអាជ្ញាពិសេស នៅក្នុងសំណុំរឿងលូកដៃរបស់រុស្ស៊ី ក្នុងការបោះឆ្នោតប្រធានាធិបតីអាមេរិក។ នៅចុងសប្តាហ៍មុននេះ លោកប្រធានាធិបតីដូណាល់ ត្រាំ បាននិយាយដដែលឡើងវិញថា គ្មានទេ ការជាប់ពាក់ព័ន្ធរបស់រុស្ស៊ី ក្នុងការបោះឆ្នោត និងបានបរិហាររិះគន់ ការតាមចាប់ប្រមាញ់មេធ្មប់ របស់លោករដ្ឋអាជ្ញាពិសេស Robert Mueller៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ