នីការ៉ាហ្កា៖បាតុកម្មទម្លាក់ប្រធានាធិបតី និងអនុប្រធានាធិបតីជាប្តី ប្រពន្ធកំពុងបន្តយ៉ាងហិង្សា
នៅក្នុងប្រទេសនីការ៉ាហ្កា មានមនុស្សស្លាប់យ៉ាងតិច ៨នាក់ ក្នុងនោះមានក្មេងអាយុ ១៥ឆ្នាំម្នាក់នៅក្នុងការវាយប្រហារពីកម្លាំងសន្តិសុខលើហ្វូងបាតុករ។ បាតុករដែលកំពុងបន្តក្បួនបាតុកម្មទាមទារឲ្យលោកប្រធានាធិបតីដាញែល អតេហ្កា និងអនុប្រធានាធិបតីដែលជាភរិយាលោកស្រីរ៉ូសារីយ៉ូ មូរីយ៉ូចុះចេញពីតំណែង។ សូមជម្រាបជូនថា ក្បួនបាតុកម្មបានចាប់ផ្តើមតាំងពីថ្ងៃទី ១៨ មេសា និងមកទល់ថ្ងៃនេះបានបណ្តាលឲ្យមានមនុស្សស្លាប់ជាង ២០០នាក់។
ចុះផ្សាយនៅថ្ងៃ៖
ស្តាប់ - ០២:០១
ឧប្បវហេតុហិង្សាចុងក្រោយនេះបានកើតមាននៅយប់ថ្ងៃសុក្រឆ្លងចូលថ្ងៃសៅរ៍ទី២៤ មិថុនា។ កម្លាំងសន្តិសុខ និងកម្លាំងស្វ័យត្រានបានបើកការវាយប្រហាររយៈពេល ៨ម៉ោងលើហ្វូងបាតុករក្នុងសង្កាត់ចំនួន ៦ ស្ថិតប៉ែកខាងកើតទីក្រុងម៉ាណាហ្កា និងលើហ្វូងបាតុករសិស្ស និស្សិតដែលបានចូលទៅលាក់ខ្លួននៅក្នុងសាកលវិទ្យាល័យមួយស្ថិតប៉ែកនិរតី។ សាក្សីជាយុវជនម្នាក់រុំមុខដោយកន្សែងបានអះអាងពីឆាកវាយប្រហារដែលមិនស្មើភាព ព្រោះកម្លាំងសន្តិសុខ និងកម្លាំងស្វ័យត្រានបានបាញ់ដើម្បីសម្លាប់មនុស្សដៃទទេ។ តាមសាក្សីរូបនេះដដែល កម្លាំងសន្តិសុខ និងកម្លាំងស្វ័យត្រានកំពុងសម្លាប់រង្គាលលើប្រជាជន និងក្រុមយុវវ័យ។
តែប៉ូលិសបានបញ្ជាក់នៅក្នុងសេចក្តីប្រកាសព័ត៌មានថា ប្រតិបត្តិការរបស់ខ្លួនជាការបោសសំអាតជនល្មើសដែលកំពុងសោយរាជ្យនៅក្នុងសង្កាត់ទាំងនោះ និងបានទម្លាក់ការទទួលខុសត្រូវនៃការស្លាប់មនុស្សលើក្រុមជនល្មើស។ ចំណែកសន្និសីទគ្រឹស្តសាសនានីការ៉ាហ្កាដែលបានអំពាវនាវតាំងពីថ្ងៃផ្ទុះវិបត្តិដំបូងឲ្យរដ្ឋាភិបាល និងក្រុមប្រឆាំងបន្តកិច្ចសន្ទនារវាងគ្នាបានបញ្ជូនគណៈប្រតិភូចំនួន ៤នាក់របស់ខ្លួនឲ្យទៅវាយតម្លៃស្ថានការណ៍។ « តាំងនាមឲ្យព្រះជាម្ចាស់ យើងស្នើឲ្យបញ្ឈប់ការវាយប្រហារ បញ្ឈប់អំពើហិង្សា និងបញ្ឈប់ការសម្លាប់ » នេះជាការថ្លែងរបស់សង្ឃកាតូលិករ៉ាអ៊ូល ហ្សាម៉ូរ៉ា។
ដោយឡែក វិហារគ្រឹស្តសាសនាបានអំពាវនាវលោកប្រធានាធិបតីអតេហ្កាឲ្យរៀបចំការបោះឆ្នោតជាតិមុនអាណត្តិនៅខែមីនា ឆ្នាំ ២០១៩ ពោលមិនបាច់រង់ចាំដល់ដំណាច់ឆ្នាំ ២០២១ ទេ។ តែមកដល់ពេលនេះ លោកអតេហ្កាបានបន្តបិទមាត់មិននិយាយស្តីអ្វីទាំងអស់។ សូមជម្រាបជូនថាមានអាយុ ៧២ឆ្នាំ លោកអតេហ្កាដែលជាអតីតឧទ្ទាមបានឡើងអង្គុយកៅអីប្រធានាធិបតីនីការ៉ាហ្កាតាំងពីឆ្នាំ ២០០៧។ គឺជាកៅអីដែលលោកអតេហ្កាធ្លាប់បានអង្គុយម្តងពីឆ្នាំ ១៩៧៩ ដល់ឆ្នាំ ១៩៩០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ